អន្តរជាតិ
លោក ស៊ី ផ្ញើលិខិតអបអរលោក ង្វៀន ភូជុង ដែលបន្តកាន់តំណែងលេខាបក្សកុម្មុយនីស្តវៀតណាម ប្រធានាធិបតីចិន លោក ស៊ី ជិនភីង (ខាងឆ្វេង) ជាមួយលោក លោក ង្វៀន ភូជុង អគ្គលេខាធិការបក្សកុម្មុយនិស្តវៀតណាម នៅទីក្រុងហាណូយ ឆ្នាំ២០១៧។ រូបភាព៖ Vietnam News
× ប្រមុខបក្សកុម្មុយនីស្តចិនចិន លោកស៊ី ជិនភីង បានផ្ញើលិខិតសាទរមួយ នៅថ្ងៃទី៣១ ខែមករា ទៅកាន់លោក ង្វៀន ភូជុង ដែលត្រូវបានជ្រើសតាំងជាអគ្គលេខាធិបក្សកុម្មុយនីស្តវៀតណាមជថ្មី។ ក្នុងលិខិតអបអរ លោក ស៊ី បានបញ្ជាក់ថា ចិនបានត្រៀមខ្លួនជាស្រេចក្នុងការពង្រឹងទំនាក់ទំនងជាយុទ្ធសាស្ត្រ កិច្ចសហប្រតិបត្តិការ និងការផ្តោះប្តូរទំនាក់ទំនងទៅវិញទៅមកលើវិស័យជាច្រើន។
ប៉ុន្មានម៉ោងបន្ទាប់ពីលោក ង្វៀន ភូជុង ត្រូវបានជ្រើសតាំងជាអគ្គលេខានៃគណៈមជ្ឈិមបក្សកុម្មុយនិស្តវៀតណាម លោក ស៊ី ជិនភីង ដែលជាអគ្គលេខាធិបក្សកុម្មុយនីស្តចិន បានផ្ញើលិខិតអបអរសាទរជាមួយនឹងការប្ដេជ្ញាចិត្តពង្រឹងទំនាក់ទំនងទ្វេភាគី។ បើតាមការបញ្ជាក់របស់លោក ស៊ី ក្រោមការដឹកនាំរបស់លោក ជុង បក្សកុម្មុយនីស្តវៀតណាម នឹងបង្កើតស្នាដៃរបស់ខ្លួនបន្ថែមទៀត។
នៅក្នុងសារអបអរសាទរ ដែលបានចុះផ្សាយដោយទីភ្នាក់ងារព័ត៌មានរដ្ឋចិន Xinhua លោក ស៊ី ដែលជាប្រធានាធិបតីចិន បានចាត់ទុកចិន និងវៀតណាម ជាប្រទេសជិតខាងសង្គមនិយម និងជាសហគមន៍មួយ ដែលមានអនាគតរួម។ ក្នុងន័យនេះ លោកស៊ី បានបញ្ជាក់ថា រដ្ឋាភិបាលក្រុងប៉េកាំង បានត្រៀមខ្លួនជាស្រេច ក្នុងការសហការជាមួយរដ្ឋាភិបាលក្រុងហាណូយលើការពង្រឹងទំនាក់ទំនងជាយុទ្ធសាស្ត្រ, មិត្តភាព, ការផ្តោះប្តូរ និងកិច្ចសហប្រតិបត្តិការនៅក្នុងវិស័យផ្សេងៗ និងការលើកស្ទួយប្រព័ន្ធសង្គមនិយម។
តាមរយៈកិច្ចសហប្រតិបត្តិការទាំងនេះ ប្រទេសជិតខាងទាំងពីរ នឹងអាចកាន់ចង្កូតរួមគ្នាក្នុង «ភាពជាដៃគូរនៃកិច្ចសហប្រតិបត្តិការជាយុទ្ធសាស្ត្រទូលំទូលាយ» ជាមួយនឹងវឌ្ឍនភាព, ការអភិវឌ្ឍ, ផលប្រយោជន៍សម្រាប់ប្រជាជនប្រទេសទាំងពីរ, កិច្ចសហប្រតិបត្តិការឈ្នះ-ឈ្នះ និងការលើកតម្កើនសន្តិភាព និងស្ថិរភាពនៅក្នុងតំបន់ថែមទៀត។ នេះជាការបញ្ជាក់របស់លោក ស៊ី ។
លិខិតរបស់លោក ស៊ី ត្រូវគេមើលឃើញថា ជាកាយវិការវិជ្ជមានមួយ ដែលរដ្ឋាភិបាលក្រុងប៉េកាំងចង់ស្ដារទំនាក់ទំនងរបស់ខ្លួនជាមួយក្រុងហាណូយ។ កន្លងមក ដោយសារតែជម្លោះនៅក្នុងសមុទ្រចិនខាងត្បូង ទំនាក់ទំនងវៀតណាម និងចិន បានរងភាពល្អក់កករយ៉ាងខ្លាំង។ ម្យ៉ាងជម្លោះនេះ ក៏បានជំរុញឱ្យវៀតណាម ពង្រឹងទំនាក់ទំនងជាមួយប្រទេសផ្សេទៀតដែរ ដែលភាគច្រើនសុទ្ធតែជាគូប្រជែងរបស់ចិន ក្នុងនោះមានដូចជា ឥណ្ឌា ជប៉ុន និងអាមេរិកជាដើម។
សូមបញ្ជាក់ថា លោក ជុង បានកាន់តំណែងជាលេខាបក្សកុម្មុយនីស្តវៀតណាម ចាប់តាំងពីឆ្នាំ ២០១១ មកម្លេះ ហើយនៅក្នុងឆ្នាំ ២០១៨ លោក បានកាន់តំណែងជាប្រធានាធិបតីមួយទៀត៕
© រក្សាសិទ្ធិដោយ thmeythmey.com