ពលរដ្ឋមីយ៉ាន់ម៉ានៅបរទេស បានជួបជុំគ្នានៅមុខស្ថានទូតមីយ៉ាន់ម៉ាដើម្បីតវ៉ានឹងការធ្វើរដ្ឋប្រហារដោយយោធាប្រឆាំងរដ្ឋាភិបាលស៊ីវិល។ បាតុករទាមទារឲ្យក្រុមយោធាដោះលែងលោកស្រី អ៊ុងសាន ស៊ូជី ក៏ដូចជាអំពាវនាវឲ្យរដ្ឋាភិបាលម្ចាស់ផ្ទះប្រឆាំងនឹងរដ្ឋប្រហារ និងមិនត្រូវទទួលស្គាល់រដ្ឋាភិបាលយោធាថ្មីនេះឡើយ។
ខណៈប្រជាជនមីយ៉ាន់ម៉ាក្នុងស្រុករក្សាភាពស្ងប់ស្ងាត់នៅឡើយ ពលរដ្ឋមីយ៉ាន់ម៉ានៅបរទេសនាំគ្នាធ្វើបាតុកម្មប្រឆាំងការដណ្ដើមអំណាចរបស់យោធានៅថ្ងៃទី១ ខែកុម្ភៈ។ គេបានឃើញមានការជួបជុំនៅទីក្រុងបាងកក ប្រទេសថៃ ទីក្រុងតូក្យូរបសជប៉ុន និងនៅនេប៉ាល់ជាដើម។
នៅទីក្រុងបាងកក ប្រជាជនមីយ៉ាន់ម៉ា ដែលភាគច្រើនជាពលករចំណាកស្រុក និងជាអ្នកគាំទ្របក្សសម្ព័ន្ធដើម្បីប្រជាធិបតេយ្យ (NLD) បានជួបជុំ នៅមុនស្ថានទូតមីយ៉ាន់ម៉ាដោយពាក់អាវយឺតរបស់បក្ស(NLD) និងម៉ាស់មានរូបផ្កាយ និងហង្សដែលជានិមិត្តសញ្ញារបស់បក្សនេះ។ បាតុករ បានប៉ះទង្គិចបន្តិចបន្តួចជាមួយប៉ូលិសថៃ ដែលធ្វើឱ្យមនុស្ស២នាក់របួស។
«យើងខឹងខ្លាំងណាស់។ ពលរដ្ឋមីយ៉ាន់ម៉ា ដឹងថាឧត្តមសេនីយ៍ទាំងនោះអាក្រក់ប៉ុណ្ណា។ យើង ចង់ឲ្យដោះលែងម្តាយរបស់យើង»។ នេះជាការលើកឡើងរបស់លោក Naing Li Noo ពលករចំណាកស្រុកម្នាក់ដែលជិះម៉ូតូមកបាតុកម្ម។ នៅមីយ៉ាន់ម៉ា ពលរដ្ឋមួយចំនួនហៅលោកស្រីស៊ូជី ជាម្តាយ។ លោកLi Noo ប្តេជ្ញាថានឹងបាតុកម្មនៅមុខស្ថានទូតជាថ្មី ដោយអះអាងថាមិនខ្លាចនឹងបាត់បង់អ្វីឡើយ។ នេះបើតាមកាសែត Bangkok Post ។
ដូចគ្នានេះដែរ Khum Soe Thu ពលរដ្ឋមីយ៉ាន់ម៉ាម្នាក់ដែលរស់នៅថៃជាង១០ឆ្នាំមកហើយនិយាយថា បាតុកម្មនេះមិនមែនត្រឹមតែទាមទារឲ្យដោះលែងលោកស្រី ស៊ូជី ឡើយ។ ពលរដ្ឋរូបនេះ និយាយថា បាតុកម្មនេះគឺទាមទារឲ្យស្តារប្រជាធិបតេយ្យឡើងវិញ សិទ្ធិសេរីភាពក្នុងការបញ្ចេញមតិ និងគ្មានការរើសអើងអ្វីឡើយជាពិសេសសម្រាប់អ្នកស្រឡាញ់ភេទដូចគ្នា។
ក្រៅតែពីថៃ ពលរដ្ឋមីយ៉ាន់ម៉ាមួយក្រុមក៏ជួបជុំបាតុកម្មមុខសាកលវិទ្យាល័យរបស់អង្គការសហប្រជាជាតិនៅក្រុងតូក្យូ ប្រទេសជប៉ុន។ នៅរដ្ឋធានីកដ្ឋមណ្ឌូ ក្រុមសង្គមស៊ីវិលនេប៉ាល់ ក៏នាំគ្នាតវ៉ាប្រឆាំងរដ្ឋប្រហារនៅមីយ៉ាន់ម៉ាដែរ។
លោក Kavi Chongkittavorn អតីតនិពន្ធនាយកសារព័ត៌មានThe Myanmar Time និងជាអ្នកកាសែតដ៏ល្បីដែលតាមដានបញ្ហាអាស៊ាន និយាយថា រដ្ឋប្រហារនេះមានផល់ប៉ះពាល់អវិជ្ជមាន ជាពិសេសលើវិស័យសេដ្ឋកិច្ចមីយ៉ានម៉ា។ លោកថា រដ្ឋាភិបាលស៊ីវិលខិតខំប្រឹងប្រែងក្នុងការសម្រួល និងបង្កើតបរិយាកាសអំណោយផលដល់ការវិនិយោគ ប៉ុន្តែការវិវត្តស្ថានការណ៍នយោបាយបែបនេះ នឹងពន្យឺតការវិនិយោគដោយផ្ទាល់ពីបរទេស។
យោធាមីយ៉ាន់ម៉ា បានឡើងគ្រប់គ្រងអំណាចជាថ្មីតាមរយៈរដ្ឋប្រហារមួយនៅថ្ងៃទី១ ខែកុម្ភៈ។ យោធាអះអាងបានដាក់ប្រទេសក្នុងស្ថានការណ៍អាសន្ន និងអះអាងពីការរៀបចំការបោះឆ្នោតនៅរយៈពេលមួយឆ្នាំខាងមុខ ។ រដ្ឋប្រហារ ធ្វើឡើងដោយសារយោធាមីយ៉ាន់ម៉ា អះអាងថា មានការលួចបន្លំសន្លឹកឆ្លោតជាង ១០លានករណីទាក់ទិននឹងការបោះឆ្នោតថ្ងៃទី៨ ខែវិច្ឆិកា ឆ្នាំ២០២០៕