កីឡាអន្តរជាតិ
អន្តរជាតិ
មួយឃ្លា «ស្ត្រីនិយាយច្រើន» ធ្វើឱ្យប្រធានរៀបចំអូឡាំពិកតូក្យូអស់តំណែង
×![]()
ដោយ: ទេព ពិទូរ្យ
លោក Yoshiro Mori នៅថ្ងៃទី១២ ខែកុម្ភៈ បានចុះចេញពីតំណែងប្រធានគណៈកម្មកាធិការរៀបចំកីឡាអូឡាំពិកក្រុងតូក្យូឆ្នាំ ២០២០ ហើយ បន្ទាប់ពីលោកបានអត្ថាធិប្បាយមិនសមរម្យពាក់ព័ន្ធនឹងការ «រើសអើងភេទ»។ ទោះមានការសុំទោសក្តី ប៉ុន្តែការបង្ហាញការរើសអើងរបស់ Mori ធ្វើឱ្យមានការខឹងសម្បារយ៉ាងខ្លាំងពីសំណាក់ប្រជាជនជប៉ុន និងទូទាំងពិភពលោក។
អត្ថបទទាក់ទង
លោក Mori វ័យ៨៣ឆ្នាំ បាននិយាយក្នុងកិច្ចប្រជុំរបស់មន្ត្រីជាន់ខ្ពស់នៃគណៈកម្មាធិការរៀបចំអូឡាំពិកជប៉ុន (JOC) ក្រោយលាលែងថា ប្រសិនបើវត្តមានលោកបណ្តាលឱ្យមានបញ្ហា នោះកិច្ចខិតខំប្រឹងប្រែងរបស់ក្រុមការងារតាំងពីដើមរហូតមកដល់ពេលនេះនឹងគ្មានន័យ។
លោក Saburo Kawabuchi វ័យ៨៤ឆ្នាំដែលជាអតីតប្រធានសហព័ន្ធកីឡាបាល់ទាត់ជប៉ុន ត្រូវបានគេជឿជាក់ថាបានត្រៀមខ្លួនរួចរាល់ហើយដើម្បីទទួលតំណែងពីលោក Mori។ នេះបើតាមការចុះផ្សាយរបស់កាសែតជប៉ុន Kyodo។
លោក Mori ទទួលបានការរិះគន់យ៉ាងខ្លាំងលើបណ្តាញសង្គម បន្ទាប់ពីលោកបង្ហាញពីការរើសអើងភេទនៅក្នុងកិច្ចប្រជុំក្រុមប្រឹក្សាគណៈកម្មាធិការអូឡាំពិកជប៉ុន (JOC) នាពេលកន្លងមក។ តាមការចុះផ្សាយរបស់កាសែត Asahi លោក Mori បាននិយាយទៅកាន់សមាជិកក្រុមប្រឹក្សាភិបាលស្ត្រីថា«និយាយច្រើននិងរំខាន» នៅក្នុងកិច្ចប្រជុំនោះ។
«Mori សូមមេត្តាលាឈប់ទៅ» ឃ្លានេះ ត្រូវបានបង្ហោះនៅពេញបណ្តាញសង្គម Twitter ក្នុងប្រទេសជប៉ុន ដោយអ្នកប្រើប្រាស់ទាំងនោះអំពាវនាវដល់អ្នកឧបត្ថម្ភដើម្បីដាក់សម្ពាធដល់គណៈកម្មាធិការរៀបចំកីឡាអូឡាំពិកក្រុងតូក្យូបញ្ចប់តំណែងលោក Mori តែម្តង។
បើទោះធ្លាប់បានបដិសេធមិនចុះចេញពីតំណែងក៏ពិតមែន ប៉ុន្តែចុងក្រោយលោក Mori នៅតែបោះបង់កៅអីប្រធានគណៈកម្មកាធិការរៀបចំកីឡាអូឡាំពិកក្រុងតូក្យូដដែល ដោយលោកចាត់ទុកស្មារតីអូឡាំពិកជាធំ៕
Tag:
Yoshiro Mori
Olympic
© រក្សាសិទ្ធិដោយ thmeythmey.com
