សហរដ្ឋអាមេរិកតាមរយៈស្ថានទូតរបស់ខ្លួន បានសាទរកម្ពុជាចំពោះការទទួលបានវ៉ាក់សាំង AstraZeneca/SII ចំនួន៣២៤ ០០០ដូស កាលពីល្ងាចថ្ងៃទី២ ខែមីនា។ កម្ពុជាស្ថិតក្នុងចំណោមប្រទេសដំបូងគេដែលបានទទួលវ៉ាក់សាំងប្រឆាំងមេរោគកូវីដ-១៩ ពីមជ្ឈមណ្ឌលកូវ៉ាក់ (COVAX)។
«ការគាំទ្រចំពោះការឆ្លើយតបរបស់កម្ពុជា ចំពោះមេរោគកូវីដ-១៩ តាមរយៈយន្តការ COVAX បន្តភាពជាដៃគូ និងកិច្ចសហប្រតិបត្តិការយូរអង្វែងផ្នែកសុខភាពសាធារណៈរបស់យើង ជាមួយប្រទេសកម្ពុជា»។ នេះជាការគូសបញ្ជាក់របស់ឯកអគ្គរដ្ឋទូតអាមេរិក លោក W.Patrick Murphy ដោយបន្ថែមថា អាមេរិកត្រៀមខ្លួនជានិច្ចក្នុងកិច្ចសហការជាមួយកម្ពុជាដើម្បីយកឈ្នះកូវីដ-១៩។
កាលពីពេលថ្មីៗកន្លងមកនេះ សហរដ្ឋអាមេរិកបានប្រកាសពីការផ្តល់ជំនួយសម្រាប់គ្រាដំបូង ចំនួន ២ ពាន់លានដុល្លារ ក្នុងចំណោមប្រាក់សរុបចំនួន ៤ ពាន់លានដុល្លារ ដល់គម្រោងគំនិតផ្តួចផ្តើមនេះ ដែលជាការធ្វើឲ្យសហរដ្ឋអាមេរិកគឺជាប្រទេសរួមចំណែកធំជាងគេតែមួយគត់ ដល់ការឆ្លើយតបជាអន្តរជាតិ ចំពោះមេរោគកូវីដ-១៩។
ស្ថានទូតអាមេរិក បានបន្ថែមនៅក្នុងសេចក្តីប្រកាសព័ត៌មានរបស់ខ្លួនថា ការរួមវិភាគទាន ចំពោះ COVAX តាមរយៈទីភ្នាក់ងារជំនួយអាមេរិក USAID ជួយដល់ការទិញ និងការបញ្ជូនវ៉ាក់សាំងប្រឆាំងមេរោគកូវីដ-១៩ ដែលមានប្រសិទ្ធភាពនិងសុវត្ថិភាព សម្រាប់ប្រជាជនដែលងាយរងគ្រោះ និងប្រឈមនឹងហានិភ័យខ្លាំងជាងគេ នៅក្នុងប្រទេសដែលមានចំណូលទាប និងចំណូលមធ្យមនៃពិភពលោក។
បន្ថែមលើនេះ តាមរយៈ USAID អាមេរិក បានផ្តល់ជំនួយក្នុងទឹកប្រាក់ ជាង ១១ លានដុល្លារអាមេរិក ដែលជាជំនួយពិសេសក្នុងការជួយដល់ប្រទេសកម្ពុជា ក្នុងការការពារ ស្វែងរក និងឆ្លើយតបនឹងការរីករាលដាលនៃជំងឺ ក៏ដូចជាជួយដល់ការស្តារសេដ្ឋកិច្ចឡើងវិញផងដែរ។
ចំពោះការទទួលបានវ៉ាក់សាំងកូវីដ-១៩ ពីយន្តការកូវ៉ាក់ ត្រូវបានសម្តេចនាយករដ្ឋមន្ត្រី ហ៊ុន សែន លើកឡើងពី កិច្ចសហប្រតិបត្តិការល្អរវាងកម្ពុជា និងសហគមន៍អន្តរជាតិនាពេលកន្លងមក ។ សម្តេចថ្លែងយ៉ាងដូច្នេះថា៖ « នេះគឺការជឿទុកចិត្ត និងដោយយោងលើកិច្ចសហប្រតិបត្តិការល្អរវាងរាជរដ្ឋាភិបាលកម្ពុជា និងសហគមន៍អន្តរជាតិក្នុងការប្រយុទ្ធនឹងការឆ្លងរាលដាលនៃជំងឺកូវីដ-១៩»។
ក្រៅពីកម្ពុជា នៅតំបន់អាស៊ីមានប្រទេសដែលទទួលបានវ៉ាក់សាំងដំបូងគេតាមរយៈCOVAX គឺកូរ៉េខាងត្បូង ដែលបានទិញជាង១១ម៉ឺនដូស កាលពីថ្ងៃទី២៦កុម្ភៈ ឆ្នាំ២០២១ ប៉ុន្តែជាការបញ្ជាទិញ។ ចំណែកបណ្ដាប្រទេសផ្សេងទៀត ដែលទទួលបានវ៉ាក់សាំងកូវីដ-១៩ តាមរយៈ COVAX មាននីហ្សេរីយ៉ា ហ្គាណា កូតឌីវ័រ និងអង់ហ្គោឡា។
វ៉ាក់សាំងការពារជំងឺកូវីដ-១៩ ចំនួន ៣២៤,០០០ដូស របស់ក្រុមហ៊ុនអាស្ត្រាហ្ស៊ីណិកា (AstraZeneca) ដែលទទួលបានអាជ្ញាបណ្ណ ផលិតដោយវិទ្យាស្ថានសេរ៉ុម (Serum Institute) នៃប្រទេសឥណ្ឌា បានដឹកមកដល់កម្ពុជា នាយប់ថ្ងៃទី២មីនា ឆ្នាំ២០២១។
ក្នុងពិធីប្រគល់និងទទួល វ៉ាក់សាំងកូវីដ-១៩ ជំហានទី១ ពីមជ្ឈមណ្ឌលកូវ៉ាក់នៅថ្ងៃទី២មីនា លោកស្រី ហ្វ័រូហ្គ ហ្វយូហ្សិថ នាយិកាយូនីសេហ្វប្រចាំកម្ពុជា អះអាងថា វ៉ាក់សាំងថ្មីនេះ នឹងអាចជួយឲ្យកម្ពុជាទប់ស្កាត់ការរីករាលដាលនៃកូវីដ-១៩ ហើយវិលទៅសភាពប្រក្រតីថ្មីមួយទៀត។
«វ៉ាក់សាំងថ្មីនេះបង្កើតឱកាសដ៏សំខាន់មួយ ដើម្បីផ្លាស់ប្តូរទិសដៅនៃការឆ្លងរាលដាលជាសកលនេះ។ ដោយសារតែបុគ្គលិកសុខាភិបាលនិងបុគ្គលិកជួរមុខដទៃទៀត នឹងទទួលបានវ៉ាក់សាំង យើងនឹងអាចមើលឃើញជាបណ្តើរៗនូវការវិលទៅរកជីវិតជាប្រក្រតីថ្មីមួយ រួមទាំងការទទួលបានសេវាសុខភាព ការអប់រំ និងការពារកាន់តែប្រសើរ»។ នេះបើតាមការលើកឡើងរបស់លោកស្រី ហ្វ័រូហ្គ ហ្វយូហ្សិថ ដោយបញ្ជាក់បន្ថែមថា កិច្ចខំប្រឹងប្រែងនេះ គឺធ្វើឡើងស្របតាមស្មារតីពង្រីកការគ្របដណ្តប់សេវាសុខភាពជាសកល ដោយមិនត្រូវទុកអ្នកណាម្នាក់ចោលឡើយ៕