អគ្គលេខាធិការសម្ពន្ធយោធា NATO លោក Jens Stoltenberg ព្រមានថា អឺរ៉ុបពុំមានសមត្ថភាពក្នុងការការពារខ្លួនឡើយ ដោយសន្តិសុខរបស់ទ្វីបនេះអាស្រ័យទៅលើទំនាក់ទំនងអន្តរអាត្លង់ទិករវាងអឺរ៉ុប និងសម្ពន្ធមិត្តនៅអាមេរិកខាងជើងមានអាមេរិក និងកាណាដាជាដើម។ ប្រមុខ NATO និយាយទៀតថា ប្រទេសដែលពុំមែនជាសមាជិកសហភាពអឺរ៉ុប ក៏មាននាទីយ៉ាងសំខាន់ផ្នែកភូមិសាស្ត្រក្នុងការការពារទ្វីបនេះដែរ។
សមាជិកសហភាពអឺរ៉ុប(EU)និង NATO អាស្រ័យលើសម្ពន្ធភាពអន្តរអាត្លង់ទិកក្នុងការរក្សាសន្តិសុខរបស់គ្នាទៅវិញទៅមក។ នេះជាការមើលឃើញរបស់លោក Jens Stoltenberg អគ្គលេខាធិការសម្ពន្ធយោធា NATO ស្របពេលបណ្ដាប្រទេសធំៗរបស់អឺរ៉ុបចង់មានស្វ័យភាពផ្នែកសន្តិសុខកាន់ច្រើនច្រើន ជាជាងពឹងពាក់លើសម្ពន្ធភាព NATO នោះ។ ប៉ុន្តែលោក Stoltenberg រំឭកថាប្រទេសសមាជិក EUមួយចំនួនពុំមានសមត្ថភាពក្នុងការការពារសន្តិសុខខ្លួនឡើយ ។
ការលើកឡើងរបស់ប្រមុខ NATO ធ្វើឡើងក្នុងបរិបទមួយដែលថ្នាក់ដឹកនាំសហភាពអឺរ៉ុបជាពិសេសបារាំង ជំរុញឱ្យអឺរ៉ុបមានស្វ័យភាពផ្នែកយុទ្ធសាស្ត្រផ្ទាល់ខ្លួនមួយដើម្បីបំពេញតួនាទីភូមិសាស្ត្រនយោបាយរបស់អឺរ៉ុប។ ប្រធានាធិបតីបារាំង អេម៉ានុយអែល ម៉ាក្រុង ធ្លាប់ទាំងថា NATO លែងដំណើរការទៀតហើយ ហើយEUចាំបាច់ត្រូវរកវីធីការពារខ្លួន និងមិនអាចរំពឹងលើអាមេរិក ឬប្រទេសក្រៅទ្វីបអឺរ៉ុបរហូតបានឡើយ។
«ខ្ញុំមិនជឿអឺរ៉ុបតែមួយគត់ឡើយ។ ខ្ញុំមិនជឿអាមេរិកខាងជើងដែរ។ ខ្ញុំជឿលើអាមេរិកខាងជើង និងអឺរ៉ុបធ្វើការរួមគ្នាដើម្បីសាមគ្គីភាពយុទ្ធសាស្ត្រនៅ NATO »។ នេះជាការលើកឡើងរបស់លោកStoltenberg ក្នុងកិច្ចសម្ភាសជាមួយទីភ្នាក់ងារព័ត៌មាន AFP នៅថ្ងៃទី៤ ខែមីនា មុនបន្តថា ប្រទេសមួយ ឬទ្វីបមួយមិនអាចគ្រប់គ្រងបញ្ហាសន្តិសុខដែលកើតមាននាពេលបច្ចុប្បន្ននេះឡើយ។
ការចំណាយលើវិស័យយោធា ជាផ្នែកមួយដែលលោក Stoltenberg អះអាងថា ធ្វើឱ្យ EU មិនអាចការពារខ្លួនឯងបាន។ លោកបញ្ជាក់ថា ប្រជាជនចំនួន៩០ភាគរយនៃ EU រស់នៅក្នុងប្រទេសដែលជាសមាជិក NATO ប៉ុន្តែប្រទេសដែលជាសមាជិក EU ចូលរួមចំណែកថវិកាបានត្រឹមតែ២០ភាគរយតែប៉ុណ្ណោះ។
លើសពីនោះ កត្តាភូមិសាស្ត្រ ក៏ជាចំណុចមួយដែល EU ត្រូវការ NATO ផងដែរ។ លោក Stoltenberg និយាយថា នៅភាគខាងជើងប្រទេស EU អាចរួចខ្លួនពីការទន្ទ្រានរបស់រុស្ស៊ីក៏ដោយសាររដ្ឋសមាជិកមិនមែនជាសមាជិក EU ដូចជាអាមេរិក កាណាដា និងអង់គ្លេស។ នៅភាគអាគ្នេយ៍វិញ តួកគីដែលមិនមែនជាសមាជិក EU មាននាទីយ៉ាងសំខាន់ក្នុងការប្រយុទ្ធទៅនឹងរដ្ឋឥស្លាមដែលជាក្រុមភេរវកម្មអន្តរជាតិ ដោយមានព្រំដែនជាមួយស៊ីរី និងអ៊ីរ៉ាក់។
បន្ថែមពីនេះ បញ្ហាប្រឈមសន្តិសុខថ្មីៗដូចជាការវាយប្រហារតាមប្រព័ន្ធអ៊ីនធើណែង ភេរវកម្មអន្តរជាតិ បម្រែបម្រួលអាកាសធាតុ និងការទប់ទៅនឹងឥទ្ធិពលចិន ក៏ជារឿងចាំបាច់ត្រូវការគោលនយោបាយរួមរវាងអឺរ៉ុប និងអាមេរិកខាងជើង។ នេះបើតាមលោក Stoltenberg។
មែនទែនទៅ ការមើលមុខគ្នាមិនចំរវាងប្រទេសសមាជិកសហភាពអឺរ៉ុបលើបញ្ហា NATO លេចជាជារូបរាងក្នុងរដ្ឋបាលរបស់អតីតប្រធានាធិបតី ដូណាល់ ត្រាំ។ លោក ត្រាំ តែងតែប្រាប់ឱ្យសមាជិកNATO ដែលជាសមាជិក EU ផងដែរនោះ បង្កើនការចំណាយលើវិស័យការពារជាតិ និងឈប់ដាក់បន្ទុកច្រើនជ្រុលដល់អាមេរិក។ បន្ថែមពីនេះ គេក៏ឃើញមានផងដែរជម្លោះរវាងសមាជិក NATO ដូចជារវាងតួកគី និងក្រិកលើព្រំដែនសមុទ្រ និងការរំលោភបម្រាមលក់អាវុធរបស់អង្គការសហប្រជាជាតិដោយតួកគី ទៅលីប៊ី។