បាតុកម្មប្រឆាំងរបបយោធានៅមីយ៉ាន់ម៉ា នៅតែមិនស្រាកស្រាន្ត ដោយប្រជាជនមីយ៉ាន់ម៉ានៅតែប្រមូលផ្ដុំគ្នាតវ៉ានៅតាមទីក្រុងនានានៅស្ទើរទូទាំងប្រទេស បើទោះមានការបង្រ្កាបដោយហិង្សាកាន់តែខ្លាំងឡើងពីសំណាក់កម្លាំងយោធាក៏ដោយ។ 
 

វិបត្តិនយោបាយនៅមីយ៉ាន់ម៉ាផ្ទុះឡើង បន្ទាប់ពីយោធាក្រោមការដឹកនាំរបស់ឧត្តមសេនីយ៍ មីន អ៊ុងឡាំងបានកាន់កាប់អំណាចដោយរដ្ឋប្រហារ និងឃុំខ្លួនមេដឹកនាំស៊ីវិលលោកស្រីអ៊ុងសាន ស៊ូជី ចាប់តាំងពីខែកុម្ភៈមក។


កីឡាករ Phoe Thaw ដែលត្រូវយោធាមីយ៉ាន់ម៉ា​ចាប់ខ្លួន 

បើតាមការផ្សាយរបស់ទីភ្នាក់ងារព័ត៌នាន AFP មានការបំផ្ទុះគ្រាប់បែកដើម្បីបំបែងហ្វូងតវ៉ានៅទីតាំងហាត់ប្រាណមួយកន្លែងក្នុងក្រុងយ៉ាំងហ្គោនកាលពីសប្តាហ៍មុន ដែលធ្វើឱ្យកីឡាករវាយក្នុងទ្រុង Phoe Thaw រងរបួស។ កីឡាករ MMA រូបនេះក៏ត្រូវយោធាមីយ៉ាន់ម៉ាចាប់ខ្លួនតែម្តង។
 

មុនពេលចាប់ខ្លួននោះ Phoe Thaw ស្ថិតក្នុងចំណោមមនុស្សល្បីឈ្មោះ និងអ្នកមានឥទ្ធិពលរាប់រយនាក់ដែលជាមុខសញ្ញារបស់របបយោធា។ ក្រុមយោធាមីយ៉ាន់ម៉ា បានចោទប្រកាន់ពួកគេពីបទផ្សព្វផ្សាយព័ត៌មានមិនពិត ដែលធ្វើឱ្យប៉ះពាល់ដល់ក្រុមរបស់ពួកគេ។
 

Aung La N Sang អត្តពលិកល្បីឈ្មោះ និងជាបុគ្គលមានឥទ្ធិពលរបស់មីយ៉ាន់ម៉ាមួយរូបដែរនោះ បានចេញមុខរិះគន់យោធាជាសារណៈ ជុំវិញការចាប់ខ្លួនមិត្តរួមជាតិ និងអាជីពគុនចម្រុះនៅលើបណ្តាញសង្គមហ្វេសប៊ុក។
 

«ខ្ញុំស្គាល់គាត់ [Phoe Thaw] យូរមកហើយ គាត់ជាមនុស្សសុភាពរាបសា និងមានចិត្តល្អ ... សូមព្យាយាមកុំផ្សព្វផ្សាយព័ត៌មានក្លែងក្លាយ និងការស្អប់ខ្ពើម»។ នេះជាការអះអាងរបស់អតីតម្ចាស់ខ្សែក្រវាត់ទម្ងន់មធ្យម និងស្រាលរបស់ ONE Championship ដែលបច្ចុប្បន្នកំពុងស្នាក់នៅអាមេរិក។

យោងតាមក្រុមឃ្លាំមើលក្នុងតំបន់ ចាប់តាំងពីរដ្ឋប្រហារដោយយោធា ក្រោមការដឹកនាំរបស់ឧត្តមសេនីយ៍ មីន អ៊ុងឡាំង យ៉ាងហោចណាស់មានជនស៊ីវិលជិត៨០០នាក់ហើយបានសម្លាប់ និងរាប់រយនាក់ទៀតត្រូវបានចាប់ខ្លួន៕