COVID-19
ជាតិ
ករណីកូវីដ-១៩ប្រចាំថ្ងៃពី១៦ខេត្ត៖ ព្រៃវែង តាកែវ បន្ទាយមានជ័យ មានអ្នកឆ្លងច្រើនជាងគេ
×![]()
ដោយ: ខន ចំប៉ា
បណ្តាខេត្តចំនួន១៦ បានផ្សព្វផ្សាយការរកឃើញករណីវិជ្ជមានកូវីដ-១៩ នៅក្នុងខេត្តរបស់ខ្លួន នៅថ្ងៃទី៣១ ឧសភា ខណៈរាជធានីភ្នំពេញ និងខេត្តមិនមានរបាយការណ៍នោះឡើយ។ រីឯខេត្តកណ្តាល ក៏ខេត្តទាំងនោះមាន ខេត្តព្រៃវែង, តាកែវ, បន្ទាយមានជ័យ, កំពង់ចាម, កំពង់ឆ្នាំង, ស្វាយរៀង, ពោធិ៍សាត់, បាត់ដំបង, សៀមរាប, កំពង់ធំ, ឧត្តរមានជ័យ, ប៉ៃលិន, ស្ទឹងត្រែង កោះកុង,ត្បូងឃ្មុំ និងរតនគិរី។ 
ព្រៃវែង៖ ៦៥នាក់ ជាចំនួនឆ្លងប្រចាំថ្ងៃច្រើនបំផុត
រដ្ឋបាលខេត្តព្រៃវែង បានប្រកាសរកឃើញមនុស្ស ៦៥នាក់ មានវិជ្ជមានកូវីដ-១៩ តាមរយៈការធ្វើតេស្តរហ័ស នៅថ្ងៃទី៣១ ឧសភា។ គឺជាចំនួនឆ្លងប្រចាំថ្ងៃច្រើនបំផុត សម្រាប់ខេត្តនេះ។ តាមសេចក្តីជូនដំណឹងរបស់រដ្ឋបាលខេត្ត អ្នកឆ្លងភាគច្រើនជាកម្មកររោងចក្រ និងជាអ្នកដែលធ្លាប់ប៉ះពាល់នឹងអ្នកវិជ្ជមានកូវីដ-១៩កន្លងមក។ ក្នុងចំណោមអ្នកវិជ្ជមានសរុប មាន ២៦នាក់ នៅស្រុកព្រះស្តេច, ១៤នាក់នៅស្រុកបាភ្នំ , ១៣នាក់នៅក្រុងព្រៃវែង , ៧នាក់នៅស្រុកមេសាង, ៤នាក់នៅស្រុកពាមជរ និង១នាក់នៅស្រុកកំពង់ត្របែក។ ខេត្តព្រៃវែង មានអ្នកកើតកូវីដ-១៩ សុរប ៤៥៩នាក់ ក្នុងនោះសះស្បើយ ១៩៦នាក់ ស្លាប់៥នាក់ និងអ្នកជំងឺ ២៥៨នាក់កំពុងបន្តព្យាបាល។
តាកែវ៖ ៥០នាក់ ភាគច្រើនជាអាជីវករ
រដ្ឋបាលខេត្តតាកែវ បន្តរកឃើញមនុស្ស ៥០នាក់បន្ថែមទៀត ឆ្លងកូវីដ-១៩ ក្នុងនោះមានទារក និងកុមារអាយុក្រោម១៥ឆ្នាំ៨នាក់ផងដែរ។ តាមសេចក្តីជូនដំណឹងរបស់រដ្ឋបាលខេត្តតាកែវ អ្នកឆ្លងថ្មីភាគច្រើនជាអាជីវករផ្សារត្រពាំងអណ្តើក ផ្សារសំរោងយ៉ោង និងផ្សារសៃវ៉ា។ ក្រៅពីគឺជាកម្មកររោងចក្រ កសិករ បុគ្គលិកកាស៊ីណូ និងសិស្សជាដើម។ ក្នុងចំណោមអ្នកឆ្លងថ្មីទាំង ៥០នាក់នេះ មាន២២នាក់ រស់នៅស្រុកត្រាំកក់, ១៦នាក់នៅស្រុកបាទី, ៨នាក់នៅស្រុកព្រៃកប្បាស, ២នាក់នៅស្រុកទ្រាំង និង២នាក់ទៀតនៅស្រុកសំរោង ខេត្តតាកែវ។
បន្ទាប់ពីផ្ទុះករណីឆ្លងលើអាជីវករ រដ្ឋបាលខេត្តតាកែវ កាលពីថ្ងៃទី៣១ ឧសភា បានសម្រេចផ្អាកបណ្តោះអាសន្នការលក់ដូរ នៅផ្សារសៃវ៉ា ស្ថិតក្នុងភូមិសៃវ៉ា ឃុំព្រៃផ្តៅ ស្រុកព្រៃកប្បាស ខណៈការលក់ដូរនៅផ្សារត្រពាំងអណ្តើក ស្ថិតក្នុងភូមិទួលខ្លង ឃុំអូសារាយ ស្រុកត្រាំកក់ ក៏ត្រូវផ្អាកបណ្តោះអាសន្នដែរ។ ជាមួយគ្នា អាជ្ញាធរក៏សម្រេចបិទខ្ទប់ផ្នែកខ្លះនៃភូមិទួលខ្លុង,ភូមិស្ទឹង និងភូមិឫស្សីមួយគុម្ព ស្ថិតក្នុងឃុំអូរសារាយ ស្រុកត្រាំកក់ ចាប់ពីថ្ងៃទី៣១ ឧសភា រហូតមានការជូនដំណឹងជាថ្មី។
បន្ទាយមានជ័យ៖ ៣៩នាក់ ក្នុងនោះ២៩នាក់មកពីប្រទេសថៃ
រដ្ឋបាលខេត្តបន្ទាយមានជ័យ បន្តរកឃើញមនុស្ស ៣៩នាក់ទៀតមានតេស្តវិជ្ជមានកូវីដ-១៩ ក្នុងនោះ ២៩នាក់ពលរដ្ឋខ្មែរដែលទើបត្រឡប់ពីប្រទេសថៃ។ ក្រៅពីនេះ អ្នកឆ្លងគឺជាកម្មកររោងចក្រ និងអាជីវករ។ យោងតាមសេចក្តីប្រកាសព័ត៌មានរបស់រដ្ឋបាលខេត្តបន្ទាយមានជ័យ ក្នុងចំណោមអ្នកថ្មីទាំង ៣៩នាក់នេះ មាន ១៧នាក់ មានអាសយដ្ឋាននៅស្រុកព្រះនេត្រព្រះ, ១៤នាក់នៅក្រុងប៉ោយប៉ែត, ៤នាក់នៅ ស្រុកមង្គលបុរី ,៣នាក់នៅក្រុងសិរីសោភ័ណ និង១នាក់នៅស្រុកស្វាយចេក។ ជាមួយគ្នានេះ អ្នកជំងឺចំនួន ៦៦នាក់ ក៏បានជាសះស្បើយពីកូវីដ-១៩ផងដែរ។
កំពង់ចាម៖ ឆ្លងថ្មី៣១នាក់ភាគច្រើនជាកម្មកររោងចក្រ និងជាសះស្បើយ ៦០នាក់បន្ថែម
ខេត្តកំពង់ចាម បន្តរកឃើញមនុស្សចំនួន៣១នាក់ទៀត វិជ្ជមានកូវីដ-១៩ ខណៈ៦០នាក់ទៀតបានជាសះស្បើយ។ តាមសេចក្ដីប្រកាសព័ត៌មានរបស់រដ្ឋបាលខេត្ត អ្នកឆ្លងថ្មីភាគច្រើនជាកម្មករ-កម្មការិនីរោងចក្រ ដែលក្នុងនោះមាន ១៦នាក់ រស់នៅស្រុកជើងព្រៃ, ៧នាក់នៅស្រុកបាធាយ, ៥នាក់នៅស្រុកកំពង់សៀម ខណៈស្រុកកងមាស និងស្រុកស្រីសន្ធរ មាន១នាក់រៀងខ្លួន និង១នាក់ទៀតជាអ្នកដំណើរពីរាជធានីភ្នំពេញ។ បច្ចុប្បន្ន ខេត្តកំពង់ចាមានអ្នកឆ្លងកូវីដ-១៩ សរុប ៨៨២នាក់ ក្នុងនោះ ៣១០នាក់បានជាសះស្បើយ។
ស្វាយរៀង៖ ១៧ករណីថ្មី ក្នុងនោះជនជាតិវៀតណាម៦នាក់
ខេត្តស្វាយរៀង បានបន្តរកឃើញអ្នកឆ្លងកូវីដ-១៩ ចំនួន ១៧នាក់ទៀត ក្នុងនោះ៦នាក់ជាបុរសជនជាតិវៀតណាម ដែលជាកម្មករោងចក្រ Smart Tech ដែលមានទីតាំងនៅក្រុងបាវិត។ តាមសេចក្តីជូនដំណឹងរបស់រដ្ឋបាលខេត្តស្វាយរៀង បុរសខ្មែរ២នាក់ទៀត ជាកម្មកររោងចក្រ Smart Tech ដែរនោះ ក៏មានវិជ្ជមានកូវីដ-១៩ ដែរ ហើយអ្នកទាំង២នេះមានអាសយដ្ឋាននៅភូមិពោន ឃុំសង្កែ ស្រុករំដួល ខេត្តស្វាយរៀង។ រោងចក្រ A & J ក៏បន្តរកឃើញកម្មករ២នាក់ទៀតដែរឆ្លងកូវីដ-១៩ ដោយពួកគេរស់នៅភូមិស្វាយគយ ឃុំពពែតស្រុក ស្វាយទាប ខណៈ១នាក់ទៀត ជាកម្មកររោងចក្រ UT Light រស់នៅភូមិព្នៅ ឃុំតាសួស ស្រុកស្វាយជ្រំ។ មនុស្ស ៦នាក់ទៀតជាករណីឆ្លងនៅតាមមូលដ្ឋាន និងឆ្លងតាមរយៈការប៉ះពាល់ជាមួយនឹងអ្នកវិជ្ជមានកន្លងមក។ សេចក្តីជូនដំណឹងរបស់រដ្ឋបាលខេត្តស្វាយរៀង បានបញ្ជាក់ថា អ្នកឆ្លង១នាក់ ជាស្រីវ័យ ៦០ឆ្នាំ រស់នៅឃុំចំបក ស្រុកស្វាយជ្រំ។ មនុស្ស ៣នាក់ទៀត រស់នៅឃុំខែត្រ ស្រុកកំពង់រោទិ៍ ខណៈមនុស្ស២នាក់ទៀត ជាអ្នករស់នៅសង្កាត់ស្វាយរៀង ខេត្តស្វាយរៀង។
ប៉ៃលិន៖ មាន១៦នាក់ថ្មី និងជាសះស្បើយ១នាក់
រដ្ឋបាលខេត្តប៉ៃលិន បានរកឃើញមនុស្ស១៦នាក់ វិជ្ជមានកូវីដ-១៩ ក្នុងនោះ១២នាក់មានអាសយដ្ឋានៅស្រុកសាលាក្រៅ ខេត្តប៉ៃលិន, ២នាក់នៅក្រុងប៉ៃលិន ខេត្តប៉ៃលិន និង២នាក់ទៀតមានអាសយដ្ឋាននៅក្រុងប៉ោយប៉ែត ខេត្តបន្ទាយមានជ័យ។ បើតាមសេចក្តីប្រកាសព័ត៌មានរបស់រដ្ឋបាលខេត្ត អ្នកដែលទើបរកឃើញវិជ្ជមានទាំងអស់នេះ គឺជាអ្នកដែលធ្លាប់ប៉ះពាល់នឹងអ្នកជំងឺកូវីដ-១៩ កន្លងមក។ នៅថ្ងៃទី៣១ ឧសភាដដែល នៅខេត្តប៉ៃលិន ក៏មានអ្នកជំងឺ ១នាក់បានជាសះស្បើយផងដែរ ជាបុរសវ័យ ២៥ឆ្នាំ មានអាសយដ្ឋាននៅសង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។
កំពង់ឆ្នាំង៖ ១៣នាក់ ភាគច្រើនជាកម្មកររោងចក្រ
នៅថ្ងៃទី៣១ ខែឧសភា ខេត្តកំពង់ឆ្នាំង បានបន្តរកឃើញអ្នកវិជ្ជមានកូវីដ-១៩ ចំនួន១៣នាក់ទៀត ដែលភាគច្រើនជាកម្មករោងចក្រ។ សេចក្តីប្រកាសព័ត៌មានរបស់រដ្ឋបាលខេត្តកំពង់ឆ្នាំង បញ្ជាក់ថា ក្នុងចំណោមអ្នកវិជ្ជមានកូវីដ-១៩ ទាំង១៣នាក់ មាន ៧នាក់នៅស្រុកកំពង់ត្រឡាច, ៥នាក់នៅស្រុកសាមគ្គីមានជ័យ និង១នាក់នៅស្រុកសលាប្អៀរ។ គិតមកដល់ពេលនេះ ខេត្តកំពង់ឆ្នាំង មានអ្នកឆ្លងកូវីដ-១៩ សរុប២៤៦នាក់ ក្នុងនោះ ៤៩នាក់ ជាសះស្បើយ, ៣នាក់ស្លាប់ ហើយអ្នកជំងឺ ១៩៤នាក់ទៀត កំពុងបន្តព្យាបាល។
ឧត្តរមានជ័យ៖ មាន៧នាក់ទៀត ជាពលរដ្ឋខ្មែរដែលទើបមកពីប្រទេសថៃ
រដ្ឋបាលខេត្តឧត្តរមានជ័យ បានរកឃើញពលរដ្ឋខ្មែរ៧នាក់ទៀត ដែលទើបត្រឡប់ពីប្រទេសថៃ មានវិជ្ជមានកូវីដ-១៩ ។ បើតាមសេចក្តីប្រកាសព័ត៌មានរបស់រដ្ឋបាលខេត្ត ក្នុងចំណោមអ្នកជំងឺទាំង៧នាក់នេះ មាន៤នាក់ជាពលរដ្ឋដែលមានអាសយដ្ឋាននៅខេត្តបាត់ដំបង, ២នាក់នៅខេត្តបន្ទាយមានជ័យ និង១នាក់ នៅខេត្តឧត្តរមានជ័យ។ គិតត្រឹមថ្ងៃទី៣១ ឧសភា ខេត្តឧត្តរមានជ័យ មានអ្នកវិជ្ជមានកូវីដ-១៩ ចំនួន៥៤ នាក់ក្នុងនោះ ៥២នាក់ជាករណីនាំចូលពីក្រៅប្រទេស។ បច្ចុប្បន្ន មានអ្នកជំងឺ ១៦នាក់ហើយ បានជាសះស្បើយ ខណៈ៣៩នាក់ទៀត កំពុងសម្រាកព្យាបាល។
នាថ្ងៃទី៣១ ខែឧសភា នេះ រដ្ឋបាលខេត្តសៀមរាប បានបន្តរកឃើញអ្នកវិជ្ជមានជំងឺកូវីដ១៩ចំនួន៣នាក់បន្ថែមទៀត ក្នុងនោះ ២នាក់ជាពលករមកពីប្រទេសថៃ។
ត្បូងឃ្មុំ៖ ឆ្លងថ្មី៣នាក់ ដោយ២នាក់ជាពលករមកពីប្រទេសថៃ
ខេត្តត្បូងឃ្មុំ មានអ្នកឆ្លងកូវីដ-១៩ចំនួន ៣នាក់ទៀត ក្នុងនោះ២នាក់ជាអ្នកទើបត្រឡប់ពីប្រទេសថៃ មានទីលំនៅក្នុងភូមិកំពង់ឫស្សី ឃុំជីរោទិ៍ទី១ ស្រុកត្បូងឃ្មុំ។ ចំណែកម្នាក់ទៀតជាករណីឆ្លងក្នុងមូលដ្ឋាន ដោយគាត់ជាបុរសវ័យ ៥៨ឆ្នាំ រស់នៅភូមិលោ ឃុំកំពាន់ ស្រុកមេមត់។ នេះបើតាមសេចក្ដីប្រកាសព័ត៌មានរបស់រដ្ឋបាលខេត្តត្បូងឃ្មុំ នៅរសៀលថ្ងៃទី ១មិថុនានេះ។
បាត់ដំបង៖ រកឃើញ៣នាក់ទៀត ជាពលករមកពីប្រទេសថៃ
ពលករខ្មែរដែលត្រឡប់ពីប្រទេសថៃចំនួន ៣នាក់ទៀត ត្រូវបានអាជ្ញាធរខេត្តបាត់ដំបងរកឃើញថា មានវិជ្ជមានកូវីដ-១៩ នៅថ្ងៃទី៣១ ឧសភា។ អ្នកទាំង៣ គឺមានអាសយដ្ឋាននៅស្រុកមោងឫស្សី។ នេះបើតាមសេចក្តីប្រកាសព័ត៌មានរបស់រដ្ឋបាលខេត្ត ដែលបន្តឱ្យដឹងទៀតថា មានអ្នកជំងឺចំនួន ៨នាក់បន្ថែមដែរ បានជាសះស្បើយ។
នៅថ្ងៃទី៣១ ឧសភាដដែល រដ្ឋបាលខេត្តបាត់ដំបង បានសម្រេចបិទខ្ទប់ទីតាំងផ្ទះចំនួន៥ខ្នង ស្ថិតក្នុងភូមិសាស្រ្ត ស្រុកថ្មគោល ជាបណ្តោះអាសន្នផងដែរ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩។
បច្ចុប្បន្នខេត្តបាត់ដំបង មានអ្នកវិជ្ជមានកូវីដ-១៩សរុប ២២៤នាក់ ក្នុងនោះ៩១នាក់សះស្បើយ និង២នាក់ស្លាប់។ អ្នកជំងឺ២នាក់ ត្រូវបានបញ្ជូនទៅព្យាបាលនៅខេត្តបន្ទាយមានជ័យ និង១២៩នាក់ទៀត កំពុងសម្រាកព្យាបាលនៅមន្ទីរពេទ្យបង្អែកនានាក្នុងខេត្តបាត់ដំបង។
សៀមរាប៖ រកឃើញថ្មី៣នាក់ ក្នុងនោះ២នាក់ជាអ្នកទើបត្រឡប់ពីប្រទេសថៃ
ខេត្តសៀមរាប បន្តរកឃើញអ្នកវិជ្ជមានកូវីដ-១៩ ចំនួន៣នាក់ទៀត ដែលក្នុងនោះមាន២នាក់ជាអ្នកដែលទើបត្រឡប់មកពីប្រទេសថៃ។ តាមសេចក្ដីប្រកាសព័ត៌មានរបស់រដ្ឋបាលខេត្តសៀមរាប ក្នុងចំណោមពលរដ្ឋ២នាក់ដែលទើបត្រឡប់មកពីប្រទេសថៃនោះ មានម្នាក់មានអាសយដ្ឋាននៅភូមិសង្កែ ឃុំស្នួល ស្រុកក្រឡាញ់ និងម្នាក់ទៀតមានអាសយដ្ឋាននៅភូមិព្រលិត ឃុំរើល ស្រុកពួក។ ចំណែកអ្នកវិជ្ជមានកូវីដ-១៩ ម្នាក់ទៀត ជាពលរដ្ឋរស់នៅ ភូមិឈើទាល ឃុំកំពង់ចិនត្បូង ស្រុកស្ទោង ខេត្តកំពង់ធំ។ ជាមួយគ្នានេះ ក៏អ្នកជំងឺម្នាក់បានជាសះស្បើយផងដែរ ដែលជាស្ត្រីវ័យ ២៨ឆ្នាំ មានអាសយដ្ឋាននៅភូមិវិហារចិន សង្កាត់ស្វាយដង្គំ ក្រុងសៀមរាប។ គិតត្រឹមថ្ងៃទី៣១ ឧសភា ខេត្តសៀមរាប មានអ្នកវិជ្ជមានជំងឺកូវីដ-១៩ ចំនួន១២១នាក់ បានព្យាបាលជាសះស្បើយចំនួន៦៧នាក់ ស្លាប់២នាក់ និង ៥៣នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប។
ពោធិ៍សាត់៖ រកឃើញ២នាក់ទៀត និងមានអ្នកជំងឺ២នាក់បានជាសះស្បើយ
មនុស្ស ២នាក់ មានតេស្តវិជ្ជមានកូវីដ-១៩ ដែលអ្នកទាំង២ ធ្លាប់ប៉ះពាល់នឹងករណីវិជ្ជមានកន្លងមក។ តាមរបាយការណ៍របស់មន្ទីរសុខាភិបាលខេត្តពោធិ៍សាត់ នៅថ្ងៃទី៣១ ឧសភា ក៏មានអ្នកជំងឺចំនួន ២នាក់ទៀតបានជាសះស្បើយផងដែរ។ បច្ចុប្បន្នខេត្តពោធិ៍សាត់ មានករណីវិជ្ជមានកូវីដ-១៩ ចំនួន១១៥នាក់ ក្នុងនោះ ៥៧នាក់បានជាសះស្បើយ ១នាក់ស្លាប់ និង ៥៧នាក់កំពុងបន្តព្យាបាល។
កំពង់ធំ៖ មាន២នាក់ទៀត ជាអ្នកដំណើរពីរាជធានីភ្នំពេញ
ខេត្តកំពង់ធំ រកឃើញមនុស្ស២នាក់ទៀត វិជ្ជមានកូវីដ-១៩ នៅថ្ងៃទី៣១ ខែឧសភា ដែលសុទ្ធតែជាអ្នកទើបត្រឡប់ពីរាជធានីភ្នំពេញ។ តាមសេចក្តីប្រកាសព័ត៌មានរបស់រដ្ឋបាលខេត្ត អ្នកវិជ្ជមាន១នាក់ មានអាសយដ្ឋាននៅភូមិអាត់ស៊ូ ឃុំសំបូរណ៍ ស្រុកប្រាសាទសំបូរ និង១នាក់ទៀតរស់នៅភូមិដារ ឃុំទ្រៀល ស្រុកតាំងគោក ខេត្តកំពង់ធំ។ ត្រឹមថ្ងៃទី៣១ ខែឧសភា ខេត្តកំពង់ធំ រកឃើញអ្នកវិជ្ជមានកូវីដ-១៩ សរុប២៦៥នាក់ ក្នុងនោះ១០០នាក់ បានជាសះស្បើយ ហើយអ្នកជំងឺ ១៦៥នាក់ទៀត កំពុងបន្តសម្រាកព្យាបាល។
ស្ទឹងត្រែង៖ មាន២នាក់ ជាប្តីប្រពន្ធនឹងគ្នា
ករណីវិជ្ជមានកូវីដ-១៩ចំនួន ២នាក់បន្ថែមទៀត នៅក្នុងខេត្តស្ទឹងត្រែង គឺជាប្តីប្រពន្ធមួយគូ ដែលមានអាសយដ្ឋាននៅភូមិស្រែលិច ឃុំកញ្ច្រៀច ស្រុកកញ្ច្រៀច ខេត្តព្រៃវែង។
កោះកុង៖ បន្តរកឃើញ១នាក់ទៀត
រដ្ឋបាលខេត្តកោះកុង បានរកឃើញមនុស្ស១នាក់ទៀត ឆ្លងកូវីដ-១៩ នៅថ្ងៃទី៣១ ឧសភា។ បើតាមសេចក្តីប្រកាសព័ត៌មារបស់រដ្ឋបាលខេត្តអ្នកជំងឺរូបនេះ ជាស្ត្រីវ័យ ២៨ឆ្នាំ មានអាសយដ្ឋានភូមិចំការក្រោម ឃុំស្រែអំបិល ស្រុកស្រែអំបិល។
ព្រះវិហារ៖ មាន១ករណី ដែលធ្វើឱ្យអ្នកឆ្លងសរុប ៧នាក់
រដ្ឋបាលខេត្តព្រះវិហា របានរកឃើញអ្នកវិជ្ជមានកូវីដ-១៩ចំនួន១នាក់ទៀត នៅថ្ងៃទី៣១ ឧសភា ជាបុរសវ័យ ២២ឆ្នាំ ដែលមានអាសយដ្ឋាននៅភូមិស្រអែមជើង ឃុំស្រអែម ស្រុកជាំក្សាន្ត។ មកទល់ពេលនេះ ខេត្តព្រះវិហារ មានអ្នកឆ្លងកូវីដ-១៩ ចំនួន៧នាក់ ក្នុងនោះ៣នាក់ជាសះស្បើយ និង៤នាក់ទៀតកំពុងបន្តសម្រាកព្យាបាល។
រតនគិរី៖ មានឆ្លងថ្មី១នាក់ និង៥នាក់ជាសះស្បើយ
ករណីវិជ្ជមានកូវីដ-១៩ ចំនួន ១នាក់នៅរតនគិរី នៅថ្ងៃទី៣១ ឧសភា គឺជាស្ត្រីវ័យ ៣៨ឆ្នាំ ដែលជាពលករទើបត្រឡប់មកពីប្រទេសថៃ។ តាមសេចក្តីប្រកាសព៧ត៌មានរបស់រដ្ឋបាលខេត្ត នៅថ្ងៃទី៣១ ឧសភា ក៏មានអ្នកជំងឺ ៥នាក់បានជាសះស្បើយផងដែរ។ បច្ចុប្បន្ន ខេត្តរតនគិរីរកឃើញអ្នកវិជ្ជមានកូវីដ-១៩ សរុប ១៥នាក់ ក្នុងនោះ៥នាក់ជាសះស្បើយ ខណៈ១០នាក់ទៀត កំពុងសម្រាកព្យាបាល។
គិតមកដល់ពេលនេះ កម្ពុជាមានអ្នកឆ្លងសរុប ៣០៧១០នាក់ ក្នុងនោះករណីនាំចូលសរុបមាន ៩៣១នាក់។ អ្នកជាសះស្បើយ ២៣៣៨៩នាក់ ខណៈអ្នកស្លាប់ កើនដល់ ២២០នាក់៕
© រក្សាសិទ្ធិដោយ thmeythmey.com
