បើតាមការចុះផ្សាយរបស់ទីភ្នាក់ងារព័ត៌មាន AFP នៅថ្ងៃទី៣ ខែមិថុនា ក្នុងចំណោមអ្នកធ្វើការងារស្ម័គ្រចិត្ត៨ម៉ឺននាក់ មាន១ម៉ឺននាក់បានលាឈប់ពីការងារក្នុងកីឡាអូឡាំពិកនៅពាក់កណ្តាលទី។
 

លោក Toshiro Muto ប្រធានកីឡាក្រុងតូក្យូឆ្នាំ ២០២០ ដឹងច្បាស់ថាអ្នកស្ម័គ្រចិត្តដែលជាបុគ្គលិកសំខាន់ក្នុងដំណើរការកីឡាបានលាឈប់ ក៏ព្រោះពួកគេខ្លាចរអា និងបារម្ភអំពីការចម្លងជំងឺដ៏កាចសាហាវទៅលើពួកគេ។
 

ប្រធានអ្នករៀបចំកីឡារដូវក្តៅដ៏ធំមួយនេះ លោកស្រី Seiko Hashimoto នៅតែបន្តជំហរបស់ខ្លួនក្នុងការដំណើរការព្រឹត្តិការណ៍កីឡានេះ ទោះបាត់បង់ក្រុមការងារស្ម័គ្រចិត្តមួយចំនួន និងមិនមានការគាំទ្រពីសំណាក់ប្រជាពលរដ្ឋជប៉ុនក្តី។ បន្ថែមពីនេះលោកស្រី Hashimoto បានប្រាប់កាសែតក្នុងស្រុកថា កីឡាលំដាប់ពិភពលោកត្រូវលុបចោលលុះត្រាណាជំងឺរាតត្បាតអុកលុកខ្លាំងដែលធ្វើឱ្យអត្តពលិក និងគណៈប្រតិភូភាគច្រើនមិនអាចទៅជប៉ុនបាន។
 

ស្របពេលយុទ្ធនាការប្រកួតប្រជែងនឹងចូលមកដល់នៅរយៈពេល៥០ថ្ងៃទៀត ការស្ទង់មតិជាច្រើនបង្ហាញថា ប្រជាជនជប៉ុនភាគច្រើន នៅតែចង់ឱ្យព្រឹត្តិការណ៍ដែលពន្យារម្តងរួចមកហើយនេះ ពន្យារបន្ថែមទៀត ឬលុបចោលតែម្តង។
 

រហូតមកទល់ពេលនេះ ជប៉ុនកំពុងបន្តប្រយុទ្ធប្រឆាំងនឹងការឆ្លងកូវីដ-១៩ បំប្លែងថ្មី ដែលធ្វើឱ្យក្រុងតូក្យូ និងក្រុងដទៃទៀតស្ថិតក្នុងភាពអាសន្ន ខណៈដែលសមាគមគ្រូពេទ្យដ៏ធំមួយនៅជប៉ុន ក៏បន្តអំពាវនាវឱ្យលុបចោលការប្រកួតកីឡាអូឡាំពិកក្រុងតូក្យូឆ្នាំ២០២០។ 
 

បើទោះដូច្នេះក្តី ទាំងរដ្ឋាភិបាលជប៉ុន និងមន្ត្រីរៀបចំអូឡាំពិក សន្យាថាការប្រកួតកីឡាលំដាប់ពិភពលោករដូវក្តៅ នឹងបន្តដំណើរការទៅមុខតាមការគ្រោងទុកនៅថ្ងៃទី២៣ ខែកក្កដា។ គិតត្រឹមថ្ងៃទី៣ ខែមិថុនា មានអត្តពលិកអូស្ត្រាលីមួយចំនួនបានទៅដល់ជប៉ុនហើយ ដើម្បីត្រៀមប្រជែងមេដាយ៕