លោក កឹម ណៃវិរៈខេមរា អភិបាលរងខណ្ឌបឹងកេងកង បានបញ្ជាក់ថា អាជ្ញាធររកឃើញមនុស្សចំនួន ១ ២១១នាក់ហើយ ដែលជាអ្នកប៉ះពាល់ផ្ទាល់ និងប្រយោលជាមួយនឹងអ្នកជំងឺជិត២៧០នាក់នោះ ដែលត្រូវបានក្រុមគ្រូពេទ្យយកសំណាករកជំងឺកូវីដ-១៩ និងតម្រូវឲ្យធ្វើចត្តាឡីស័ក នៅតាមផ្ទះរបស់ពួកគេរៀងៗខ្លួន។  

 

បើតាមលោកអភិបាលរងខណ្ឌបឹងកេងកង អ្នកជំងឺទាំងនោះ ត្រូវបានក្រុមគ្រូពេទ្យបញ្ជូនទៅព្យាបាល នៅមណ្ឌលព្យាបាលជំងឺកូវីដ-១៩កោះពេជ្រ និងមណ្ឌលព្យាបាលជំងឺកូវីដ-១៩ ដឹព្រីមៀរសែនសុខ។ 

 អាជីវករផ្សារបឹងកេងកងជាច្រើននាក់កំពុងត្រូវបានក្រុមគ្រូពេទ្យយកសំណាករកជំងឺកូវីដ-១៩ រូបភាពពីរដ្ឋបាលខណ្ឌបឹងកេងកង
 

លោកអភិបាលរងខណ្ឌបឹងកេងកង បានអះអាងថា មូលហេតុដែលបណ្តាលឲ្យមានការឆ្លងរាលដាលជំងឺកូវីដ-១៩ នៅក្នុងផ្សារបឹងកេងកងនេះ គឺដំបូងឡើយមានអាជីវករ៤នាក់មានរោគសញ្ញាដែលសង្ស័យឆ្លងជំងឺកូវីដ-១៩ ទើបពួកគេទៅធ្វើតេស្តដោយលទ្ធផលគឺវិជ្ជមានកូវីដ-១៩។ ក្រោយមកក៏មានអ្នកឆ្លងជាបន្តបន្ទាប់ទៀត។  

 

លោក ឯក និមល ប្រធានគណៈកម្មការផ្សារបឹងកេងកងបានបញ្ជាក់ថា អាជីវករសរុបនៅក្នុងផ្សារបឹងកេងកងមានជាង១១០០នាក់។

 

កាលពីថ្ងៃទី២៨ ខែមិថុនា លោក ឃួង ស្រេង អភិបាលរាជធានីភ្នំពេញ បានសម្រេចបិទផ្សារបឹងកេងកងនេះរយៈពេល១៤ថ្ងៃសិន គឺចាប់ពីថ្ងៃទី២៨ ខែមិថុនា ដល់ថ្ងៃទី១២ ខែកក្កដា ឆ្នាំ២០២១ ដើម្បីទប់ស្កាត់ការរាលដាលជំងឺកូវីដ-១៩។ 
 

 : 
 

កម្ពុជាមានអ្នកឆ្លងកូវីដ-១៩ សរុប ៥០៣៨៥ នាក់ ក្នុងនោះ ២ ៥៤៨នាក់ករណីនាំចូល។ អ្នកជាសះស្បើយមានចំនួន ៤៤ ១៤៣នាក់ និងស្លាប់សរុប ៦០២នាក់៕