លោក ឃួង ស្រេង បានបញ្ជាក់នៅក្នុងសេចក្តីប្រកាសព័ត៌មានរបស់ខ្លួនថា ការបិទផ្សារនេះ ដើម្បីទប់ស្កាត់ការរាលដាលជំងឺកូវីដ-១៩។ 

 

លោកអភិបាលរាជធានីភ្នំពេញ បានអំពាវនាវដល់អាជីវករ ឬអ្នកពាក់ព័ន្ធនឹងអ្នកជំងឺកូវីដ-១៩ រួសរានទៅធ្វើតេស្តជាបន្ទាន់ និងត្រូវធ្វើចត្តាឡីស័កនៅតាមផ្ទះរៀងខ្លួនឲ្យបានខ្ជាប់ខ្ជួន។ 

 

គិតត្រឹមថ្ងៃទី២ ខែកក្កដា នេះមានអាជីវករ និងសន្តិសុខផ្សារអូឡាំពិកចំនួន១៨នាក់ហើយ ដែលបានឆ្លងជំងឺកូវីដ-១៩។ ជាមួយគ្នានោះ អាជ្ញាធរតម្រូវឲ្យអាជីវករ និងអ្នកពាក់ព័ន្ធចំនួន៣០០០នាក់ទៅធ្វើតេស្តនៅវិទ្យាល័យទួលស្វាយព្រៃ និងចត្តាឡីស័ក១៤ថ្ងៃ។ 

 

បើតាមលោក ឡយ ស៊ាងអាង ប្រធានគណៈកម្មាការគ្រប់គ្រងផ្សារអូឡាំពិក បើអាជីវករទាំងនោះមិនព្រមទៅធ្វើតេស្តទេ ពួកគេនឹងមិនអាចចូលលក់ក្នុងផ្សារវិញឡើយ នៅពេលដែលផ្សារបើកដំណើរការជាថ្មី។