ភ្នំពេញ៖ ប្រព័ន្ធឌីជីថលជាមធ្យោបាយតែមួយគត់ សម្រាប់ឲ្យសិស្សបន្តការសិក្សា ក្នុងបរិបទកូវីដ-១៩។ តែយ៉ាងណាកម្រិតចំណេះដឹង ដែលសិស្សទទួលបានក្នុងបរិបទកូវីដ-១៩នេះគឺមិនស្មើគ្នាឡើយ។ ការសិក្សាបែបថ្មីនេះ ចាប់ពីសិស្សកម្រិតវិទ្យាល័យឡើងទៅ គឺអាចចាប់បាន និងទទួលបានចំណេះដឹងច្រើន។ ចំណែកការសិក្សារបស់សិស្សមតេ្តយ្យ និងបឋម គឺមិនទាន់មានគុណភាពនៅឡើយទេ។ ជុំវិញការសិក្សារបស់កុមារតូច នៅក្នុងបរិបទកូវីដ-១៩ អ្នកជំនាញ អះអាងថា ក្រៅពីគ្រូបង្រៀន ឪពុកម្តាយ ឬអាណាព្យាបាល គឺជាតួអង្គដ៏សំខាន់បំផុត នៅក្នុងការជំរុញការសិក្សាតាមអនឡាញរបស់កូនតូច។ ការព្រងើយ កន្តើយរបស់ឪពុកម្តាយ នឹងជះផលអវិជ្ជមានដល់គុណភាពអប់រំរបស់កុមារ។ យ៉ាងណាក៏ដោយ សម្រាប់អ្នកជំនាញ គេមិនអាចបន្ទោសឪពុកម្តាយ ឬអាណាព្យាបាលទាំងស្រុងដែរ ព្រោះកត្តាជីវភាព ចំណេះដឹង និងប្រព័ន្ធអ៊ីនធឺណិត ពិសេសនៅជនបទដាច់ស្រយាល ក៏បានរារាំងដល់ការអប់រំទាំ ងមនុស្ស និងកុមារៗដែរ។
ដោយសារការរីករាលដាលនៃជំងឺកូវីដ-១៩នៅក្នុងសហគមន៍ ក្រសួងអប់រំ យុវជន និងកីឡា បានសម្រេចបិទសាលារៀនរដ្ឋ និងឯកជនគ្រប់កម្រិត ម្តងជាពីរដង។ ការអាក់ខានសិក្សារបស់សិស្សានុសិស្ស នៅក្នុងថ្នាក់រៀន លើកចុងក្រោយនេះ គឺចាប់តាំងពី២០ មីនា ឆ្នាំ២០២១មក។ សិស្សទាំងអស់ ត្រូវបន្តការតាមប្រព័ន្ធអនឡាញ។ ប៉ុន្តែសិស្សទាំងអស់ មិនមានលទ្ធភាព និងឱកាសស្មើគ្នានោះទេ ក្នុងការទទួលបានការអប់រំនោះទេ នៅក្នុងបរិបទកូវីដ-១៩នេះ។
សិស្សដែលមានជីវភាពធូរធារ អាចទទួលបានការសិក្សាពេញលេញ ឬឆកល្វែងតិចតួច តែសម្រាប់សិស្សនៅតាមទីជនបទ និងតំបន់ដាច់ស្រយាល ពួកគេមិនមានលទ្ធភាពរៀនគ្រប់គ្នានោះទេ។ បញ្ហាជីវភាព ចំណេះដឹងអំពីបច្ចេកវិទ្យា ឬកម្រិតចំណេះដឹងទូទៅរបស់ឪពុកម្តាយ រួមទាំងប្រព័ន្ធអ៊ីនធឺណិតរអាក់រអួល ក៏បានបង្អាក់ការទទួលបានការអប់រំ របស់សិស្សទាំងតូច ទាំងធំដែរ។
ជុំវិញការសិក្សាតាមបច្ចេកវិទ្យានេះ គឺផ្តល់ផលវិជ្ជមានច្រើន សម្រាប់សិស្សវិទ្យាល័យ និងនិស្សិត ព្រោះពួកគេមួយចំនួនធំ មានទូរសព្ទ ឬកុំព្យូទ័រផ្ទាល់ខ្លួន ដែលងាយសម្រាប់រៀនតាមអនឡាញ។ ម្យ៉ាងទៀតពួកគេក៏មានឯករាជ្យច្រើន ចេះគ្រប់គ្រង និងស្វ័យសិក្សាខ្លួនឯង ដោយមិនចាំបាច់ មានការចាំតម្រង់ទិសពីគ្រូ ឬឪពុកម្តាយឡើយ។
កញ្ញា សឿន និត្តា ជានិស្សិតនៅសាលកវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានប្រាប់សារព័ត៌មានថ្មីៗថា ក្នុងបរិបទកូវីដ-១៩នេះ នាងអាចផ្តោតលើការសិក្សា បាន ច្រើនជាងពេលរៀននៅក្នុងថ្នាក់ទៅទៀត។ និស្សិតផ្នែកច្បាប់រូបនេះអះអាងថា ខ្លួនមិនត្រឹមតែអាចបន្តរៀនជាមួយគ្រូ តាមអនឡាញប៉ុណ្ណោះទេ ប៉ុន្តែថែមទាំងមានទទួលបានចំណេះដឹងថ្មីៗពីអ៊ីនធឺណិត និងពិសេសពីសិក្ខាសាលាផ្សេងៗដែលរៀបចំតាមអនឡាញ។ សម្រាប់ និត្តា ការចូលរួមសិក្ខាសាលានានា ក៏ផ្តល់ឱកាសដល់នាង បានបង្កើនទំនាក់ទំនងជាមួយមនុស្សថ្មីៗ និងបានរៀនសូត្រពីបទពិសោធជីវិតបន្ថែមផងដែឬ ដែលចំណេះដឹងទាំងនេះ មិនមានបង្រៀននៅក្នុងសាលានោះទេ។
កញ្ញា សឿន និត្តា ជានិស្សិតនៅសាលកវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច
មិនខុសគ្នាដែរ យុវសិស្ស រឹម គុណវឌ្ឍន៍ ដែលសិក្សារថ្នាក់ទី១២ នៅវិទ្យាល័យចំណេះដឹងទូទៅនិងបច្ចេកទេស សម្តេច ហ៊ុន សែន ROTA ខ្សាច់កណ្តាល ខេត្តកណ្តាល បានឱ្យសារព័ត៌មានថ្មីៗដឹងថា រូបគេមិនដែលខកខានការសិក្សាតាមប្រព័ន្ធអនឡាញម្តងណាឡើយ តាំងពីបិទសាលារៀនមក។ ដ្បិតតែពេលខ្លះសេវាអ៊ីនធឺណិតរអាក់រអួល រំខានដល់ការសិក្សាបន្តិចក្តី ប៉ុន្តែយុវសិស្សវ័យ ១៦ឆ្នាំរូបនេះ នៅតែអត់ធ្មត់ក្នុងការសិក្សា ព្រោះថាវាជាមធ្យោបាយតែមួយគត់ ដែលរូបគេអាចពង្រឹងចំណេះ សម្រាប់ការប្រឡងបាក់ឌុប នៅថ្ងៃខាងមុខ ក្នុងបរិបទកូវីដ-១៩នេះ។
យុវសិស្ស រឹម គុណវឌ្ឍន៍ ជាសិស្សថ្នាក់ទី១២ នៅវិទ្យាល័យចំណេះដឹងទូទៅនិងបច្ចេកទេស សម្តេច ហ៊ុន សែន ROTA ខ្សាច់កណ្តាល ខេត្តកណ្តាល
យុវសិស្ស រឹម គុណវឌ្ឍន៍ បានរៀបរាប់ដូច្នេះ៖«ការរៀនតាមអនឡាញ ខ្ញុំទទួលបានចំណេះដឹងជាច្រើន តាមលំដាប់លំដោយ ទៅតាមមេរៀនដែលគ្រូបង្រៀន និងដាក់ឲ្យ។ ជាពិសេសលើមុខវិជ្ជា ដែលខ្ញុំរៀននៅផ្នែកវិទ្យាសាស្ត្រ»។ សិស្សថ្នាក់ទី១២រូបនេះ បានប្តេជ្ញាថារូបគេ នឹងខិតខំក្រេបយកចំណេះដឹងពីគ្រូដែលបង្រៀនតាមអនឡាញផង ពីកម្មវិធីសិក្សាផ្សេងៗរបស់ក្រសួងអប់រំ និងស្វ័យសិក្សានៅផ្ទះដោយខ្លួនឯងបន្ថែមទៀត។
កុមារតូចជាច្រើន រៀនមិនបានពេញលេញ ដោយសារកត្តាជីវភាព និងអ៊ីនធឺណិត
ជាការពិតណាស់ សិស្សវិទ្យាល័យ និងនិស្សិត ពួកគេងាយនឹងសម្របខ្លួនបានលឿន ក្នុងរបៀបសិក្សាបែបថ្មីនេះ ផ្ទុយពីសិស្សតូចៗ ដែលទាមទារឱ្យមានការគាំទ្រខ្លាំងក្លាពីឪពុកម្តាយ ឬអាណាព្យាបាល ទើបពួកគេអាចបន្តសិក្សាបាន។ ក្មេងតូចៗ ខ្វះទាំងចំណេះដឹងផ្នែកបច្ចេកវិទ្យា ព្រមទាំងការគ្រប់គ្រងការរៀនសូត្ររបស់ពួកគេដោយខ្លួនឯងផង។ លើសពីនេះទៀត កុមារនៅជនបទខ្លះ មិនបានរៀនសូត្រ ក្នុងអំឡុងពេលបិទសាលារៀននេះ ដោយសារបញ្ហាជីវភាព មិនមានឧបករណ៍សម្រាប់រៀន បញ្ហាអ៊ីនធឺណិត ឬមិនមានមនុស្សធំនៅចាំគាំទ្រក្នុងអំឡុងម៉ោងរៀនជាដើម។
អ្នកស្រី ហុង ស្រីនាង ជាមួយនឹងកូនប្រុសស្រី២នាក់
អ្នកស្រី ហុង ស្រីនាង ដែលមានកូនតូចៗ២នាក់ បានប្រាប់សារព័ត៌មានថ្មីៗថា កូនទាំង២នាក់របស់ខ្លួន មិនសូវបានរៀនដិតដល់នោះទេក្នុងរយៈពេលកន្លះឆ្នាំចុងក្រោយនេះ។ ជាអ្នកលក់កាហ្វេនៅផ្សារដើមរការ ខេត្តកំពង់ស្ពឺអ្នកស្រី ហុង ស្រីនាង បន្តថាដ្បិតតែសាលារៀនមានកម្មវិធីបង្រៀនតាមអនឡាញក្តី ប៉ុន្តែកូនរបស់គាត់មិនមានទម្លាប់រៀនតាមអនឡាញឡើយ ខណៈដែលខ្លួនក៏រវល់លក់ដូរ។ អ្នកម្តាយរូបនេះ ក៏មិនមានលទ្ធភាពច្រើនក្នុងការបង្រៀនកូនបន្ថែមដែរ ព្រោះគាត់ក៏មានចំណេះដឹងទាប។ អ្នកមា្តយវ័យ៣០ឆ្នាំរូបនេះ បានត្រឹមតែដាស់តឿនកូនៗឲ្យរំលឹកមេរៀនបន្ថែមប៉ុណ្ណោះ។ អ្នកស្រី ហុង ស្រីនាង បន្តទាំងព្រួយចិត្តថា៖«រាល់ថ្ងៃនេះ ខ្ញុំបារម្ភពីការរៀនសូត្ររបស់កូនខ្ញុំ។ កូនខ្ញុំរៀងភ្លេចការសិក្សាជាងមុន ពីព្រោះខ្ញុំអត់សូវចេះ ហើយបើប្តីខ្ញុំ គឺអត់ចេះដែរ។ ខ្ញុំរៀនត្រឹមតែថ្នាក់ទី៤ បើកូនខ្ញុំមកសួររឿង ក ខ អី គឺខ្ញុំអាចបង្រៀនគាត់បាន ប៉ុន្តែបើសួររឿងបូកលេខ និងចែកលេខ គឺខ្ញុំក៏មិនចេះដែរ»។
អ្នកម្តាយមួយរូបទៀតនៅខេត្តកំពង់ចាម គឺអ្នកស្រី អាន សុយ៉េង ក៏អះអាងថាក្នុងអំឡុងពេលបិទសាលារៀននេះ ខ្លួនពុំសូវមានពេលវេលាបង្រៀនកូនរបស់ខ្លួន ដែលកំពុងរៀនថ្នាក់ទី១ឡើយ ដោយសារតែមមាញឹកនឹងការធ្វើស្រែចំការ។ យ៉ាងណាក៏ដោយ អ្នកស្រី សុយ៉េង នៅតែខិតខំឆ្លៀតពេលបង្រៀនកូនបានខ្លះដែរ ដោយមិនបណ្តោយឲ្យកូន ភ្លេចការសិក្សាឡើយ។
មិនមែនតែឪពុកម្តាយទេ ដែលខ្វល់ខ្វាយការសិក្សារបស់ក្មេងៗតូចៗ លោកហឿន រតនា ដែលជាគ្រូបង្រៀនសិស្សថ្នាក់ទី៤ នៃសាលាបឋមសិក្សាកោះតាភេម ខេត្តកំពង់ចាម ក៏ព្រួយចិត្តណាស់ដែរ។ លោកគ្រូ រតនា បានឱ្យសារព័ត៌មានថ្មីៗដឹងថា ក្មេងមួយចំនួន មិនបានរៀនតាមអនឡាញឡើយ និងខ្លះរៀនមិនទៀងទាត់ ដោយសារឪពុកម្តាយក្រីក្រ គ្មានលទ្ធភាពទិញទូរសព្ទឲ្យរៀន ហើយឪពុកម្តាយខ្លះមិនអាចបង្រៀនកូនបាន ដោយសារកម្រិតចំណេះទាប។ កម្សោយផ្នែកបច្ចេកវិទ្យា ក៏រួមចំណែកដល់ការអាក់ខានសិក្សារបស់សិស្សដែរ។ ក្មេងខ្លះ ត្រូវបានឪពុកម្តាយបង្ខំឲ្យឈប់រៀន ដើម្បីជួយធ្វើកិច្ចការងាររកប្រាក់ចិញ្ចឹមជីវិត។
លោកហឿន រតនា ជាគ្រូបង្រៀនសិស្សថ្នាក់ទី៤ នៃសាលាបឋមសិក្សាកោះតាភេម ខេត្តកំពង់ចាម
លោកគ្រូ ហឿន រតនា បញ្ជាក់បន្ថែមពីកម្រិតចំណេះដឹងរបស់សិស្សខ្លួនយ៉ាងដូច្នេះ៖«កូនសិស្សខ្ញុំ អាចទទួលបានចំណេះដឹងត្រឹមតែ៦០ភាគរយ។ ឪពុកម្តាយខ្លះ គាត់បានដាស់តឿន និងណែនាំកូនរៀន គឺក្មេងអាចចាំមេរៀនបានច្រើន។ ហើយឪពុកម្តាយខ្លះទៀតដែលនៅតំបន់ខាងខ្ញុំនេះ គឺសម្បូរអ្នកចំណាកស្រុក ដូច្នេះភាគច្រើន ឪពុកម្តាយទុកកូននៅជាមួយយាយតា។ ដោយពួកគាត់គឺសុទ្ធតែចាស់ៗ ពិបាកបង្រៀន និងចំណេះដឹងគាត់ទាបដែរ អ៊ីចឹងមិនដឹងថាត្រូវបង្រៀនចៅ របៀបម៉េចទេ»។
ការអប់រំកុមារតូចក្នុងបរិបទកូវីដ-១៩ ទាមទារការយកចិត្តទុកដាក់ខ្ពស់ពីឪពុកម្តាយ
ជុំវិញបញ្ហានេះ លោក ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា មើលឃើញថា សិស្សវិទ្យាល័យ និងនិស្សិត ងាយនឹងសម្របខ្លួនក្នុងរបៀបសិក្សាបែបថ្មីនេះ ល្អប្រសើរជាសិស្សតូចៗ។ លោក ឈត ប៊ុនថង កត់សម្គាល់ថា សិស្សថ្នាក់ឧត្តមសិក្សា និងក្រោយឧត្តមសិក្សា គឺពួកគេថមថយការសិក្សាក្នុងកម្រិតតិចតួច ប៉ុន្តែចំពោះគុណភាពការសិក្សារបស់ក្មេងៗវិញ គឺមិនទាន់ល្អប្រសើរនៅឡើយទេ។ ដើម្បីឱ្យការសិក្សារបស់ក្មេងៗទទួលបានលទ្ធផលល្អ និងមានគុណភាព ទាមទារចាំបាច់ការយកចិត្តទុកដាក់ពីឪពុកម្តាយ និងអាណាព្យាបាល។ នេះជាការបន្ថែមរបស់ លោក ឈត ប៊ុនថង។
លោក ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា
លោក ប៉ា ច័ន្ទរឿន នាយកប្រតិបត្តិវិទ្យាស្ថានប្រជាធិបតេយ្យកម្ពុជា ក៏បានទទួលស្គាល់ដែរ ពីតួនាទីដ៏សំខាន់ និងចាំបាច់របស់ឪពុកម្តាយ ឬអាណាព្យាបាល ក្នុងការជំរុញការសិក្សាររបស់កុមារតូចៗតាមប្រព័ន្ធអនឡាញ ក្នុងបរិបទកូវីដ-១៩នេះ។ សម្រាប់លោក ប៉ា ច័ន្ទរឿន សិស្សតូចៗមិនទម្លាប់រៀនតាមអនឡាញ ដូចសិស្សធំៗឡើយ ដែលទាមទារឱ្យមានការយកចិត្តទុកដាក់ និងណែនាំច្រើនពីឪពុកម្តាយ និងអាណាព្យាបាល។ បើពុំដូច្នេះ ប្រាដកណាស់ថាគុណភាពអប់រំកុមារតូច ធ្លាក់ចុះជាងមុន។ លោក ប៉ា ច័ន្ទរឿន បញ្ជាក់ដូច្នេះ«ក្មេងចូលចិត្តលេង។ នៅពេលដែលពួកគេអង្គុយមើលគ្រូបង្រៀនតាមអេក្រង់ទូរសព្ទ ឬកុំព្យូទ័រគឺអាចឲ្យក្មេងធុញ។ ពេលគាត់ធុញទៅ គ្រូមានលទ្ធភាពអ្វីនឹងធ្វើសកម្មភាព និងបំផុសឲ្យក្មេងទាក់ទាញ និងឲ្យក្មេងផ្តោតអារម្មណ៍រៀនវិញទេ។ ពេលខ្លះគាត់អាចនឹងបើកទូរសព្ទលេងហ្គេម»។
លោក ប៉ា ច័ន្ទរឿន នាយកប្រតិបត្តិវិទ្យាស្ថានប្រជាធិបតេយ្យកម្ពុជា
ទាក់នឹងបញ្ហាអ៊ីនធឺណិត និងកង្វះសម្ភារ និងឧបករណ៍សម្រាប់សិក្សាក្នុងបរិបទកូវីដ-១៩វិញ នាយកប្រតិបត្តិវិទ្យាស្ថានប្រជាធិបតេយ្យកម្ពុជា បានស្នើឱ្យក្រសួងអប់រំ គួរសហការជាមួយវិស័យអប់រំឯកជន ពង្រឹង និងបង្កើនប្រសិទ្ធភាព ប្រព័ន្ធអ៊ីនធឺណិតទាំងនៅទីក្រុង និងនៅតាមបណ្តាខេត្ត ដើម្បីផ្តល់ភាពងាយស្រួលក្នុងការរៀន និងបង្រៀនតាមអនឡាញ។
ជុំវិញបញ្ហានេះ លោក ឈត ប៊ុនថង ក៏ចង់ឱ្យភាគីពាក់ព័ន្ធបង្កើនការយកចិត្តទុកដាក់ និងផ្តល់ការជ្រោមជ្រែងបន្ថែម ចំពោះកុមារតូចៗនៅជនបទផងដែរ ពិសេសអ្នកដែលមានជីវភាពខ្វះខាត។
លោក រស់ សុវាចា អ្នកនំាពាក្យក្រសួងអប់រំ យុវជន និងកីឡាបានបញ្ជាក់ថា ក្នុងបរិបទកូវីដ-១៩ ក្រសួងអប់រំ បានរៀបចំផែនការ និងយុទ្ធសាស្ត្រយ៉ាងច្បាស់លាស់ ដើម្បីជំរុញឲ្យការសិក្សាពីចម្ងាយ ទាំងនៅទីប្រជុំជន និងជនបទ ប្រកបដោយគុណភាព និងប្រសិទ្ធភាព។ លោក រស់ សុវាចា បានអះអាងថាកន្លងមកក្រសួងអប់រំ បានបង្កើតវីដេអូ, រៀបចំឯកសារមេរៀនជាសន្លឹក សម្រាប់សិស្សដែលគ្មានឧបករណ៍អេឡិចត្រូនិកប្រើប្រាស់, បង្កើតកម្មវិធីសិក្សាតាមវិទ្យុ និងទូរទស្សន៍ និងការបង្រៀនតាមបណ្តុំតូចៗ។ អ្នកនាំពាក្យក្រសួងអប់រំ រៀបរាប់ដូច្នេះ៖«ថ្នាក់ដឹកនាំក្រសួង និងបុគ្គលិកអប់រំ គ្រប់លំដាប់ថ្នាក់ បានប្រឹងប្រែងយ៉ាង ស្រួចស្រាវបំផុត ដើម្បីបំពេញតម្រូវការសិក្សាឲ្យសិស្ស-និស្សិត បានបន្តរៀនសូត្រ តាមរយៈយន្តការសិក្សាពីចម្ងាយ និងតាមប្រព័ន្ធអេឡិចត្រូនិក ដែលផ្តល់សុវត្ថិភាព សុខភាពដល់អ្នកសិក្សា»។
សូមបញ្ជាក់ថា សាលារៀនគ្រប់កម្រិតថ្នាក់ទូទាំងប្រទេស ត្រូវបានផ្អាកដំណើរការតាំងពីថ្ងៃទី២០ ខែមីនា ឆ្នាំ២០២១ បន្ទាប់ពីមានព្រឹត្តិការណ៍សហគមន៍២០កុម្ភៈ៕