ភ្នំពេញ៖ វ៉ាក់សាំង Sinovac ៣លានដូសទៀត ដែលកម្ពុជា បានបញ្ជាទិញពីចិននោះ បានដឹកមកដល់ហើយ នៅព្រឹកថ្ងៃទី១២ សីហា។ សរុបទាំងវ៉ាក់សាំងនៅថ្ងៃនេះ កម្ពុជាមានជាង២៤លានដូសហើយ សម្រាប់ចាក់ឱ្យប្រជាពលរដ្ឋ។ រដ្ឋាភិបាល ក៏កំពុងចរចាទិញ AstraZeneca ពីប្រទេស៤ទៀត សម្រាប់ដូសទី៣ ឬដូសជំរុញ។

 

លោកស្រី យក់ សម្បត្តិ រដ្ឋលេខាធិការក្រសួងសុខាភិបាល ដែលបានទៅទទួលវ៉ាក់សាំងនៅព្រលានយន្តហោះអន្តរជាតិភ្នំពេញនោះ បានបញ្ជាក់ថា កម្ពុជា នឹងទទួលបានវ៉ាក់សាំង Sinovac ២លានដូសទៀតពីចិន តាមរយៈការបញ្ជាទិញ នៅសប្ដាហ៍ក្រោយនេះ ឬក៏ចុងខែសីហា។
 

បើតាមលោកស្រី សម្បត្តិ រដ្ឋាភិបាល ក៏កំពុងបញ្ជាឱ្យទូតប្រចាំប្រទេសជប៉ុន ឥណ្ឌា កូរ៉េខាងត្បូង និងអង់គ្លេស ចរចាទិញវ៉ាក់សាំង AstraZeneca សម្រាប់យុទ្ធនាការចាក់ដូសទី៣ និងដូសជំរុញ។ 
 

«រដ្ឋាភិបាលនឹងបញ្ជាទិញ (ពីប្រទេសទាំង៤នេះ) ។ យើងកំពុងធ្វើការងារនេះហើយ ហើយយើងរំពឹងថា ក្នុងសប្ដាហ៍នេះ ហើយសប្ដាហ៍ក្រោយ យើងនឹងបានទទួលដំណឹងពីស្ថានទូតរបស់ព្រះរាជណាចក្រកម្ពុជាយើង ប្រចាំប្រទេសទាំងនោះ»។ នេះបើតាមរដ្ឋលេខាធិការក្រសួងសុខាភិបាល ដែលបានថ្លែងប្រាប់អ្នកសារព័ត៌មានថា គណៈកម្មការចំពោះកិច្ចលើការងារចាក់វ៉ាក់សាំងនេះ មិនកំណត់ពីគម្រោងទិញ AstraZeneca ចំនួនប៉ុន្មានដូសនោះទេ ដោយរង់ចាំការសម្រេចពីនាយករដ្ឋមន្រ្តី ហ៊ុន សែន។


 

គិតមកដល់ពេលនេះ កម្ពុជា មានវ៉ាក់សាំងជាង២៤លានដូសហើយ សម្រាប់ចាក់ឱ្យពលរដ្ឋ។ ក្នុងនោះ Sinovac ជាង១៤,៥លានដូស , Sinopharm ៦,២លានដូស ដែលជាជំនួយ និងការបញ្ជាទិញពីចិន។ ក្រៅពីនេះ អាមេរិក ក៏បានផ្ដល់វ៉ាក់សាំង Jonhson &Jonhson ជាង១លានដូស តាមរយៈCOVAX។ រីឯជប៉ុនផ្ដល់វ៉ាក់សាំង AstraZeneca ១,៣ លានដូស ខណៈអង់គ្លេសផ្ដល់វ៉ាក់សាំងប្រភេទនេះឱ្យកម្ពុជា ចំនួន៤១ម៉ឺនដូសដែរ។ ចំណែកកម្មវិធី COVAX ក៏បានផ្ដល់វ៉ាក់សាំង AstraZeneca ចំនួន៣២៤,០០០ដូស។
 

ត្រឹមថ្ងៃទី១២ សីហានេះ ពលរដ្ឋកម្ពុជា ដែលមានអាយុចាប់ពី១៨ឆ្នាំឡើងទៅ បានចាក់វ៉ាក់សាំងជាង ៨,៥លាននាក់ហើយ ដែលស្មើ៨១,១៦ភាគរយ នៃផែនការចាក់វ៉ាក់សាំងលើមនុស្សយ៉ាងតិច១០លាននាក់។ ក្នុងនោះពលរដ្ឋជាង៦,៦លាននាក់ បានចាក់ដូសទី២ ខណៈពលរដ្ឋប្រមាណ១០ម៉ឺននាក់ទៀត បានចាក់ដូសទី៣។
 

ចំណែកកុមារចាប់ពីអាយុ១២ឆ្នាំ ដល់១៧ឆ្នាំវិញ បានចាក់វ៉ាក់សាំងបង្ការកូវីដ-១៩ ដូសទី១ ប្រមាណ៤០ម៉ឺននាក់ហើយ ដែលស្មើ២០,៥២ភាគរយ។ នេះបើតាមរបាយការណ៍ពីក្រសួងសុខាភិបាល និងក្រសួងការពារជាតិ។
 

ចំពោះវ៉ាក់សាំងប្រភេទ Jonhson &Jonhson របស់អាមេរិកវិញ រដ្ឋាភិបាលបានសម្រេចយកទៅចាក់ឱ្យប្រជាពលរដ្ឋជនជាតិដើមភាគតិចនៅតាមបណ្ដាលខេត្តនានា។ ចំណែកវ៉ាក់សាំងប្រភេទ AstraZeneca ត្រូវយកទៅចាក់ឱ្យពលរដ្ឋចាប់ពីអាយុ៦០ឆ្នាំឡើងទៅ នឹងត្រូវប្រើប្រាស់ក្នុងយុទ្ធនាការចាក់ដូសទី៣ និងដូសជំរុញ។
 

 
កាលពីសប្ដាហ៍មុន កម្ពុជា ត្រូវបានគេវាយតម្លៃថា ជាប្រទេសដែលមានភាគរយប្រជាជនចាក់វ៉ាក់សាំងបង្ការជំងឺកូវីដ-១៩ ច្រើនជាងគេនៅលើពិភពលោក។នេះបើតាមវេបសាយអន្តរជាតិមួយឈ្មោះ ourworldindata។
 

បច្ចុប្បន្ន កម្ពុជាមានអ្នកឆ្លងកូវីដ-១៩ សរុប ៨៣.៨៣៩នាក់ ក្នុងនោះ១២.៤៣៥នាក់ ជាករណីនាំចូល។ អ្នកជាសះស្បើយមាន ៧៨.៤៣១នាក់  និងស្លាប់សរុប១.៦៣៤នាក់៕