ជាតិ
សេដ្ឋកិច្ច
រ៉ែមាសកម្ពុជាជាង២០០គីឡូក្រាម កំពុងបន្សុទ្ធ និងដាក់លក់លើទីផ្សារអន្តរជាតិ លោក យស មុនីរ៉ាត់ អគ្គនាយកនៃអគ្គនាយកដ្ឋានធនធានរ៉ែ។ ប្រភពរូប៖ AKP
× ភ្នំពេញ៖ កម្ពុជា ចម្រាញ់រ៉ែមាសពីខេត្តមណ្ឌលគិរី បានចំនួន២១០គីឡូក្រាមហើយ។ នេះជាការលើកឡើងរបស់លោក យស មុនីរ៉ាត់ អ្នកនាំពាក្យក្រសួងរ៉ែ និងថាមពល ដោយបានបញ្ជាក់ថា រ៉ែមាសដែលចម្រាញ់បាននេះ កំពុងបន្សុទ្ធទៅជាដុំមាសកម្រិត៩៥ភាគរយ ហើយនឹងដាក់លក់នៅលើទីផ្សារប្រទេសអូស្រា្តលី។
គិតត្រឹមថ្ងៃទី១៧សីហានេះ កម្ពុជា តាមរយៈក្រុមហ៊ុន រ៉ឺនេសង់ មីនើរ៉ល (ខេមបូឌា) លីមីតធីត Renaissance Minerals (Cambodia) Limited របស់ប្រទេសអូស្ត្រាលី បានចម្រាញ់ ឬស្លមាស ពីតំបន់អូខ្វោវ ស្រុកកែវសីមា ខេត្តមណ្ឌលគិរី បាន២១០គីឡូក្រាម។ បើតាមលោក យស មុនីរ៉ាត់ ក្នុងចំណោមរ៉ែមាសទាំងនេះ គឺមានរ៉ែមាសជិត៦០គីឡូក្រាមហើយ ដែលកម្ពុជាបានបញ្ជូនទៅរោងចក្រក្នុងប្រទេសអូស្រា្តលី ដើម្បីបន្សុទ្ធទៅជាដុំមាស។
អគ្គនាយកនៃអគ្គនាយកដ្ឋានធនធានរ៉ែ និងជាអ្នកនាំពាក្យនៃក្រសួងរ៉ែ និងថាមពលរូបនេះ ប្រាប់សារព័ត៌មានThmeyThmey តាមទូរសព្ទដូច្នេះ៖« មកទល់ពេលនេះយើងស្ល[ចម្រាញ់]មាសបានជាង២១០គីឡូក្រាម ហើយភាពសុទ្ធនៃមាស មានចន្លោះពី៨៥ទៅ៩៥ភាគរយ។ យើងនាំចេញ[រ៉ែមាស]បានមួយលើកហើយ ប្រហែលជាង៥៩គីឡូក្រាម។ មាសដែលយើងបន្សុទ្ធបាននឹងដាក់លក់ទីផ្សារប្រទេសអូស្រា្តលីតែម្តង»។
លោក យស មុនីរ៉ាត់ បានបញ្ជក់បន្ថែមថា កម្ពុជានឹងនាំចេញរ៉ែមាស ប្រហែលជាង១០០គីឡូក្រាមទៀត នៅដំណាក់កាលទី២ ដើម្បីបន្សុទ្ធនិងដាក់លក់នៅលើទីផ្សារអន្តរជាតិ។ បើតាមលោក មុនីរ៉ាត់ មាសដែលលក់បាននោះ នឹងផ្តល់ចំណូលជាសួយសារអាករចំនួន៣ភាគរយ ចូលដល់ក្រសួងរ៉ែ ខណៈហាងឆេងមាសនៅទីផ្សារអន្តរជាតិបច្ចុប្បន្ន អាចប្រែប្រួលប្រចាំថៃ្ង ក្នុងតម្លៃ៥៨,០០០ដុល្លារ ក្នុងមួយគីឡូក្រាម។
សូមរម្លឹកថា ក្រុមហ៊ុន រ៉ឺនេសង់ មីនើរ៉ល (ខេមបូឌា) លីមីតធីតនេះ ត្រូវបានសម្តេច ហ៊ុន សែន អនុញ្ញាតឱ្យបើកការដ្ឋានអាជីវកម្មនិងរោងចក្រចម្រាញ់«រ៉ែមាស» ជាលក្ខណៈឧស្សាហកម្មលើកដំបូងរបស់កម្ពុជា នៅតំបន់អូខ្វោវ ស្រុកកែវសីមា ខេត្តមណ្ឌលគិរី នៅថ្ងៃទី២១មិថុនា ឆ្នាំ២០២១។
សម្តេច ហ៊ុន សែន ធ្លាប់បានបញ្ជាក់ថា តាមរយៈរោងចក្រចម្រាញ់រ៉ែមាសនេះ គឺអាចផលិតមាសសុទ្ធបានប្រមាណ៣តោនក្នុងមួយឆ្នាំ សម្រាប់រយៈពេល៨ឆ្នាំដំបូង។ ប្រមុខរដ្ឋាភិបាលរូបនេះ រំពឹងថា ការផលិតមាសជាលក្ខណៈឧស្សាហកម្មពីជម្រករ៉ែតំបន់អូខ្វោវ ស្រុកកែវសីមា ដោយក្រុមហ៊ុនRenaissance Mineralsនោះ នឹងផ្តល់ចំណូលដុលជាមធ្យមប្រមាណ១៨៥លានដុល្លារក្នុងមួយឆ្នាំ។ «ក្នុងចំណោមចំណូលដុលនោះ ចំណូលថវិកាជាតិពីសួយសារ និងសារពើពន្ធផ្សេងៗ ជាមធ្យមប្រមាណ៤០លានដុល្លារក្នុងមួយឆ្នាំ»។ សម្តេច ហ៊ុន សែន បានបន្តអះអាងថា ថវិកាទាំងនេះ នឹងត្រូវយកមកប្រើប្រាស់ក្នុងចរន្តថវិកាជាតិ ដើម្បីអភិវឌ្ឍសេដ្ឋកិច្ច និងសង្គម៕
រូបតំណាង៖ ការដ្ឋានអាជីវកម្មនិងរោងចក្រចម្រាញ់«រ៉ែមាស»របស់ក្រុមហ៊ុន រ៉ឺនេសង់ មីនើរ៉ល (ខេមបូឌា) នៅខេត្តមណ្ឌលគិរី
© រក្សាសិទ្ធិដោយ thmeythmey.com