ថ្ងៃទី៤ ខែតុលា គឺជាថ្ងៃដែលសភាទាំងពីរថ្នាក់ជប៉ុន បោះឆ្នោតរើសនាយករដ្ឋមន្រ្តីជប៉ុនថ្មី បន្ទាប់ពីលោក ស៊ូហ្កា យូស៊ីហ៊ីដេ បានប្រកាសមិនចូលរួមក្នុងការប្រកួតប្រជែងតំណែងប្រធានបក្សប្រជាធិបតេយ្យសេរី (LDP)។ 

 

«សភាជប៉ុន សូមតែងតាំងលោក ហ្វូមីអូ គីស៊ីដា ជានាយករដ្ឋមន្រ្តីជប៉ុន»។ លោក Tadamori Oshima ប្រធានសភាជាន់ទាប បានប្រកាសបែបនេះ បន្ទាប់ពីការបោះឆ្នោតក្នុងសភាទាំងពីរថ្នាក់។ ការក្លាយជានាយករដ្ឋមន្រ្តីរបស់លោក គីស៊ីដា គឺងាយបំផុត ដោយសារតែបក្សប្រជាធិបតេយ្យសេរី មានសំឡេងភាគច្រើននៅក្នុងសភាជប៉ុនរួចទៅហើយ។ 

 

បន្ទាប់ពីជាប់ជានាយករដ្ឋមន្រ្តីជប៉ុន លោក គីស៊ីដា មិនបាននិយាយអ្វីឡើយ ដោយគ្រាន់តែឱនគោរពដល់សមាជិកសភា ដើម្បីអរគុណ ដែលផ្តល់ទំនុកចិត្តដល់លោកធ្វើជាប្រមុខរដ្ឋាភិបាលប៉ុណ្ណោះ។ 

 

ក្នុងថ្ងៃដដែលនោះ លោក លោកស៊ូហ្កា យូស៊ីហ៊ីដេ បានប្រមូលពាក្យលាលែងរបស់សមាជិកគណៈរដ្ឋមន្រ្តីទាំងអស់ហើយ ប៉ុន្តែសមាជិកទាំងនោះ នឹងកាន់តំណែងជារដ្ឋមន្រ្តីស្តីទីសិន រហូតទាល់តែគណៈរដ្ឋមន្រ្តីថ្មីត្រូវបានតែងតាំង។ 

 

សូមបញ្ជាក់ថា បន្ទាប់ពីសភាជ្រើសតាំងនាយករដ្ឋមន្រ្តីថ្មី សមាជិកគណៈរដ្ឋមន្រ្តីជប៉ុន ក៏ត្រូវបង្ហាញក្នុងពេលឆាប់ៗផងដែរ។