ជាតិ
ក្រុមប្រឹក្សាជាតិកម្ពុជាដើម្បីកុមារ ស្នើឱ្យតុលាការដាក់ទោសយ៉ាងតឹងរឹងលើមេប៉េអឹមក្រុងក្រចេះ
× ភ្នំពេញ៖ គណៈកម្មការការពារកុមារថ្នាក់ជាតិ នៃក្រុមប្រឹក្សាជាតិកម្ពុជាដើម្បីកុមារ បានចេញសេចក្ដីថ្លែងការណ៍ និងថ្កោលទោសជុំវិញករណីហិង្សាដោយចេតនារបស់លោក ទេព ហ៊ុយ មេប៉េអឹមក្រុងក្រចេះ លើកុមារី២រូប ជាកូនឈ្នួល។ បើតាមសេចក្ដីថ្លែងការណ៍ចេញផ្សាយថ្ងៃទី៣១ តុលានេះ គណៈកម្មការការពារកុមារថ្នាក់ជាតិ នៃ ក.ជ.ក អំពាវនាវ និងទទូចដល់សមត្ថកិច្ច ពិសេសស្ថាប័នអយ្យការតុលា បន្តបណ្ដឹងអាជ្ញាលើករណីហិង្សាស្ថានទម្ងន់នេះ និងដាក់ទោសយ៉ាងតឹងរឹងបំផុតចំពោះជនល្មើស។
ក្រោយទទួលបានព័ត៌មានជុំវិញករណីហិង្សាលើកុមារីអាយុ១២ឆ្នាំចំនួន ២រូប នៅខេត្តក្រចេះ គណៈកម្មការការពារកុមារថ្នាក់ជាតិ នៃក្រុមប្រឹក្សាជាតិកម្ពុជាដើម្បីកុមារ បានថ្កោលទោសនូវទង្វើឃោរឃៅរបស់លោក ទេព ហ៊ុយ ដែលជាមេបញ្ជាការមូលដ្ឋានកងរាជអាវុធហត្ថក្រុងក្រចេះ។ គណៈកម្មការការពារកុមារថ្នាក់ជាតិ មានការតក់ស្លុត និងអាណិតអាសូរចំពោះកុមារីទាំង២ ដោយចាត់ទុកទង្វើនេះ ជាការរំលោភយ៉ាងធ្ងន់ធ្ងរលើសិទ្ធិកុមារ។
សេចក្ដីថ្លែងការណ៍ខាងលើ លើកឡើងយ៉ាងដូច្នេះ៖ «គណៈកម្មការការពារកុមារថ្នាក់ជាតិ នៃក្រុមប្រឹក្សាជាតិកម្ពុជាដើម្បីកុមារ សូមថ្កោលទោសដាច់អហិង្សា មិនអាចទទួលយកបានដាច់ខាត់ចំពោះការប្រព្រឹត្តអំពើហិង្សាដោយចេតនាយ៉ាងឃោរឃៅ យង់ឃ្នង ព្រៃផ្សៃ អមនុស្សធម៌ ដែលបង្កឡើងដោយឈ្មោះ ទេព ហ៊ុយ ទៅលើកុមារី២នាក់»។
ដើម្បីផ្ដល់ភាពយុត្តិធម៌ដល់កុមារីរងគ្រោះទាំង២រូប គណៈកម្មការការពារកុមារថ្នាក់ជាតិ នៃក្រុមប្រឹក្សាជាតិកម្ពុជាដើម្បីកុមារ អំពាវនាវ និងទទូចដល់សមត្ថកិច្ច អាជ្ញាធរគ្រប់លំដាប់ថ្នាក់ ពិសេសស្ថាប័នអយ្យការតុលា សូមបន្តបណ្ដឹងអាជ្ញាលើករណីហិង្សាស្ថានទម្ងន់នេះ ដើម្បីចាត់វិធានការតាមនីតិវិធីច្បាប់។ សេចក្ដីថ្លែងការណ៍ដដែល បន្តថា ត្រូវដាក់ទោសយ៉ាងតឹងរឹងបំផុតចំពោះជនល្មើស ដើម្បីកុំឱ្យអំពើដ៏អាក្រក់នេះ កើតមានក្នុងសង្គមបន្តទៀត៕
Tag:
អំពើហិង្សា
ក្រចេះ
កងរាជអាវុធហត្ថ
© រក្សាសិទ្ធិដោយ thmeythmey.com