ជាតិ
សេដ្ឋកិច្ច
សម្តេច ហ៊ុន សែន រំពឹងថា សេដ្ឋកិច្ចជាតិឆ្នាំ២០២១ អាចកើនបាន២,៦ភាគរយ ក្រោយបើកប្រទេសឡើងវិញ
× ភ្នំពេញ៖ សម្តេច ហ៊ុន សែន រំពឹងថាសេដ្ឋកិច្ចកម្ពុជា អាចកើនបាន២,៦ភាគរយ នៅក្នុងឆ្នាំ២០២១ ក្រោយ បើកដំណើរការសង្គមនិងសេដ្ឋកិច្ចក្នុងប្រទេសឡើងវិញទាំងអស់ ចាប់ពីថ្ងៃទី១វិច្ឆិកានេះ។ បើតាមប្រសាសន៍សម្តេច អត្រាកំណើននេះ អាចបានពីការចូលរួមចំណែកច្រើនពីវិស័យទេសចរណ៍ផ្ទៃក្នុង។
សម្តេច ហ៊ុន សែន សម្រេចបើកដំណើរការប្រទេសពេញលេញឡើងវិញគ្រប់វិស័យ និងការរស់នៅជាមួយកូវីដ-១៩ តាមគន្លងប្រក្រតីភាពថ្មី ចាប់ពីថ្ងៃទី១វិច្ឆិកា តទៅ។ ការសម្រេចបើកដំណើរការសង្គមនិងសេដ្ឋកិច្ចទាំងអស់ក្នុងប្រទេសឡើងវិញនេះ សម្តេច ហ៊ុន សែន រំពឹងថា សេដ្ឋកិច្ចកម្ពុជា អាចនឹងកើនបាន២,៦ភាគរយ នៅក្នុងឆ្នាំ២០២១។
បើតាមសម្តេច ហ៊ុន សែន ដែលថ្លែងក្នុងពិធីបិទយុទ្ធនាការចាក់វ៉ាក់សាំងបង្ការកូវីដ-១៩ សម្រាប់អ្នកមានអាយុ៦ឆ្នាំឡើង និងបើកយុទ្ធនាការចាក់សម្រាប់ក្មេងអាយុ៥ឆ្នាំ នាព្រឹកថ្ងៃទី១វិច្ឆិកា អត្រាកំណើននេះ គឺអាចបានពីវិស័យទេសចរណ៍ផ្ទៃក្នុង ខណៈរដ្ឋាភិបាលលើកទឹកចិត្តដល់ពលរដ្ឋ ឱ្យចេញធ្វើដំណើរកម្សាន្តនៅតាមតំបន់ទេសចរណ៍ និងបណ្តាខេត្តផ្សេងៗនៅក្នុងស្រុក។
ប្រមុខរដ្ឋាភិបាលមានប្រសាសន៍ដូច្នេះ៖ «ទេសចរផ្ទៃក្រៅក្នុងមួយឆ្នាំៗ អាចមាន៥ទៅ៦លាននាក់»។ សម្តេច បានបន្តថា៖ «កុំមើលស្រាលទេសចរខ្មែរឱ្យសោះ។ ទេសចរខ្មែរចាយលុយធំជាងទេសចរមកពីបរទេស ហើយហា៊នដេកនៅសណ្ឋាគារផ្កាយ៥ទៀត»។
យោងតាមរបាយការណ៍របស់ក្រសួងទេសចរណ៍ ក្នុងរយៈពេល៨ខែដើមឆ្នាំ២០២១ កម្ពុជាទទួលបានទេសចរណ៍ផ្ទៃក្នុងប្រមាណ២,៤២លាននាក់ ដោយក្នុងនោះភ្ញៀវទេសចរជាតិមានជាង២,២៦លាននាក់ និងភ្ញៀវទេសចរបរទេសផ្ទៃក្នុងមានប្រមាណ ១៦ ម៉ឺននាក់។ ក្រសួងទេសចរណ៍បានបញ្ជាក់ថា ភ្ញៀវទេសចរជាតិដែលទទួលបាននេះ គឺថយចុះ៥១ភាគរយ និងភ្ញៀវទេសចរបរទេស ធ្លាក់ចុះរហូតដល់ ៩០ភាគរយ បើធៀបនឹងរយៈពេលដូចគ្នាកាលពីឆ្នាំ២០២០។ ដើម្បីជំរុញដល់កំណើនសេដ្ឋកិច្ចជាតិនេះ សម្តេច ហ៊ុន សែន ក៏បានសម្រេចបើកទេសចរណ៍វ៉ាក់សាំង ចាប់ពីថ្ងៃទី៣០តុលា ឆ្នាំ២០២១ដើម្បីទាក់ទាញចំណូលសម្រាប់សេដ្ឋកិច្ចជាតិ និងពលរដ្ឋ ផងដែរ។
កាលពីថ្ងៃទី២៨កញ្ញា ធនាគារពិភពលោក(World Bank)បានទម្លាក់ការព្យាករណ៍សេដ្ឋកិច្ចរបស់កម្ពុជាក្នុងឆ្នាំ២០២១ ពី៤ភាគរយមកត្រឹមកំណើន២,២ភាគរយ ខណៈធនាគារអភិវឌ្ឍន៍អាស៊ី(ABD) រំពឹងថា កម្ពុជានឹងមានកំណើនសេដ្ឋកិច្ចត្រឹម១,៩ភាគរយប៉ុណ្ណោះ៕
© រក្សាសិទ្ធិដោយ thmeythmey.com