ជាតិ
សេដ្ឋកិច្ច
៦ខែហើយ ដែលកម្ពុជា នៅមិនទាន់អាចយកប្រេង ៣០ម៉ឺនបារ៉ែល មកវិញបាន សកម្មភាពបូមប្រេងរបស់ក្រុមហ៊ុន KrisEnergyកន្លងមកនៅប្លុកA។ រូបថត៖ ក្រសួងរ៉ែ និងថាមពល
× ភ្នំពេញ៖ មកទល់ពេលនេះ កម្ពុជាមិនទាន់បានប្រងឆៅជិត៣០ម៉ឺនបារ៉ែលមកវិញឡើយ ក្រោយពីនាវឹក MT Strovolos លួចដឹកប្រេងទាំងនោះ ចេញពីកម្ពុជា កាលពីអំឡុងខែមិថុនា ឆ្នាំ២០២១។ នេះបើតាមលើកឡើងរបស់លោក ជៀប សួរ អគ្គនាយកនៃអគ្គនាយកដ្ឋានប្រេងកាត ក្រសួងរ៉ែ និងថាមពល។
កម្ពុជាបានដាក់ឯកសារបន្ថែមជាបន្តបន្ទាប់ លើបណ្ដឹងទាមទារប្រេងឆៅប្រមាណ៣០ម៉ឺនបារ៉ែល ត្រលប់មកវិញ ទៅកាន់ប្រទេសឥណ្ឌូណេស៊ី។ អាជ្ញាធរឥណ្ឌូណេស៊ី បានឃាត់មនុស្សជិត២០នាក់ និងនាវា MT Strovolos បានលួចដឹកប្រេងឆៅរបស់កម្ពុជាចេញពីសមុទ្រ កាលពីថ្ងៃទី១៩មិថុនា ឆ្នាំ២០២១។
អស់រយៈពេល៦ខែហើយ ការប្តឹងទាមទារយកប្រេងរបស់កម្ពុជាមកវិញនេះ គឺមិនបានសម្រេចឡើយ ខណៈក្រុមមេធាវីកំពុងដោះស្រាយ។ «យើងពុំទាន់ទទួលបានប្រេងឆៅមកវិញនៅឡើយទេ»។ លោក ជៀប សួរ បានប្រាប់សារព័ត៌មានThmeyThmey តាមប្រព័ន្ធតេលេក្រាម នាថ្ងៃទី២១ធ្នូ យ៉ាងដូច្នេះ ដោយបានបញ្ជាក់យ៉ាងខ្លីថា បច្ចុប្បន្នក្រុមមេធាវីកំពុងធ្វើការងារនេះ ជាមួយភាគីពាក់ព័ន្ធមិនទាន់ចប់។
ពាក់ព័ន្ធនឹងរយៈពេលក្នុងការទាមទារយកប្រេងឆៅរបស់កម្ពុជាមកវិញនេះ លោក ជៀប សួរ ដែលជាអគ្គនាយកនៃអគ្គនាយកដ្ឋានប្រេងកាត ក្រសួងរ៉ែ និងថាមពល គឺមិនអាចកំណត់បានឡើយ ដោយលោកបាននិយាយដូច្នេះ៖« ខ្ញុំមិនអាចប៉ាន់ស្មានដឹងទេ ព្រោះវាពាក់ព័ន្ធផ្នែកច្បាប់»។
សូមរម្លឹកថា នាវឹក MT Strovolos បានលួចដឹកប្រេងឆៅរបស់កម្ពុជាចេញពីសមុទ្រ កាលពីថ្ងៃទី១៩មិថុនា ឆ្នាំ២០២១ រហូតដល់ថ្ងៃទី២៥សីហា អាជ្ញាធរប្រទេសឥណ្ឌូណេស៊ីផ្តល់ដំណឹងឱ្យកម្ពុជា ថា ខ្លួនបានចាប់នាវាដឹកប្រេងឆៅជិត៣០ម៉ឺនបារ៉ែល និងប្រធានក្រុមនាវាដែលជាជនជាតិបង់ក្លាដែស និងសមាជិកនាវិកចំនួន១៨នាក់ផ្សេងទៀត។
ក្រោយពីកងទ័ពជើងទឹកឥណ្ឌូណេស៊ី រឹបអូសបាននាវាMT Strovolos ទៅតាមការស្នើសុំរបស់អាជ្ញាធរកម្ពុជា។ ក្រុមហ៊ុន World Tankers Management ដែលជាគ្រប់គ្រងនាវា MT Strovolos នោះ បានចេញមុខបដិសេធលើការចោទប្រកាន់នេះភ្លាមៗថា នាវានេះ មិនបានលួចប្រេងពីកម្ពុជាឡើយ។ សេចក្តីថ្លែងការណ៍របស់ក្រុមហ៊ុនWorld Tankers Management នៅថ្ងៃទី២៧ សីហា បានបញ្ជាក់ថា នាវា MT Strovolos ដែលនៅលើដែនទឹករបស់ឥណ្ឌូណេស៊ី ធ្វើឡើងក្រោមហេតុផលមនុស្សធម៌ និងធ្វើប្រតិបត្តិការតាមកិច្ចសន្យាតែប៉ុណ្ណោះ។ តែក្រសួងរ៉ែ និងថាមពល ចាត់ទុកការបកស្រាយរបស់ម្ចាស់នាវា MT Strovolos នេះ គឺផ្ទុយពីការពិត៕
© រក្សាសិទ្ធិដោយ thmeythmey.com