កីឡាអន្តរជាតិ
អន្តរជាតិ
ក្រុមហ៊ុនបោះពុម្ពអាម៉េរិកមួយ សុំទោស Abramovich ដែលចោទលោកទិញក្លិប Chelsea តាមបញ្ជាពូទីន
× ម្ចាស់ក្លិប Chelsea លោក Roman Abramovich ទទួលបានការសុំទោសពីម្ចាស់ក្រុមហ៊ុនបោះពុម្ពផ្សាយដ៏ល្បីរបស់អាម៉េរិក ដែលសរសេរថាខ្លួនទិញយកក្លិបតោខៀវតាមការបង្គាប់បញ្ជារបស់ប្រធានាធិបតីរុស្ស៊ីលោកវ៉្លាឌីមៀ ពូទីន។
HarperCollins ក្រុមហ៊ុនបោះពុម្ភផ្សាយជាភាសាអង់គ្លេស បានបោះពុម្ភសៀវភៅមួយក្បាលមានចំណងជើងថា «Putin's People»។ ក្នុងសៀវភៅនោះមានបញ្ចូលឃ្លាថាលោក Abramovich ទិញក្លិបបាល់ទាត់អង់គ្លេស Chelsea តាមបញ្ជារបស់លោកពូទីន។ មហាសេដ្ឋីរុស្ស៊ី ចាត់ទុកការបោះពុម្ពនេះជាការបរិហារកេរ្តិ៍។
បើតាមការចុះផ្សាយរបស់វេបសាយផ្លូវការបស់ក្លិប Chelsea ក្រោយមហាសេដ្ឋីប្រេងប្រត្តិកម្មនឹងសៀវភៅមួយក្បាលនេះ នៅថ្ងៃទី២២ ខែធ្នូ ក្រុមហ៊ុន HarperCollins ដែលមានមូលដ្ឋានក្នុងក្រុងញ៉ូវយ៉ក បានសុំទោសលោក Abramovich ហើយបញ្ជាក់ថាពួកគេនឹងកែសម្រួលឃ្លាជាថ្មីវិញ។
សៀវភៅ Putin's People ត្រូវបានអ្នកកាសែតអង់គ្លេសអ្នកស្រី Catherine Belton ជាអ្នកពិនិត្យនិងទទួលខុសត្រូវ មុនបោះពុម្ពផ្សាយ។ ក្នុងសៀវភៅនោះ មានសរសេរថាមហាសេដ្ឋីរុស្ស៊ីម្នាក់ទៀតលោក Sergei Pugachev ថាលោក Abramovich ទិញក្លិប Chelsea នៅឆ្នាំ២០០៣ តាមបញ្ជាប្រធានាធិបតីរុស្ស៊ីលោកពូទីន។
នៅក្នុងសេចក្តីថ្លែងការណ៍មួយរបស់ក្រុមហ៊ុន HarperCollins អ្នកបោះពុម្ពអះអាងថាសៀវភៅរបស់លោកស្រី Belton មួយក្បាលនេះមានព័ត៌មានមិនត្រឹមត្រូវមួយចំនួនអំពីលោក Abramovich៕
Tag:
Roman Abramovich
HarperCollins
Chelsea
© រក្សាសិទ្ធិដោយ thmeythmey.com