២ថ្ងៃក្រោយភ្នំពេញក្រោន គ្រង់តំណែងជើងឯកពានបាល់ទាត់នារី អ្នកចាំទី ម៉ាក់ ស្រីរ័ត្ន បានសម្រេចចែកផ្លូវគ្នាជាមួយក្លិប ក្រោយពីបានសម្រេចក្ដីប្រាថ្នាជួយក្រុមលើកពាននេះ។ ម៉ាក់ ស្រីរ័ត្ន បានចូលរួមជាមួយក្លិបភ្នំពេញក្រោន អស់រយៈពេល៤ឆ្នាំ ហើយក៏ទទួលបានជ័យលាភី ជាអ្នកចាំទីល្អសម្រាប់រដូវកាល២០២១ នេះ ក្រោយជួយក្លិបលើកពានផងដែរ។
 

អ្នកគ្រូ ម៉ៅ សាវីន គ្រូបង្វឹកក្លិបភ្នំពេញក្រោន បានបញ្ជាក់ថា ការចែកផ្លូវគ្នានេះ ដោយសារកុងត្រារបស់ អ្នកចាំទី ម៉ាក់ ស្រីរ័ត្ន ដល់ពេលកំណត់ ហើយក៏ជាពេលដែល ស្រីរ័ត្ន ចង់ផ្លាស់ប្ដូរបទសោធន៍ក្នុងក្រុមផ្សេងទៀត ។ «ស្រីរ័ត្ន ជាកីឡាការិនីល្អ ។ ក្លិប និងស្រីរ័ត្ន មិនមានផ្ទៃក្នុងអ្វីអាក្រក់ទេ តែនេះជាការចែកផ្លូវដែលភាគីសងខាងយល់ព្រម» ។ គ្រូបង្វឹករូបនេះ បានប្រាប់សារពត៌មានថ្មីៗ ។
 

ចំពោះការបន្ដអាជីព ក្នុងក្លិបថ្មីណានោះ សារពត៌មានថ្មីៗ មិនទាន់ទទួលបានការបញ្ជាក់ពី កីឡាការិនី ម៉ាក់ ស្រីរ័ត្ន បានទេ ៕