អន្ទាក់ បានសម្លាប់ និងប៉ះពាល់ការរស់នៅរបស់សត្វព្រៃ ជារៀងរាល់ថ្ងៃនៅតាមតំបន់ការពារធម្មជាតិ និងដែនជម្រកសត្វព្រៃ។ សត្វព្រៃមួយចំនួន ត្រូវបានផុតពូជ និងមួយចំនួនទៀតមិនអាចបន្តពូជទៀតបាន ព្រោះរងការគំរាមកំហែងពីអន្ទាក់។ យ៉ាងណាមិញ អន្ទាក់ហាក់កើនឡើងក្នុងព្រៃ បើទោះជា ព្រានព្រៃមួយចំនួនត្រូវបានចាប់ និង ដាក់ទោសតាមច្បាប់ក្ដី។
 

លោក សេង ទៀង សង្កេតឃើញថា ច្បាប់ដាក់ទោសអ្នកបរបាញ់ និងដាក់ទន្ទាក់សត្វព្រៃនៅមានកម្រិតស្រាលពេក ដែលធ្វើឱ្យព្រានព្រៃមួយចំនួនហាក់មិនខ្លាចច្បាប់។ លោក សេង ទៀក អះអាងថា អន្ទាក់កើនឡើងជារៀងរាល់ឆ្នាំ ហើយអន្ទាក់ប្រមាណ២០ភាគរយប៉ុណ្ណោះ ដែលត្រូវបានបង្ក្រាប។

« ខ្ញុំយល់ថាទោសទណ្ឌបច្ចុប្បន្នស្ថិតនៅកម្រិតថា្នក់ទីមួយ។ អ៊ីចឹងចូលទៅថ្នាក់ទីបីជាការល្អ។ គួរដាក់ទោសពី១ឆ្នាំទៅ៥ឆ្នាំជាការល្អ និងពិន័យជាប្រាក់ចាប់ពី ១៥លានរៀល ចំពោះអ្នកដាក់អន្ទាក់។ កន្លែងនេះគួរតែត្រូវពិនិត្យមើលទៅលើច្បាប់ដើម្បីកាត់បន្ថយការដាក់អន្ទាក់នៅក្នុងព្រៃ។ ការបណ្ដើរឆ្កែក៏គួរដាក់ទោសដែរ »។ នេះជាការលើកឡើងរបស់នាយកអង្គការ WWF។

 

យោងតាមច្បាប់ស្ដីពីតំបន់ការពារធម្មជាតិ ជំពូកទី១០ មាត្រា៥៨ ចែងដូច្នេះ ការចាប់ ប្រមាញ់ ប្រមូលពងសត្វព្រៃគ្រប់ប្រភេទ ត្រូវពិន័យអន្តរការណ៍ជាប្រាក់ពី១០ម៉ឺនរៀល ដល់ ១លានរៀលបន្ថែមលើសំណងខូចខាតធនធានធម្មជាតិ និងរឹបអូសវត្ថុតាងជាសម្បត្តិរដ្ឋចំពោះបទល្មើសនៅតំបន់ការពារធម្មជាតិ។ ប៉ុន្តែបើប៉ះពាល់ដល់សត្វកម្រ ដូចជាសត្វខ្ទីងមួយ ត្រូវពិន័យពី ៣០លានរៀល ទៅ៦០លានរៀល។ 

 

ជាការឆ្លើយតបសំណូមពរខាងលើ លោក នេត្រ ភក្ត្រា រដ្ឋលេខាធិការក្រសួងបរិស្ថាន បន្តថា បច្ចុប្បន្នក្រសួងបរិស្ថានកំពុងពិនិត្យពីការតាក់តែង ក្រមបរិស្ថាន ពាក់ព័ន្ធនឹងទោសទណ្ឌ។ យុទ្ធនាការអន្ទាក់សូន្យក៏នឹងក្លាយជាពិសោធន៍មួយសម្រាប់ការពង្រឹងច្បាប់បន្ថែមទៀតដែរ។ 

 

រដ្ឋលេខាធិការរូបនេះលើកឡើងដូច្នេះ៖ «យុទ្ធនាការអន្ទាក់សូន្យនេះ គឺជាការចុះស្ទាបស្ទង់នៃការអនុវត្តច្បាប់នៅតំបន់ការពារធម្មជាតិ ថាតើវាគ្រប់គ្រាន់ហើយឬនៅ ឬក៏ត្រូវឡើងមួយកម្រិតទៀត ដើម្បីឈានដល់ការទប់ស្កាត់ឱ្យបានច្រើនបំផុត និងទប់ស្កាត់បានទាំងស្រុង ជាពិសេសការជួញដូរសត្វព្រៃ »។

 

លោក នេត្រ ភក្ត្រា ក៏ស្នើឱ្យអាជ្ញាធរគ្រប់ជាន់ថ្នាក់ត្រូវអនុវត្តច្បាប់ឱ្យបានម៉ឺងម៉ាត់។ លើសពីនេះ ដើម្បីបញ្ឈប់ការដាក់អន្ទាក់ និងបរបាញ់សត្វព្រៃ ត្រូវមានការចូលរួមពីប្រជាជនមូលដ្ឋាន សហគមន៍ និងអ្នករកស៊ីគ្រប់ប្រភេទទាំងអស់។ នាយកអង្គការ WWF ប្រចាំកម្ពុជា លោក សេង ទៀង អំពាវនាវឱ្យប្រជាជនទាំងអស់បញ្ឈប់ការបរបាញ់សត្វ ការបរិភោគ និងលក់ដូរសត្វព្រៃគ្រប់ប្រភេទទាំងអស់ដើម្បី ប្រព័ន្ធអេកូឡូស៊ីក្នុងប្រទេសកម្ពុជា ។ 

 លោក នេត្រ ភក្រ្តា រដ្ឋលេខាធិការក្រសួងបរិស្ថាន ក្នុងយុទ្ធនាការអន្ទាក់សូន្យ ក្នុងខេត្តស្ទឹងត្រែង។ រូបភាពផ្ដល់ឱ្យដោយលោក នេត្រ ភក្ត្រា ។
 

គួរបញ្ជាក់ដែរ អន្ទាក់ចំនួន ៦១ ៦១១ ត្រូវបានដោះចេញ ពីតំបន់ការពារធម្មជាតិចំនួន ៧៣ និងច្រករបៀងជីវចម្រុះចំនួន ៣ ក្នុងប្រទេសកម្ពុជា។ ជាមធ្យមក្នុងមួយឆ្នាំ អន្ទាក់សរុបចំនួនប្រមាណ ៤ម៉ឺន ត្រូវបានដកចេញពីតំបន់ការពារធម្មជាតិទាំងនេះ៕