ជាតិ
សេដ្ឋកិច្ច
សាំងធម្មតា និងម៉ាស៊ូត បានធា្លក់ថ្លៃ ២០០រៀលក្នុងមួយលីត្រ ស្ថានីយប្រេងឥន្ធនៈមួយកន្លែងមួយរាជធានីភ្នំពេញ។
× ភ្នំពេញ៖ សាំងធម្មតាមានតម្លៃ ៥ ០៥០រៀលក្នុងមួយលីត្រ ខណៈប្រងម៉ាស៊ូត មានតម្លៃ ៥ ១០០រៀលក្នុងមួយលីត្រ។ តម្លៃទាំងនេះ គឺបានធ្លាក់ចុះ ចំនួន២០០រៀលក្នុងមួយលីត្រ បើធៀបនឹងរយៈពេល១០ថ្ងៃមុន។ នេះបើតាមសេចក្តីដំណឹងរបស់ក្រសួងពាណិជ្ជកម្ម នាព្រឹកថ្ងៃទី១១ ខែមេសា។
ក្រសួងពាណិជ្ជកម្ម បានបញ្ជាក់ថា ការលក់រាយនៃសាំងធម្មតាមានតម្លៃ ៥ ០៥០រៀល និងម៉ាស៊ូតមានតម្លៃ ៥ ១០០រៀលក្នុងមួយលីត្រ នៅតាមស្ថានីយ និងដេប៉ូឥន្ធនៈនេះ គឺអនុវត្តចាប់ពីថ្ងៃទី១១ ដល់ថ្ងៃទី២០មេសា។
កាលពីថ្ងៃទី២២មីនា ឆ្នាំ២០២២ រដ្ឋាភិបាលបានកំណត់រូបមន្តថ្មី ដើម្បីធ្វើឱ្យថ្លៃលក់រាយប្រេងឥន្ធនៈនៅកម្ពុជា ឡើង ឬចុះថ្លៃ ទៅតាមតម្លៃនៅលើទីផ្សារអន្ដរជាតិ។ ក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុ និងក្រសួងរ៉ែ និងថាមពល បានសម្រេចរួមគ្នា កែសម្រួលរូបមន្តថ្លៃលក់រាយប្រេងឥន្ធនៈ នៅតាមបណ្ដាស្ថានីយ ដោយកំណត់យក «តម្លៃរាយ/លីត្រ = មធ្យមភាគ MOPS + ពន្ធ +PREMIUM + អាករលើតម្លៃបន្ថែម (VAT OUT)។ នេះបើតាមសេចក្តីប្រកាសរួម របស់អន្តរក្រសួងខាងលើនេះ។
ប្រកាសអន្តរក្រសួងបានពន្យល់ថា MOPS ( Mean of Platt Singapore) សំដៅលើតម្លៃមធ្យមភាគ នៃផលិតប្រេងឥន្ធនៈលក់ដុំនៅប្រទេសសិង្ហបុរី ដែលចេញផ្សាយដោយក្រុមហ៊ុនPlatts។ ពាក្យ PREMIUM សំដៅលើចំណាយទូទៅ បូកពន្ធលើប្រាក់ចំណេញ និងប្រាក់ចំណេញ ហើយ ពន្ធសំដៅលើពន្ធគយ បូកអាករបន្ថែម បូកអាករពិសេស។
ប្រកាសរបស់អន្តរក្រសួងបានបញ្ជាក់ថា៖ « តម្លៃ PREMIUM កំណត់ថ្មី ត្រូវបានកំណត់ ០,២០ដុល្លារក្នុងមួយលីត្រ សម្រាប់ប្រេងសាំងធម្មតា (EA92)។ ចំណែកតម្លៃ Premium ប្រេងម៉ាស៊ូត កំណត់ត្រឹម ០,២៣ដុល្លារក្នុងមួយលីត្រ និងតម្លៃ Premium សាំងស៊ុបពែ មិនត្រូវបានកំណត់ទេ ដោយអាចលក់តម្លៃប្រកួតប្រជែង ប៉ុន្ដែតម្លៃមួយទាបជាងថ្លៃ ដែលបានគណនាដោយរូបមន្ដ»។
ពាក់ព័ន្ធនឹងកំណត់រូបមន្តថ្មី សម្រាប់កែសម្រួលថ្លៃលក់រាយប្រេងឥន្ធនៈនេះ រដ្ឋមន្ត្រីក្រសួងពាណិជ្ជកម្ម អាចចេញសេចក្ដីជូនដំណឹងភ្លាមៗ ដោយកំណត់ឱ្យចេញថ្លៃលក់រាយជូនក្រុមហ៊ុនប្រេងឥន្ធនៈ នៅក្នុង រយៈពេល១០ថ្ងៃ ឬ១៥ថ្ងៃម្ដង ដើម្បីឱ្យមានសមាមាត្រគ្នា រវាងតម្លៃប្រេងឥន្ធនៈនៅលើទីផ្សារ អន្ដរជាតិ និងតម្លៃលក់រាយនៅទីផ្សារកម្ពុជា សម្រាប់រក្សាស្ថិរភាព នៃការផ្គត់ផ្គង់ប្រេងឥន្ធនៈនៅកម្ពុជា។
លោក ស៊ាង ថៃ អ្នកនាំពាក្យក្រសួងពាណិជ្ជកម្ម បានប្រាប់សារព័ត៌មានថ្មីៗ ថា ការកំណត់រូបមន្តសម្រាប់គណនាថ្លៃលក់រាយប្រេងឥន្ទនៈនៅកម្ពុជា បានរក្សាថ្លៃលក់រាយប្រេងនៅកម្ពុជា ឲ្យមានស្ថេរភាពជាងមុន។ លោកបានប្រសាសន៍ដូច្នេះ៖ «[ការកំណត់រូបមន្តថ្មី] គឺអាចបំបាត់បាតុភាព ប្រេងឡើងថ្លៃលឿន តែចុះមកវិញយឺត ដែលប្រជាពលរដ្ឋតែងតែត្អូញត្ងែរ ដូចកាលមិនទាន់អនុវត្តរូបមន្តនេះ»។ ប៉ុន្តែលោក បញ្ជាក់ថា ការអនុវត្តរូបមន្តថ្មីនេះ គឺមិនមែនជាវិធីធ្វើឲ្យប្រេងចុះថ្លៃទេ៕
© រក្សាសិទ្ធិដោយ thmeythmey.com