លោក ជូង ជូងី មេធាវីរបស់លោក សៀម ភ្លុក ប្រធានស្ថាបនិកគណបក្សបេះដូងជាតិអះអាងថា លោក សៀម ភ្លុក គ្មានបំណងរត់គេចខ្លួនឡើយ។ មេធាវីរូបនេះបញ្ជាក់ថា លោកបានដាក់លិខិតស្នើទៅប្រធានសាលាដំបូងរាជធានីភ្នំពេញ កាលចុងសប្ដាហ៍មុន ឲ្យបញ្ឈប់ការនាំខ្លួនលោក សៀម ភ្លុក ហើយបង្គាប់ឲ្យចូលបំភ្លឺក្ដីវិញ។ 

 

«(លិខិតស្នើឱ្យតុលាការ)កំណត់កាលបរិច្ឆេទណាមួយឲ្យគាត់ចូលទៅបង្ហាញខ្លួន ចំពោះចៅក្រមស៊ើបសួរដោយខ្លួនឯង ហើយមានខ្ញុំជាមេធាវី អមទៅផង។ លោក សៀម ភ្លុក អត់មានបំណងគេចវេះទេ ឲ្យតែបញ្ជូនដីកាកោះហៅដល់អាសយដ្ឋានគាត់ ហើយកំណត់ថ្ងៃចូលបំភ្លឺច្បាស់លាស់»។ នេះបើតាមការអះអាងរបស់លោក ជូងី ដោយបន្ថែមថា មកដល់ពេលនេះ នៅមានទាន់ទទួលបានការឆ្លើយតបពីខាងតុលាការនៅឡើយ។ 

 

កន្លងមកលោក លិ សុខា ចៅក្រមស៊ើបសួរនៃតុលាការភ្នំពេញ បានបង្គាប់ទៅសមត្ថកិច្ច ឲ្យនាំលោក សៀម ភ្លុក ស្ថាបនិកគណបក្សបេះដូងជាតិ ទៅឲ្យលោក មុនថ្ងៃទី២៥ ខែមេសា ឆ្នាំ២០២២ ដើម្បីសាកសួរពីបទក្លែងបន្លំ និងប្រើប្រាស់លិខិតក្លែង៕