សហជីព និងកម្មករនិយោជិតណាហ្កាវើលដ៏ ជាច្រើននាក់ បានប្រមូលផ្ដុំគ្នានៅមុខវត្តបទុមវតីរាជវរារាម ហើយដង្ហែញត្តិទៅដាក់នៅខុទ្ធកាល័យសម្ដេច ហ៊ុន សែន ដោយមានមន្ត្រីចេញមកទទួល ស្របពេលដែលនាយករដ្ឋមន្រ្តី កំពុងប្រារព្វពីធីអបអរសាទរខួបលើក៤៥ឆ្នាំ នៃដំណើរឆ្ពោះទៅរកការតស៊ូរំដោះជាតិ នាខេត្តត្បូងឃ្មុំ។ 
 

ចេញពីទីតាំងនោះ ក្រុមអ្នកតវ៉ាទាំងនោះ បានបន្តដំណើរទៅកាន់រដ្ឋសភា ដើម្បីបន្តដាក់ញត្តិដដែលនេះ  ប៉ុន្តែអាជ្ញាធរ បានរារាំងមិនឱ្យកម្មករនិយោជិត ហែញត្តិច្រើនគ្នាឡើយ ពោលគឺអនុញ្ញាតឲ្យតែតំណាងណាហ្កាវើលដ៏ ១០នាក់ ទៅដាក់ញត្តិ។
 

កញ្ញា ឈឹម ស៊ីថរ ប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ​នៃ​ក្រុមហ៊ុន ណាហ្គាវើលដ៍ បានលើកឡើងថា ការដាក់ញត្តិនៅខុទ្ទកាល័យសម្ដេច និងរដ្ឋសភានេះ ដោយសារតែពុំមានដំណោះស្រាយលើបញ្ហាវិវាទរបស់ពួកគេ ជាមួយក្រុមហ៊ុន។ តំណាងកម្មករណាហ្គាវើលដ៍ បាននាំគ្នាហែយកទៅដាក់នៅរដ្ឋសភាម្ដងហើយ។
 

កញ្ញាបានបញ្ជាក់៖« ខ្ញុំហែញត្តិទាំងអស់គ្នា ព្រោះខ្ញុំចង់ឱ្យរដ្ឋសភាឃើញថា ឥឡូវនេះមានប្រជាពលរដ្ឋច្រើនណាស់ ដែលមិនសុខចិត្តហើយមានបញ្ហាការងារច្រើនមែនទែន មិនមែនមានតែ ១០ ទៅ២០នាក់ទេ»។
 

វិវាទការងារនេះ មានការអូសបន្លាយពេលយូរហើយ ដោយកម្មករនិយោជិត បានចេញធ្វើកូដកម្មអស់រយៈពេល ៦ខែមកហើយ តាំងពីចុងឆ្នាំ២០២១មក តែពុំទាន់មានដំណោះស្រាយសមស្របណាមួយជូនពួកគេ។ 
 

កញ្ញា ស៊ីថរ លើកឡើង បន្តថា៖ «មូលហេតុដែលបងប្អូនកម្មករមិនព្រមទទួលយកសំណង ដោយសារមានពាក់ព័ន្ធជាមួយសេរីភាពរបស់សហជីពនៅកន្លែងធ្វើការ ។ អ៊ឹចឹងការបញ្ឈប់ថា្នក់ដឹកនាំសហជីព សមាជិកសហជីពមិនមានសំណង នោះមិនមែនជាដំណោះស្រាយទេ ព្រោះវាប៉ះពាល់សិទ្ធិសេរីភាពសហជីព»។
 

ការដាក់ញត្តិទៅសម្ដេចមាន ៣ចំណុចដែលសំខាន់ គឺនិយោជកណាហ្កាវើលដ៏ ត្រូវទទួលកម្មករនិយោជិតប្រមាណ ២០០នាក់ឱ្យចូលធ្វើការវិញ។ មួយទៀត សម្រាប់និយោជិតឯកភាពទទួលយកសំណង គឺពួកគេស្នើសុំឱ្យក្រុមហ៊ុនទូទាត់ឱ្យបានត្រឹមត្រូវតាមច្បាប់ និងចុងក្រោយ ពួកគេទាមទារឱ្យតុលាការទម្លាក់បទចោទលើថ្នាក់ដឹកនាំសកម្មជនសហជីពចំនួន ១៥នាក់ ដែលត្រូវបានចោទប្រកាន់កន្លងមក ។ នេះបើតាម កញ្ញា ស៊ីថរ។
 

កន្លងមកក្រុមអ្នកតវ៉ាទាំងនោះ បានស្វែងរកស្ថាប័នពាក់ព័ន្ធជាច្រើន ដើម្បីជួយដោះស្រាយវិវាទនេះ តែមិនមានដំណោះស្រាយ។ បើតាមកញ្ញា ស៊ីថរ ស្ថាប័នទាំងនោះភាគច្រើនលម្អៀងទៅលើនិយោជក ដូច្នេះតំណាងកម្មករ និងកម្មករទាំងអស់ មានតែស្នើទៅដល់សម្ដេច ដើម្បីឱ្យជំរុញជួយរកដំណោះស្រាយឱ្យពួកគេប៉ុណ្ណោះ។
 

កញ្ញាបន្លឺសម្ដីថា ក្រៅពីសម្ដេចប្រហែលមិនមានស្ថាប័នមួយណា អាចជួយពួកគេបាននោះទេ ជុំវិញវិវាទការងាររបស់និយោជក និងកម្មករនិយោជិតណាហ្កាវើលដ៏។ ពួកគេសង្ឃឹម សម្ដេចអាចជំរុញ និងជួយរកដោះស្រាយពីបញ្ហាវិវាទរបស់ពួកគេបាន៕