អភិបាលស្រុកកែវសីមា លោក នួន សារ៉ន បានបញ្ជាក់ថា បង្គោលព្រំដែនកម្ពុជា-វៀតណាម កំពុងប្រឈមនឹងការដួលរលំ ដោយសារដីនៅក្បែរបង្គោលបានបាក់ស្រុត ខណៈគម្លាតបង្គោលនឹងដី ដែលបាក់ស្រុតនៅមិនឆ្ងាយពីគ្នា។ 
 

បើតាមលោក នួន សារ៉ន ដែលបានចុះទៅត្រួតពិនិត្យទីតាំងផ្ទាល់ បានប្រាប់សារព័ត៌មានថ្មីៗឱ្យដឹងថា៖« ដីមាត់អូរវាដាច់ ហើយនៅសល់ប្រមាណជា ៤តឹក ដល់បង្គោល»។ 
 

អាជ្ញាធរមូលដ្ឋានមូលនឹងបន្តការតាមដានករណីនេះ។ ក្រៅពីនេះ លោកអភិបាលស្រុកកែវសីមា ក៏បានរាយការណ៍ទៅកាន់ថ្នាក់លើ ដើម្បីទទួលបានអនុសាសន៍ដែរ ដ្បិតវាជាកិច្ចការព្រំដែនរបស់ក្រសួងការបរទេស។ 
  

ជាមួយគ្នានោះ លោកស្រី​ កុយ ពិសី ​អនុប្រធាន​គណៈកម្មាធិការ​ចម្រុះ​ព្រំដែន​កម្ពុជា បានបញ្ជាក់ថា ប្រសិនបើបង្គោលព្រំដែនដួលរលំ នោះនឹងត្រូវរៀបចំឡើងវិញ។ ដ្បិតបង្គោលព្រំដែននេះ ជាទីតាំងព្រំដែនរវាងកម្ពុជា នឹងវៀតណាម ដូច្នេះការរៀបចំនឹងមានការចូលរួមពីសំណាក់ភាគីទាំងសងខាង។ លោកស្រីបានឱ្យដឹងថា៖«យើងអត់មានសិទ្ធិទៅធ្វើម្នាក់ឯងទេ។ បង្គោលនេះជារបស់ប្រទេសគេ(វៀតណាម) នឹងប្រទេសយើង។ បង្គោលនេះ មិនមែនអភ័យឯកសិទ្ធិតែខ្មែរទេ វៀតណាមក៏គេមានសិទ្ធិពាក់កណ្តាលម្នាក់ អ៊ីចឹងត្រូវរួមគ្នាក្នុងការធ្វើការងារនេះ»។
 

បើគ្មានអ្វីប្រែប្រួលទេ គណៈកម្មាធិការចម្រុះកិច្ចការព្រំដែនកម្ពុជា និងវៀតណាម នឹងចុះហត្ថលេខាលើកិច្ចព្រមព្រៀង ស្តីពីព្រំដែនទ្វេភាគី ៦ភាគរយបន្ថែមទៀត នៅក្នុងអំឡុងឆ្នាំ២០២២នេះ។
  

លោកស្រី​ កុយ ពិសី ​អនុប្រធាន​គណៈកម្មាធិការ​ចម្រុះ​ព្រំដែនកម្ពុជា​​ ធ្លាប់បានបញ្ជាក់ថា បន្ទាត់ព្រំដែនដែលភាគីទាំងពីរសម្រេចបាន៦ភាគរយបន្ថែមទៀតនេះ គឺស្ថិតនៅក្នុងខេត្តមណ្ឌលគិរី រតនគិរី ត្បូងឃ្មុំ ស្វាយរៀង និងតាកែវ ។
 

បើអាចសម្រេចបានបង្គោលព្រំដែន៦ភាគរយមែន កម្ពុជា និងវៀតណាម មានខ្សែបន្ទាត់ព្រំដែនជាផ្លូវការ ស្មើនឹង៩០ភាគរយ ។