ជាតិ
តើហេតុអ្វីចាំបាច់មានកិច្ចពិភាក្សាជុំវិញសៀវភៅ«ក្តីសង្ឃឹម ហ៊ុន ម៉ានី»?
×
ភ្នំពេញ៖ កិច្ចពិភាក្សាជុំវិញសៀវភៅ«ក្តីសង្ឃឹម ហ៊ុន ម៉ានី» គ្រោងនឹងធ្វើឡើងនៅកណ្តាលទីក្រុងសៀមរាប (ទីក្រុងប្រាសាទ) នៃខេត្តសៀមរាប នៅថ្ងៃទី១០ខែសីហាឆ្នាំ២០២២ នៅមជ្ឈមណ្ឌលកម្សាន្ត The Heritage Walk។ ជំនួបពិភាក្សានេះ នឹងអនុញ្ញាតឲ្យមហាជន ជាពិសេស យុវជនចូលរួមស្តាប់ និងចោទសំណួរ ទៅកាន់វាគ្មិនដោយសេរី។ លោក ហ៊ុន ម៉ានី ជាតួអង្គ, លោក លាង ដឺលុច អ្នកនិពន្ធ និងលោក ហ្សង់-ហ្រ្វង់ស័រ តាន់ ជាវាគ្មិនកិតិ្តយស នឹងចូលរួមកិច្ចពិភាក្សាខាងលើនេះ។ រីឯលោក ប៉ែន បូណា ដែលជាប្រធានក្លិបអ្នកកាសែតកម្ពុជា និងជានិពន្ធនាយកព័ត៌នៃទូរទស្សន៍ PPN គឺជាអ្នកសម្របសម្រួលកិច្ចពិភាក្សា។--
«កុំវិនិច្ឆ័យសៀវភៅ តាមរយៈគម្របរបស់វា»។ នេះ គឺជាទស្សនទានដ៏ទូលំទូលាយ ដែលត្រូវបានគេលើកឡើង និងយកមកនិយាយតៗគ្នាជារៀងរហូត។ ដោយផ្អែកលើគំនិតនេះហើយ ទើបសារព័ត៌មានឌីជីថល Thmeythmey.com សម្រេចចិត្តរៀបចំកិច្ចពិភាក្សា ដ៏កម្រមួយនេះឡើង។
តាមទម្លាប់ នៅកម្ពុជា ក្រោយការសរសេរ និងបោះពុម្ពសៀវភៅ គេកម្រឃើញអ្នកនិពន្ធ និងតួអង្គជជែកគ្នាជាសាធារណៈ នៅចំពោះមុខអ្នកសារព័ត៌មានណាស់។ កិច្ចពិភាក្សាជុំវិញសៀវភៅ«ក្តីសង្ឃឹម ហ៊ុន ម៉ានី» គឺជាវេទិកាជជែកដេញដោលជាសាធារណៈមួយ ជាមួយមហាជន និងជាមួយអ្នកសារព័ត៌មាន នៅទីក្រុងសៀមរាប នៅថ្ងៃទី១០ ខែសីហា ឆ្នាំ២០២២ ដោយចាប់ផ្តើមពីម៉ោង៩ព្រឹក នៅមជ្ឈមណ្ឌលកម្សាន្តThe Heritage Walk។
តើហេតុអ្វីចាំបាច់មានកិច្ចពិភាក្សាជុំវិញសៀវភៅ«ក្តីសង្ឃឹម ហ៊ុន ម៉ានី»?
លោក គី សុខលីម តំណាងក្រុមហ៊ុនសារព័ត៌មានឌីជីថល Thmeythmey ដែលជាអ្នករៀបចំកិច្ចពិភាក្សា បានលើកឡើងថា ជំនួបតួអង្គ និងអ្នកនិពន្ធរបៀបនេះ គឺមានសារៈសំខាន់ណាស់ ពីព្រោះ វេទិកានេះ នឹងអនុញ្ញាតឲ្យអ្នកបានអានសៀវភៅរួចហើយ ឬអ្នកមិនទាន់បានអាន អាចចូលរួមសួរដេញដោលទៅកាន់តួអង្គ និងវាគ្មិនដោយសេរី។
«ពិភាក្សាគ្នាជុំវិញគុណភាពនៃសំណេរ និងគុណភាពនៃខ្លឹមសារសៀវភៅ គឺជារឿងចាំបាច់បំផុត សម្រាប់សហគមន៍អ្នកសំណេរ និងអ្នកនិពន្ធ។ ចូរកុំវិនិច្ឆ័យសៀវភៅ តាមរយៈគម្របរបស់វា»។ នេះ គឺជាការបញ្ជាក់បន្ថែមរបស់លោក គី សុខលីម៕
© រក្សាសិទ្ធិដោយ thmeythmey.com