រូបសំណាកព្រះថោងនាងនាគ ធ្វើពីស្ពាន់កម្ពស់២១ម៉ែត្រ ត្រូវបានដាក់សម្ពោធជាផ្លូវការ កាលពីថ្ងៃទី១៦មេសា ឆ្នាំ២០២២ នៅរង្វង់មូលប្រសព្វគ្នារវាងមហាវិថីឆ្នេររាម និងមហាវិថីជំទាវម៉ៅ ដែលនៅជិតផ្លូវឡើងទៅស្លាកខ្មែរធ្វើបាន ខេត្តព្រះសីហនុ។ បច្ចុប្បន្នរូបសំណាកនេះ ចាប់ផ្ដើមមានស្និមកាន់ ដោយសារចំហាយទឹកសមុទ្រ។

 

លោក​ គួច ចំរើន អភិបាលខេត្តព្រះសីហនុ បានបង្ហោះលើទំព័រហ្វេសរបស់លោក បង្ហាញពីបញ្ហាស្និមកាន់រូបសំណាកព្រះថោងនាងនាគនេះ ជាសាធារណ។ លោក គួច ចំរើន អនុញ្ញាតឱ្យអ្នកមានជំនាញ និងអ្នកមានបទពិសោធសម្អាតស្និមពីស្ពាន់ ចូលរួមមតិដើម្បីយកជាគំនិតសម្រាប់សម្អាតរូបសំណាកនេះ។

 

« ប្រិយមិត្តណា​ មានជំនាញ​ មានបទពិសោធ ព្រះបាទព្រះថោង​ ធ្វើពីស្ពាន់​ ចាក់បេតុងខាងក្នុង​ ពេលត្រូវខ្យល់សមុទ្រ​ ចេញស្និមដូចនេះ​ ។ តើមានវិធីបែបណា​ ដើម្បីការពារ​ ទប់ទល់អោយបានល្អ​ មិនចេញស្និម​។ សូមជួយផ្ដល់យោបល់​ ! សូមអរគុណចំពោះការចែករំលែក​ »។ លោកអភិបាលខេត្តសុំជំនួយជាគំនិតតាមហ្វេសប៊ុកដូច្នេះ។

 

ជាមួយគ្នានេះ អភិបាលរងខេត្តព្រះសីហនុ លោក ឡុង​ ឌីម៉ង់ បានបញ្ជាក់ប្រាប់សារព័ត៌មានThmeyThmey25ថា ស្និមនោះមិនទាន់បង្កផលប៉ះពាល់ខ្លាំងដល់រូបសំណាក ព្រះថោងនាងនាគនោះទេ។

ប៉ុន្តែរដ្ឋបាលខេត្តចង់ឱ្យ អ្នកមានពិសោធបញ្ចេញគំនិតសម្រាប់សម្អាត ដែលបង្ហាញពីការស្រឡាញ់ និងថែរក្សា ព្រោះរូបសំណាកនោះជាសម្បត្តិប្រជាជនខ្មែរ។​

លោក ឡុង ឌីម៉ង់ បញ្ជាក់ដូច្នេះ៖ «ការបង្ហោះររបស់អភិបាលខេត្តគឺចង់ឱ្យមានការចូលរួមមាតិ យោបល់ និងស្វែងរកគំនិតល្អៗ ពីប្រជាពលរដ្ឋដែលមានពិសោធ ធ្លាប់មានជំនាញ ក្នុងការថែទាំស្ពាន់ ព្រោះស្ពាន់នេះយើងបានចាក់តាមពុម្ព និងរចនាបថស្ថាបត្យកម្មខ្មែរ។ រូបសំណាកនេះនៅមាត់សមុទ្រ ដែលចំមុខខ្យល់ពីសមុទ្រ មានចំហាយទឹកសមុទ្រប្រៃ និងស្ងួត។ ស្និមក៏ដុះនៅលើស្ពាន់  ដូច្នេះរដ្ឋបាលត្រូវការថែទាំ​ និងសម្អាត។

 

អភិបាលខេត្តចង់ឱ្យមានការចូលរួមថែទាំ ព្រោះក្នុងនាមយើងជាកូនខ្មែរគឺស្រឡាញ់រូបសំណាក។ រូបសំណាកនេះ ជាសម្បត្តិរបស់ខ្មែរ»។

យ៉ាងណាមិញ លោក លី រស្មី រដ្ឋលេខាធិការក្រសួងដែនដី នគ​រូបនីយកម្ម និងសំណង់ ប្រាប់សារព័ត៌មានThmeyThmey25 ថា អ្នកជំនាញនឹងសម្អាតស្និមចេញពីរូបសំណាកព្រះថោងនាងនាគ តាមបច្ចេកទេស​ពេលផុតរដូវវស្សា ព្រោះភ្លៀងធ្វើឱ្យក្រុមជាងពិបាកសម្អាតរូបសំណាក។

 

លោក លី រស្មី ពន្យល់ដូច្នេះ ៖« គេមានថ្នាំលាបស្ពាន់ នៅពេលដុះខាត់ជាតិកំបោរ ដែលចេញពីបេតុងយើងបានចាក់ពីខាងក្នុង ដើម្បីឱ្យរូបសំណាកនោះឈរបាន។ យើងយកប្រដាប់ខាត់ ខាត់កំបោរនោះចេញ ហើយលាបថ្នាំវ៉ាក់នី(ថ្នាំលាបឈើឬស្ពាន់) ដូច្នេះស្ពាន់នោះអាចនៅបាន១ឆ្នាំអីទៀត។​

យើងនឹងសម្អាតក្នុងពេលឆាប់ៗនេះ ដោយសារភ្លៀងច្រើន​ពិបាកធ្វើ តែក្រុមការងារកំពុងគិតគូរសម្រាប់ការសម្អាត»។ 

 

សូមជម្រាបថាក្នុងខេត្តព្រះសីហនុមានរូបសំណាកធ្វើពីស្ពាន់ធំៗចំនួន៤ ដូចជា ព្រះសីហរាជមុខ៣ ព្រះឧមា-មហេសូរ និង រូបសំណាកព្រះថោង នាងនាគ និងរូបព្រះស្កន្ទ។ រូបសំណាកទាំង៤នេះ ត្រូវបានចំណាយថវិកាធ្វើជាង ២លានដុល្លារអាម៉េរិក៕