ជាតិ
សង្គមជាតិ
សេដ្ឋកិច្ច
លោក ឌិន សុមេធារិទ្ធ ដែលជាម្ចាស់ជំនួញ «ភូមិផ្កាត្រកួន» ។ ប្រភព៖ ហ្វេសប៊ុកលោក ឌិន សុមេធារិទ្ធ
×![]()
ដោយ: លីម តុលា
ភ្នំពេញ៖ កាលពីដើមឡើយ ពាក្យជោគជ័យ ត្រូវបានគេប្រើប្រាស់ក្នុងន័យល្អទេ។ ឧទាហរណ៍ អ្នកជោគជ័យ ឬធ្វើកិច្ចការអ្វីមួយជោគជ័យ។ ប៉ុន្តែក្រោយមក អ្នកប្រើប្រាស់ពាក្យបានបន្ថែមពាក្យ«គ្រូ»នៅពីមុខពាក្យ«ជោគជ័យ»ក្នុងន័យនិយាយឌឺដងទៅកាន់គ្រូជោគជ័យមួយចំនួន ដែលបានសាបព្រោះគំនិតជោគជ័យមិនល្អរបស់ពួកគេ ទៅកាន់សិក្ខាកាម។ នៅថ្ងៃទី២៨ ខែកក្កដា ឆ្នាំ២០២២នេះ អ្នកជំនួញ និងជាវាគ្មិនបណ្តុះបណ្តាលសហគ្រិនឲ្យជោគជ័យ លោក ឌិន សុមេធារិទ្ធ បានចេញមុខការពារតម្លៃនៃពាក្យ«គ្រូជោគជ័យ»ជាសាធារណៈ។ 
«ហៅគ្រូជោគជ័យប្រសើរ ជាងហៅគ្រូបរាជ័យ»។ នេះ គឺជាប្រតិកម្មជាសាធារណៈ នៅលើទំព័រហ្វេសប៊ុករបស់លោក ឌិន សុមេធារិទ្ធ នៅថ្ងៃទី២៨ ខែកក្កដា ឆ្នាំ២០២២។ លោក សុមេធារិទ្ធ ដែលជាម្ចាស់ជំនួញ «ភូមិផ្កាត្រកួន» និងជាវាគ្មិនបណ្តុះបណ្តាលសហគ្រិនឲ្យជោគជ័យ ប្រហែលជាធុញទ្រាន់នឹងពាក្យដៀមដាម«គ្រូជោគជ័យ»ហើយ ទើបលោកចេញមុខការពារពាក្យនេះ ក្នុងន័យវិជ្ជមានវិញ។
លោក ឌិន សុមេធារិទ្ធ ដែលជាអ្នកជំនួញចូលចិត្តលេងសម្តីដែរនោះ បានសរសេរនៅលើទំព័រហ្វេសប៊ុករបស់លោកថា៖ «ខ្ញុំបង្រៀនសហគ្រិនឲ្យជោគជ័យ ខ្ញុំរីករាយជាមួយពាក្យ [គ្រូជោគជ័យ] ព្រោះខ្ញុំចង់ឲ្យកូនខ្មែរក្លាយជាបុគ្គលជោគជ័យក្នុងជីវិត»។ លោក សុមេធារិទ្ធ បានបន្តទៀតថា៖ «ទោះក្នុងកាលៈទេសៈណាក៏ដោយ ទោះបីជាខ្ញុំធ្លាប់ជួបរឿងបរាជ័យរាប់មិនអស់ក៏ដោយ ក៏ខ្ញុំមិនចង់ឲ្យគេហៅខ្ញុំថា គ្រូបរាជ័យទេ។ សូមបងប្អូនប្រើពាក្យជោគជ័យ ឲ្យសមនឹងបុគ្គលជោគជ័យពិតប្រាកដ មិនក្លែងក្លាយ»។
ទាក់ទងទៅនឹងពាក្យ «គ្រូជោគជ័យ» នេះដែរ លោក ប៉ិច បូឡែន អគ្គនាយកក្រុមហ៊ុន វេសឡាញ ធ្លាប់បានសរសេរសារនៅលើទំព័រហ្វេសប៊ុករបស់ខ្លួន ដោយសំណូមពរទៅកាន់មហាជនមួយចំនួន ឱ្យឈប់យកពាក្យ «គ្រូជោគជ័យ» ទៅនិយាយជាការលេងសើច និងចំអកដល់គ្រូបណ្ដុះបណ្ដាល គ្រូបង្វឹក អ្នកប្រឹក្សាយោបល់ ឬអ្នកចែករំលែកចំណេះដឹងផ្សេងៗជាដើម។
សូមបញ្ជាក់ថា ពាក្យ «គ្រូជោគជ័យ» ត្រូវបានគេប្រើប្រាស់ច្រើន ក្នុងរយៈពេលចុងក្រោយនេះ ពោល គឺបន្ទាប់ពីមានគ្រូបណ្តុះបណ្តាលមួយចំនួន បើកបង្រៀនវគ្គជោគជ័យដល់សិក្ខាកាមដោយមិនគោរពក្រមសីលធម៌ជំនួញ។ ដោយសារតែទង្វើនេះ ទើបពាក្យ «គ្រូជោគជ័យ» ត្រូវបានគេប្រើប្រាស់ដើម្បីឌឺដង ទៅកាន់គ្រូបណ្តុះបណ្តាលផ្នែកជំនួញដែលខ្វះក្រមសីលធម៌៕
© រក្សាសិទ្ធិដោយ thmeythmey.com
