ក្រុមប្រទេសមានសេដ្ឋកិច្ចរីកចម្រើនទាំង៧ (G7) ដោយមានជប៉ុនជាសមាជិកផង នៅថ្ងៃទី៣ ខែសីហា បានចេញសេចក្តីថ្លែងការណ៍មួយ ដោយបង្ហាញពីក្តីបារម្ភជុំវិញសមយុទ្ធយោធារបស់ចិននៅជុំវិញតៃវ៉ាន់ ដែលអាចបង្កឱ្យភាពតានតឹងកាន់តែធំឡើង។ 

 

បន្ទាប់ពីសេចក្តីថ្លែងការណ៍នោះ ក្រសួងការបរទេសចិន បានប្រកាសលុបចោលជំនួបទ្វេភាគីរវាងរដ្ឋមន្រ្តីការបរទេសចិន លោកវ៉ាង យី ជាមួយសមភាគីជប៉ុន លោក យ៉ូស៊ីម៉ាសា ហាយ៉ាស៊ី នៅក្រុងភ្នំពេញ នៅក្រៅកិច្ចប្រជុំថ្នាក់រដ្ឋមន្រ្តីការបរទេសអាស៊ាន។ 

 

«ចិននឹងមិនរៀបចំកិច្ចប្រជុំរវាងរដ្ឋមន្រ្តីការបរទេសចិន និងជប៉ុន នៅក្រៅកិច្ចប្រជុំអាស៊ាននៅកម្ពុជាទេ»។ លោកស្រី Hua Chunying អ្នកនាំពាក្យក្រសួងការបរទេសចិន បានថ្លែងបែបនេះ នៅថ្ងៃទី៤ ខែសីហា ដោយបន្ថែមថា ចិនជំទាស់ជាដាច់ខាតចំពោះសេចក្តីថ្លែងការណ៍របស់ក្រុមប្រទេស G7។ នេះបើតាមការចុះផ្សាយរបស់ទូរទស្សន៍ CGTN។ 
 

 

កន្លងមក ទីភ្នាក់ងារព័ត៌មានជប៉ុន Kyodo បានស្រង់ប្រភពមន្រ្តីជប៉ុនថា ប្រមុខការទូតជប៉ុន និងចិន អាចជួបគ្នានៅក្រៅកិច្ចប្រជុំអាស៊ាន នៅថ្ងៃទី៤ ខែសីហា៕