ស្ថានការណ៍នយោបាយជាងរយៈពេលមួយឆ្នាំមកនេះ កាន់តែមានភាពស្មុគស្មាញបន្ទាប់ពីយោធាមីយ៉ាន់ម៉ា បានអនុវត្តទោសប្រហារជីវិតលើសមាជិកប្រឆាំងចំនួន ៤រូប រួមទាំងមានការប៉ះទង្គិចរវាងយោធា និងកម្លាំងការពារប្រជាជន (PDF) របស់រដ្ឋាភិបាលបង្រួបបង្រួមជាតិមីយ៉ាន់ម៉ា (NUG) 

 

ស្របពេលការអនុវត្តការព្រមព្រៀងឯកច្ឆន្ទ៥ចំណុច មិនមានភាពរីកចម្រើន រដ្ឋមន្រ្តីការបរទេសម៉ាឡេស៊ី ក្នុងអំឡុងទស្សនកិច្ចនៅថៃ បានអំពាវនាវឱ្យអាស៊ានគាំទ្រប្រជាជនមីយ៉ាន់ម៉ា និងភ្ជាប់ទំនាក់ទំនងជាមួយក្រុមប្រឆាំងយោធា រួមទាំងរដ្ឋាភិបាលស្រមោលមីយ៉ាន់ម៉ា។ 

 

«ពេលនេះ វាមានតែភាគីតែម្ខាងប៉ុណ្ណោះ។ យើង(អាស៊ាន) មានទំនាក់ទំនងតែជាមួយរបបយោធាប៉ុណ្ណោះ»។ ប្រមុខការទូតម៉ាឡេស៊ី បានថ្លែងប្រាប់អ្នកសារព័ត៌មានបែបនេះ​ ដោយបន្តថារដ្ឋមន្រ្តីការបរទេសអាស៊ាននៅសប្តាហ៍មុន បានពិភាក្សាលទ្ធភាពស្វែងរកភាគីទី៣ ដើម្បីជួយអាស៊ាន ក្នុងដំណើរការស្វែងរកសន្តិភាពនៅមីយ៉ាន់ម៉ាផងដែរ ព្រោះអាស៊ានមិនអាចធ្វើរឿងនេះតែម្នាក់ឯងបានទេ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។ 

 

ទន្ទឹមនេះ លោក Saifuddin ក៏បានយល់ឃើញផងដែរថា ប្រេសិតពិសេសរបស់ប្រធានអាស៊ាន គួរតែមានអាណត្តិលើសពីមួយឆ្នាំ ដើម្បីបំពេញការងារឱ្យាមានប្រសិទ្ធភាព។ 

 

កន្លងមក អាស៊ាន បានបង្ហាញការខកចិត្តយ៉ាងខ្លាំង ចំពោះស្ថានការណ៍នយោបាយមីយ៉ាន់ម៉ា ហើយថែមជំរុញឱ្យវាយតម្លៃពីការអនុវត្តរបស់យោធាមីយ៉ាន់ម៉ា ចំពោះការឯកភាព ៥ចំណុច ដែលបានដាក់ចេញដោយមេដឹកនាំអាស៊ាន នៅក្នុងខែមេសា កន្លងមកថែមទៀត។ 

 

ជាការឆ្លើយតប យោធាមីយ៉ាន់ម៉ា បានបានចេញសេចក្តីថ្លែងការណ៍មួយជំទាស់សេចក្តីថ្លែងការណ៍រដ្ឋមន្រ្តីការបរទេសអាស៊ាន។ បើតាមយោធាមីយ៉ាន់ម៉ា ខ្លួននឹងបន្តគោរពតាមផែនការប្រាំចំណុចមីយ៉ាន់ម៉ា ដែលដាក់ចេញនាពេលកន្លងមក។ 

 

កម្ពុជា នៅថ្ងៃទី១១ ខែសីហា បានបញ្ចេញសេចក្តីថ្លែងការណ៍រួមរបស់ប្រធានអាស៊ានជុំវិញកិច្ចប្រជុំថ្នាក់រដ្ឋមន្រ្តីការបរទេសអាស៊ីបូព៌ា និងរដ្ឋមន្រ្តីការបរទេសអាស៊ានបូកបី។ សេចក្តីថ្លែងការណ៍ទាំងពីរនេះ បានបញ្ជាក់ដូចគ្នាថា កិច្ចប្រជុំឯកភាពឱ្យប្រេសិតពិសេសអាស៊ាន គួរតែភ្ជាប់ទំនាក់ទំនងជាមួយគ្រប់ភាគីពាក់ព័ន្ធទាំងអស់ឱ្យបានឆាប់រហ័ស៕