ជាតិ
បាក់ឌុប៖ រដ្ឋមន្រ្តីអប់រំ អំពាវនាវដល់សណ្ឋាគារ និងភោជនីយដ្ឋាន ជួយសម្រួលដល់បេក្ខជនប្រឡង
× ភ្នំពេញ៖ ក្នុងសន្និសីទសារព័ត៌មានស្ដីពីការប្រឡងសញ្ញាបត្រមធ្យមសិក្សាទុតិយភូមិ នៅព្រឹកថ្ងៃទី២១ វិច្ឆិកា លោក ហង់ជួន ណារ៉ុន បានអំពាវនាវដល់សណ្ឋាគារ កន្លែងស្នាក់នៅ និងភោជនីយដ្ឋាន កន្លែងលក់អាហារផ្សេងៗ ជួយសម្រួលដល់បេក្ខជនដែលមកពីតាមឃុំ ស្រុក ដើម្បីឱ្យពួកគេអាចស្នាក់នៅ និងទទួលទានបានស្រួល។
ដើម្បីឱ្យដំណើរការនៃការប្រឡងសញ្ញាបត្រមធ្យមសិក្សាទុតិយភូមិ ប្រព្រឹត្តទៅដោយរលូន ត្រូវការចូលរួមពីភាគីពាក់ព័ន្ធ។ លោក ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា លើកឡើងដូច្នេះ៖«សូមអំពាវនាវ សូមឱ្យសណ្ឋាគារ ក៏ដូចជាកន្លែងស្នាក់នៅ ភោជនីយដ្ឋាន កន្លែងលក់អាហារផ្សេងៗ សូមជួយសម្រួលដល់បេក្ខជន ដែលមកពីតាមឃុំ ស្រុក ដើម្បីធានាសុវត្ថិភាពចរាចរណ៍នៅតាមដងផ្លូវ និងភាពងាយស្រួលនៅក្នុងការស្នាក់នៅ និងហូបចុកដល់បេក្ខជន»។
ជាមួយគ្នានេះ លោក ហង់ជួន ណារ៉ុន ក៏បានស្នើដល់សិស្សានុសិស្សដែលចូលរួមប្រឡង ត្រូវទទួលទានអាហារ និងគេងឱ្យបានគ្រប់គ្រាន់ ដោយកាត់បន្ថយអារម្មណ៍ធុញថប់ តានតឹង និងភ័យព្រួយ។ បន្ថែមពីនេះ លោករដ្ឋមន្រ្តី មិនភ្លេចក្រើនរំឭកដល់បេក្ខជនឱ្យគោរពនូវបទប្បញ្ញត្តិ ដោយមិនត្រូវយកសំណៅឯកសារចូលមណ្ឌលប្រឡងឡើយ។
ក្នុងសន្និសីទសារព័ត៌មាន រដ្ឋមន្រ្តីក្រសួងអប់រំ បានរំលេចពីការពង្រឹងកិច្ចសហការជាមួយក្រសួង-ស្ថាប័នចំនួន ៦ រួមមាន ក្រសួងមហាផ្ទៃ, ក្រសួងសុខាភិបាល, កងរាជអាវុធហត្ថលើផ្ទៃប្រទេស, អង្គភាពប្រឆាំងអំពើពុករលួយ, សហភាពសហព័ន្ធយុវជនកម្ពុជា និងអគ្គិសនីកម្ពុជា ដែលតែងចូលរួមជាមួយក្រសួងអប់រំ។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៥ ធ្នូ ២០២២នេះ មានបេក្ខជនប្រឡងចំនួន ១២៨ ១៣៤នាក់ និងមានមណ្ឌលប្រឡង ២២១ ស្មើនឹង៥១៧៤បន្ទប់។ សម្រាប់ថ្ងៃប្រកាសលទ្ធផល ក្រសួងអប់រំ កំណត់យកថ្ងៃទី ២៧ ធ្នូសម្រាប់រាជធានីភ្នំពេញ និងខេត្តកណ្ដាល និងថ្ងៃទី២៨ ធ្នូ សម្រាប់ខេត្តផ្សេងៗ៕
Tag:
អប់រំ
បាក់ឌុប
សណ្ឋាគារ
កន្លែងស្នាក់នៅ
© រក្សាសិទ្ធិដោយ thmeythmey.com