ជាតិ
សេដ្ឋកិច្ច
រដ្ឋមន្ត្រីកសិកម្ម៖ ៣ឆ្នាំនេះ កម្ពុជានាំចេញសត្វស្វាជិត ៧ម៉ឺនក្បាល ស្របតាមអនុសញ្ញា CITES ស្វាក្តាម
× ៣ឆ្នាំចុងក្រោយនេះ កម្ពុជាបាននាំចេញសត្វស្វាជិត ៧ម៉ឺនក្បាល ដែលអនុវត្តត្រឹមត្រូវតាមច្បាប់។ នេះបើយោងតាមសំណេររបស់ លោក ឌិត ទីណា រដ្ឋមន្ត្រីកសិកម្ម រុក្ខាប្រមាញ់ និងនេសាទ។
លោក ឌិត ទីណា បានចេញសំណេរនៅគណនីបណ្តាញសង្គមTwiter នាថ្ងៃទី២១ វិចិ្ឆកានេះ ថា ៣ឆ្នាំចុងក្រោយ កម្ពុជាបាននាំចេញសត្វស្វាចំនួន ៦៨ ០៧៦ក្បាល ដែលស្របតាមអនុសញ្ញាស្តីពីការហាមប្រាមការធ្វើពាណិជ្ជកម្មអន្តរជាតិលើប្រភេទសត្វ និងរុក្ខជាតិព្រៃដែលប្រឈមនឹងការជិតផុតពូជ (CITES)។
លោកបន្តរៀបរាប់យ៉ាងដូច្នេះ៖ «ស្វាដែលអាម៉េរិកយល់ថាជាសត្វកម្រនោះ គឺ[ត្រូវ]គេស្គាល់យ៉ាងទូលំទូលាយសម្រាប់ប្រជាជនកម្ពុជាថា ជាស្វាវត្តភ្នំ»។
បើតាមលោក ឌិត ទីណា សត្វស្វាដែលកម្ពុជាបាននាំចេញកន្លងមកនេះ គឺជាសត្វដែលត្រូវបានគេបង្កាត់ពូជ និងចិញ្ចឹមឡើង សម្រាប់នាំចេញ ក្នុងគោលដៅបម្រើដល់ការស្រាវជ្រាវផ្នែកវេជ្ជសាស្រ្ត។
ជាមួយគ្នានេះ លោក ឌិត ទីណា បានចោទជាសំណួរវិញថា៖ «ស្វាក្តាម ដែលគេស្គាល់ថាស្វាវត្តភ្នំ គឺជាប្រភេទ«ជិតផុតពូជ»នៅក្នុងឧបសម្ព័ន្ធទី២នៃអនុសញ្ញាCITES ដែលយើងគោរពតាមអនុសញ្ញានេះ។ ចុះតើកម្ពុជាធ្វើដូចម្តេចអាចនាំចេញ[ស្វាយ]បានដល់១ម៉ឺន៧ពាន់[ក្បាល]ក្នុងមួយឆ្នាំ? [ចម្លើយ] គឺយើងចិញ្ចឹមពួកវា!»។
ការលើកឡើងរបស់រដ្ឋមន្ត្រីក្រសួងកសិកម្មរូបនេះ ក្រោយពីអាជ្ញាធរអាម៉េរិក បានឃាត់ខ្លួនលោក គ្រី ម៉ះផល ប្រធាននាយកដ្ឋានសត្វព្រៃ និងជីវចម្រុះនៃរដ្ឋបាលព្រៃឈើក្រសួងកសិកម្ម កាលពីថ្ងៃទី១៧ វិច្ឆិកា ឆ្នាំ២០២២ ក្រោមបទចោទ« រត់ពន្ធខុសច្បាប់ និងការសមគំនិតគ្នា បំពាន់ច្បាប់ (Lacey Act) និងច្បាប់ជិតផុតពូជ (Endangered Species Act)»។
របាយការណ៍ស្ដីពី សភាពការណ៍កសិកម្ម រក្ខាប្រមាញ់ និងនេសាទ ប្រចាំខែតុលា ឆ្នាំ២០២២ និងទិសដៅអនុវត្តបន្ត របស់ក្រសួងកសិកម្មបានបង្ហាញ ថា កម្ពុជា មានកសិដ្ឋានបង្កាត់ស្វាក្ដាម៦ទីតាំង ដែលមានស្វាក្ដាមជិត១៤ម៉ឺនក្បាល។ ដោយឡែក នៅក្នុងខែតុលា គឺមានកូនស្វា ជាង៤ពាន់ក្បាល។
កសិដ្ឋានបង្កាត់ពូជស្វាក្ដាមទាំង៦ទីតាំងនោះ គឺមាននៅរាជធានីភ្នំពេញ ខេត្តកំពង់ធំ សៀមរាប កំពង់ចាម កំពង់ស្ពឺ ពោធិ៍សាត់ និងខេត្តកំពង់ឆ្នាំង ។ របាយការណ៍ដដែលបានបង្ហាញថា ប្រចាំខែតុលាឆ្នាំ២០២២ ក្រសួងកសិកម្មបានចេញលិខិតអនុញ្ញាតដឹកជញ្ជូនសត្វព្រៃជូនក្រុមហ៊ុនចំនួន២ច្បាប់ ដែលមានស្វាក្ដាមចំនួន១៤៨៨ក្បាល៕
Tag:
កសិកម្ម
ស្វា
លោក ឌិត ទីណា
© រក្សាសិទ្ធិដោយ thmeythmey.com