អន្តរជាតិ
×![]()
ដោយ: ធីតា
វៀតណាមទទួលបានភ្ញៀវទេសចរអន្តរជាតិជាង២,៩៥លាននាក់នៅរយៈពេល១១ខែកន្លងមកនៃឆ្នាំ២០២២។ របាយការណ៍ពីការិយាល័យស្ថិតិទូទៅរបស់វៀតណាម បង្ហាញថា ភ្ញៀវពីកម្ពុជាស្ថិតនៅចំណាត់ថ្នាក់លេខ៣ បន្ទាប់ពីកូរ៉េខាងត្បូង និងសហរដ្ឋអាម៉េរិក។
គិតត្រឹមតែក្នុងខែវិច្ឆិកា វៀតណាមទទួលបានភ្ញៀវបរទេសជិត៦០ម៉ឺននាក់ ដោយមានកំណើនលើស ៣៩,៧ដង បើប្រៀបធៀបរយៈពេលដូចគ្នា កាលពីអំឡុងឆ្នាំ២០២១។ ដោយឡែក ចំនួនភ្ញៀវបរទេសជាង ២,៩៥លាននាក់ ចន្លោះពីខែមករា ដល់ខែវិច្ឆិកា គឺមានកំណើនលើស ២១,១ដង បើប្រៀបធៀបទៅនឹងឆ្នាំមុន ប៉ុន្តថយចុះ ៨១,៩ភាគរយ បើប្រៀបធៀបទៅមុនឆ្នាំ២០១៩ ពោលគឺមុនការរាតត្បាតកូវីដ-១៩។
ការិយាល័យស្ថិតិទូទៅរបស់វៀតណាម បានបង្ហាញថា ភ្ញៀវបរទេសភាគច្រើនដែលទៅកាន់វៀតណាម ភាគច្រើនជាបណ្តាប្រទេសនៅតំបន់អាស៊ី ដែលមានជាង២លាននាក់ ដោយតាមពីក្រោយដោយ អឺរ៉ុប ដែលមានជិត៤២ម៉ឺននាក់ និងអាម៉េរិក ជាង៣២ម៉ឺននាក់។
បើបែងចែកទៅតាមបណ្តាប្រទេស ភ្ញៀវកូរ៉េខាងត្បូង នាំមុខគេដោយមានជាង៧៦ម៉ឺននាក់ដែលទៅទស្សនាវៀតណាមចន្លោះពីខែមករា ដល់ខែវិច្ឆិកា បន្ទាប់មក អាម៉េរិក មានជិត២៧ម៉ឺននាក់ និងពីកម្ពុជា មានជាង១៧ម៉ឺននាក់។
ក្នុងចំណោមភ្ញៀវបរទេសដែលទៅទស្សនាវៀតណាម មាន៨៨,៩ភាគរយ ធ្វើដំណើរតាមជើងហោះហើរ ប្រមាណ១១ភាគរយ តាមផ្លូវគោក និងមួយចំនួនទៀត តាមផ្លូវទឹក។
គោលដៅរបស់វៀតណាម សម្រាប់ឆ្នាំ២០២២ នេះ គឺការទាក់ទាញទេសចរបរទេសឲ្យបាន៥លាននាក់ តាមរយៈការរៀបចំដំណើរកម្សាន្តជាកញ្ចប់ និងគោលការណ៍ពន្យាទិដ្ឋការ ជាដើម៕
Tag:
(ទេសចរ
វៀតណាម)
© រក្សាសិទ្ធិដោយ thmeythmey.com
