ធនាគារពិភពលោក សម្រេចផ្តល់ឥណទានចំនួន២៧៤លានដុល្លារទៀតឱ្យកម្ពុជា ដើម្បីជួយដល់ការអនុវត្តគោលនយោបាយជំរុញកំណើនសេដ្ឋកិច្ច និងបង្កើនភាពធន់។ បើតាមធនាគារពិភពលោក ហិរញ្ញប្បទាននេះ នឹងទ្រទ្រង់ដល់កំណែទម្រង់របស់រដ្ឋាភិបាលដែលសម្រួលដំណើរការចុះបញ្ជីអាជីវកម្ម, លើកកម្ពស់ការប្រកួតប្រជែង និងពង្រីកលទ្ធភាពទទួលបានហិរញ្ញវត្ថុសម្រាប់សហគ្រាសធុនតូច និងមធ្យម។
ទោះបីសេដ្ឋកិច្ចកម្ពុជាបន្តងើបឡើងវិញពីវិបត្តិកូវីដ-១៩ពិតមែនក្តី ប៉ុន្តែ កម្ពុជានៅតែរងសម្ពាធឬ បរិយាកាសអាក្រក់ពីពិភពលោក។ ភាពអូសបន្លាយសង្រ្គាមនៅប្រទេសអ៊ុយក្រែន, ការធ្លាក់ចុះនៃសេដ្ឋកិច្ចនៅសហរដ្ឋអាម៉េរិក និងកំណើនសេដ្ឋកិច្ចយឺតនៅប្រទេសចិន ដែលទាំងអស់នេះគឺជាកត្តាជះឥទ្ធិពលអវិជ្ជមានមកលើវិស័យពាណិជ្ជកម្មរបស់កម្ពុជាយ៉ាងខ្លាំង។ ទន្ទឹមនេះកម្ពុជាក៏ងាយរងគ្រោះខ្លាំងពីផលប៉ះពាល់នៃការប្រែប្រួលអាកាសធាតុ ផងដែរ ដូចជា៖ ត្រូវប្រឈមនឹងទឹកជំនន់ និងគ្រោះរាំងស្ងួតញឹកញាប់។
ដោយមើលឃើញពីបញ្ហាទាំងអស់នេះ រួមនឹងអត្រានៃភាពក្រីក្រនៅកម្ពុជាបានកើនឡើងដល់២,៨ភាគរយ ដោយរុញមនុស្សប្រហែល៤៦ម៉ឺននាក់ ឱ្យធ្លាក់ក្នុងភាពក្រីក្រវិញព្រោះតែកូវីដ-១៩ ធនាគារពិភពលោក(World Bank) បានអនុម័តផ្តល់កម្ចីចំនួន២៧៤លានដុល្លារទៀតឱ្យកម្ពុជា នៅថ្ងៃ២០ធ្នូ ឆ្នាំ២០២២ ដើម្បីស្តារសេដ្ឋកិច្ច និងបង្កើនភាពធន់របស់ខ្លួន។
យោងតាមសេចក្តីប្រកាសព័ត៌មានរបស់ World Bank ហិរញ្ញប្បទាននេះក្រៅពីទ្រទ្រង់ដល់កំណែទម្រង់នៃដំណើរការចុះបញ្ជីអាជីវកម្ម, លើកកម្ពស់ការប្រកួតប្រជែង និងពង្រីកលទ្ធភាពទទួលបានហិរញ្ញវត្ថុសម្រាប់សហគ្រាសធុនតូច និងមធ្យមហើយនោះ ក៏ជួយបង្កើនភាពធន់នៃសារពើពន្ធ រួមទាំងការកែលម្អការគ្រប់គ្រងភាពជាដៃគូរវាងផ្នែកសាធារណៈនិងឯកជន និងការសម្រួលដល់ការលក់ប័ណ្ណបំណុលរបស់ រដ្ឋាភិបាលក្នុងទីផ្សារក្នុងស្រុក ផងដែរ។ ប្រតិបត្តិការក្រោមហិរញ្ញប្បទាននេះក៏នឹងជួយសម្រួលដល់ការផ្តល់ជំនួយទាន់ពេលវេលាដល់ក្រុមគ្រួសារដែលងាយរងគ្រោះ ក្នុងករណីមានគ្រោះមហន្តរាយធម្មជាតិ ឬវិបត្តិសេដ្ឋកិច្ច ណាមួយកើតឡើង។
លោកស្រី ម៉ារៀម សាលីម ប្រធានគ្រប់គ្រងរបស់ធនាគារពិភពលោកប្រចាំកម្ពុជា បានបញ្ជាក់ដូច្នេះ៖« ប្រតិបត្តិការរបស់ហិរញ្ញប្បទាននេះ នឹងជួយកម្ពុជាក្នុងការជំរុញភាពប្រកួតប្រជែងរបស់ផ្នែកឯកជន, ពង្រឹងស្ថានភាពសារពើពន្ធរបស់កម្ពុជា និងផ្តល់ជំនួយដល់ប្រជាជនងាយរងគ្រោះបំផុតរបស់ខ្លួន»។
កម្ចី ដែលកម្ពុជាទទួលបានពីធនាគារពិភពលោកចំនួន២៧៤លានដុល្លារនេះ គឺបានបន្ថែមពីលើកម្ចី២០០ លានដុល្លារ ដែលឈរលើផែនការរបស់រដ្ឋាភិបាលសម្រាប់ស្តារសេដ្ឋកិច្ចឡើងវិញ ក្រោយសម័យជំងឺរាតត្បាតក្នុងគោលដៅ ស្តារសេដ្ឋកិច្ច កំណែទម្រង់ និងការបង្កើនភាពធន់(Cambodia Relief, Recovery, and Resilience Development Policy Financing) ដែលអនុម័តនៅក្នុងឆ្នាំ២០២១។ World Bank បន្ថែមថា ហិរញ្ញប្បទាននេះនឹងជួយសម្រាលសម្ពាធផ្នែកសារពើពន្ធខ្លះដែលរដ្ឋាភិបាលកំពុងជួបប្រទះ ដោយសារតែមានឱនភាពក្នុងប៉ុន្មានឆ្នាំកន្លងមក។
គិតត្រឹមដំណាច់ត្រីមាសទី៣ ឆ្នាំ២០២២ កម្ពុជាមានបំណុលសាធារណៈសរុប ៩ ៤៧៤លានដុល្លារអាម៉េរិក ក្នុងនោះ កម្ពុជា World Bank ចំនួន៨៥១,៧លានដុល្លារ ស្មើ៩ភាគរយនៃបំណុលសរុប។ នេះបើយោងតាមព្រឹត្តិបត្រស្ថិតិបំណុលសាធារណៈកម្ពុជា របស់ក្រសួងសេដ្ឋកិច្ច និងហិរញ្ញវត្ថុ៕