ជាតិ
បទយកការណ៍ / បទសម្ភាសន៍
បទសម្ភាសន៍
វីដេអូ
លោក យ៉ង សាំងកុមារ៖ តំណែង និងបុណ្យសក្តិ មិនមែនជាគោលបំណងខ្ញុំទេ តែជាឱកាសជួយកសិករ
× ភ្នំពេញ៖ លោក យ៉ង សាំងកុមារ អះអាងថា តំណែង និងបុណ្យសក្តិ មិនមែនជាគោលបំណងលោកនោះទេ តែជាឱកាសជួយកសិករ។ ក្នុងរយៈពេលជិត២ខែ ដែលរួមរស់ជាមួយគណបក្សប្រជាជនកម្ពុជា លោក យ៉ង សាំងកុមារ បានធ្វើការងារជាច្រើន ដោយជួបជាមួយកសិករ រោងម៉ាស៊ីន និងក្រុមហ៊ុនផ្សេងៗពាក់ព័ន្ធនឹងរឿងស្រូវអង្ករ។
ដើម្បីជ្រាបច្បាស់ សូមអញ្ជើញទស្សនាបទសម្ភាសរវាងអ្នកស្រី ញឹក ស្រីល័ក្ខ អ្នកសារព័ត៌មានថ្មីៗ ជាមួយលោក យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទដូចតទៅ៖
លោក យ៉ង សាំងកុមារ ដែលជាអតីតស្ថាបនិកគណបក្សប្រជាធិបតេយ្យមូលដ្ឋាន កំពុងមមាញឹកចុះជួបកសិករ រោងម៉ាស៊ីន និងក្រុមហ៊ុននានាពាក់ព័ន្ធនឹងស្រូវអង្ករ ក្រោយចូលរួមជាមួយរដ្ឋាភិបាល។ ជិត២ខែមកហើយ ដែលបណ្ឌិតកសិកម្មរូបនេះ ចូលមកបម្រើកសិករ ដើម្បីលើកស្ទួយវិស័យកសិកម្ម។
លោក យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លើកឡើងជុំវិញការទទួលតំណែងដូច្នេះ៖ «វាជាកិត្តិយស និងជាឱកាសសម្រាប់ខ្ញុំ ដែលបានទទួលតំណែងក្នុងការបំពេញតួនាទី ក្នុងវិស័យកសិកម្ម។ វាជាមធ្យោបាយសម្រាប់ខ្ញុំ ដើម្បីអាចប្រើប្រាស់តួនាទី និងសិទ្ធិអំណាច ក្នុងការជួយដល់កសិករ»។
ក្នុងបេសកកម្មជាមួយរដ្ឋាភិបាល លោក យ៉ង សាំងកុមារ មានការងារស្នូលសំខាន់ គឺផ្ដោតលើការកសាងប្រព័ន្ធផលិតកម្ម និងទីផ្សារស្រូវអង្ករ។ មុននឹងចូលរួមជាមួយរដ្ឋាភិបាល រដ្ឋលេខាធិការរូបនេះ ក៏បានដាក់សំណើ ១២ចំណុច ទៅកាន់រដ្ឋាភិបាល ដើម្បីដោះស្រាយបញ្ហាស្រូវអង្ករកម្ពុជាផងដែរ។
«ខ្ញុំច្បាស់នឹងខ្លួនឯង។ ហើយខ្ញុំមិនដែលផ្លាស់ប្ដូរនូវទឹកចិត្តជាកសិកម្មនិយម។ គោលបំណងរបស់ខ្ញុំ មិនមែនតំណែង តួនាទី បុណ្យសក្តិនោះទេ ប៉ុន្តែគឺធ្វើយ៉ាងណាជួយកសិករ និងវិស័័យកសិកម្មរីកចម្រើន»។ នេះជាការបញ្ជាក់របស់លោក យ៉ង សាំងកុមារ ពាក់ព័ន្ធនឹងបំណងដែលចូលរួមជាមួយរដ្ឋាភិបាល។
បច្ចុប្បន្ន លោក យ៉ង សាំងកុមារ មានតំណែង ៣ក្នុងដៃ រួមមាន តំណែងជារដ្ឋមន្ត្រីប្រតិភូអមនាយករដ្ឋមន្ត្រី, ជារដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាអនុប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ។ ចំពោះតំណែងទាំង៣នេះ ក៏ជួយឱ្យលោកអាចធ្វើការជាមួយភាគីពាក់ព័ន្ធមានប្រសិទ្ធភាពផងដែរ៕
Tag:
កសិកម្ម
យ៉ង សាំងកុមារ
© រក្សាសិទ្ធិដោយ thmeythmey.com