ជាតិ
សង្គមជាតិ
សម្តេច ហ៊ុន សែន ទទូចកុំឱ្យប្រើគ្រាប់បែកចង្កោមក្នុងសង្រ្គាមអ៊ុយក្រែន-រុស្ស៊ី
× ភ្នំពេញ៖ សម្តេច ហ៊ុន សែន នាយករដ្ឋមន្ត្រីកម្ពុជា បានអំពាវនាវដល់ភាគីពាក់ព័ន្ធក្នុងសង្គ្រាមអ៊ុយ ក្រែន-រុស្ស៊ី កុំប្រើប្រាស់គ្រាប់បែកចង្កោម ដែលវានឹងបង្កវិនាសកម្មដល់ប្រជាជនអ៊ុយក្រែនផ្ទាល់។ ការអំពាវនាវរបស់សម្តេច ហ៊ុន សែន ធ្វើឡើងបន្ទាប់ពីរដ្ឋាភិបាលអាម៉េរិក ប្រកាសផ្ដល់គ្រាប់បែកចង្កោមឱ្យអ៊ុយក្រែន សម្រាប់ការវាយបកប្រឆាំងនឹងការកាន់កាប់របស់កងកម្លាំងរុស្ស៊ី។
តាមបណ្តាញតេឡេក្រាម របស់ខ្លួននៅថ្ងៃទី៩ កក្កដានេះ សម្តេច ហ៊ុន សែន បានសរសេរថា៖ «ខ្ញុំដឹងច្បាស់ថាប្រទេសកម្ពុជាតូច ហើយទន់ខ្សោយ សំឡេងគ្មានទម្ងន់។ តែដោយក្តីអាណិតប្រជាជនអ៊ុយក្រែន ខ្ញុំសូមអំពាវនាវប្រធានាធិបតីអាម៉េរិក ដែលជាអ្នកផ្តល់ និងប្រធានាធិបតីអ៊ុយក្រែន ដែលជាអ្នកទទួល សូមមេត្តាកុំប្រើប្រាស់គ្រាប់បែកចង្កោមក្នុងសង្រ្គាមនេះ ព្រោះអ្នករងគ្រោះពិតប្រាកដ គឺប្រជាជនពិសេសគឺអ៊ុយក្រែនតែម្តង»។
សម្រាប់ប្រមុខរដ្ឋាភិបាល ប្រសិនបើពិតជាមានការប្រើប្រាស់គ្រាប់បែកចង្កោម ក្នុងសង្គ្រាមក្នុងតំបន់ដែលរុស្ស៊ីកាន់កាប់ ក្នុងទឹកដីអ៊ុយក្រែនវានឹងក្លាយទៅជាគ្រោះថ្នាក់ធំបំផុតសម្រាប់ ប្រជាជនអ៊ុយក្រែនរាប់សិបឆ្នាំ ឬដល់រយ ឆ្នាំទៀតផង។
នាយករដ្ឋមន្ត្រីកម្ពុជា ក៏បានចែករំលែកពីបទពិសោធន៍ឈឺចាប់របស់កម្ពុជា ដែលទទួលការទម្លាក់គ្រាប់បែកចង្កោមពីអាម៉េរិកនាដើមទស្សវត្សរ៍ឆ្នាំ១៩៧០ ដែលមកដល់ពេលនេះ នៅមិន ទាន់រកវិធីបំផ្លាញ ចោលអស់នៅឡើយ។
សូមបញ្ជាក់ថា នៅថ្ងៃទី៧ កក្កដា អាម៉េរិកបានប្រកាសថា ខ្លួននឹងផ្ដល់គ្រាប់បែកចង្កោមឱ្យអ៊ុយក្រែនដែលអាវុធប្រភេទនេះ នឹងជួយអ៊ុយក្រែនសម្រាប់ការវាយបក ប្រឆាំងនឹងការកាន់កាប់របស់កងកម្លាំងរុស្ស៊ី៕
Tag:
សង្គ្រាម
អ៊ុយក្រែន-រុស្ស៊ី
© រក្សាសិទ្ធិដោយ thmeythmey.com