ជាតិ
អតីតសម្ដេចសង្ឃ ឃី សុវណ្ណរតនា ត្រូវបានតែងតាំងជារដ្ឋលេខាធិការក្រសួងការបរទេស
រូបភាពពីហ្វេសប៊ុកលោក ឃី សុវណ្ណរតនា
×![]()
ភ្នំពេញ៖ លោក ឃី សុវណ្ណរតនា ដែលគេស្គាល់ថាជាអតីតសម្ដេចសង្ឃមានព្រះនាមថាសម្ដេចព្រះមហាអរិយវង្សបណ្ឌិត ឃី សុវណ្ណរតនា ត្រូវបានព្រះមហាក្សត្រតែងតាំងជារដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ។ នេះបើតាមព្រះរាជក្រឹត្យចុះព្រះហស្តលេខាដោយសម្ដេចព្រះបរមនាថ នរោត្តម សីហមុនី នាថ្ងៃទី២២ សីហានេះ។
ក្រោយលាចាកសិក្ខាបទបានរយៈពេល២០ថ្ងៃ លោក ឃី សុវណ្ណរតនា ត្រូវបានព្រះមហាក្សត្រតែងតាំងជារដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ នៅក្នុងអាណត្តិទី៧ ដែលដឹកនាំដោយលោក ហ៊ុន ម៉ាណែត។ លោក ឃី សុវណ្ណរតនា ជាអតីតមន្ត្រីសង្ឃដែលមានចំណេះដឹងខ្ពស់ទាំងផ្លូវពុទ្ធចក្រ និងអាណាចក្រ ដោយបានបញ្ចប់ការសិក្សាថ្នាក់អនុបណ្ឌិត និងបណ្ឌិតនៅប្រទេសឥណ្ឌា និងស្រីលង្ការ។ រដ្ឋលេខាធិការដែលទើបតែងតាំងថ្មីៗនេះ ចេះទាំងភាសាអង់គ្លេស, ភាសាបារាំង, ភាសាសំស្ក្រឹត និងភាសាបាលី។
បន្ទាប់ពីព្រះមហាក្សត្រចេញព្រះរាជក្រឹត្យតែងតាំងលោក ឃី សុវណ្ណរតនា បានសរសេរថ្លែងអំណរព្រះគុណ និងអរគុណលើទំព័រហ្វេសប៊ុកដល់ព្រះមហាក្សត្រ, សម្ដេច ហ៊ុន សែន , សម្ដេច ប៊ុន រ៉ានី, លោក ហ៊ុន ម៉ាណែត និងលោក សុខ ចិន្តាសោភា រដ្ឋមន្ត្រីក្រសួងការបរទេសដែលជាមេរបស់លោកផ្ទាល់។ លោក រៀបរាប់ដូច្នេះ៖«ទូលព្រះបង្គំខ្ញុំបាទសូមក្រាបបង្គំទូលថ្លែងអំណរព្រះករុណាទិគុណដ៏ខ្ពង់ខ្ពស់បំផុត និងសូមឱនកាយគោរពថ្លែងអំណរគុណដ៏ជ្រាលជ្រៅបំផុតអស់ពីដួងហឫទ័យ...»។
សូមបញ្ជាក់ថា លោក ឃី សុវណ្ណរតនា បានលាចាកសិក្ខាបទកាលពីថ្ងៃទី២ ខែសីហា ឆ្នាំ២០២៣ ដោយមូលហេតុមានភាពនឿយណាយ និងអស់និស្ស័យក្នុងព្រះផ្នួស ហើយមានបំណងចូលរួមចំណែកបម្រើសង្គមជាតិ ក្នុងភាពជាឃរាវាស ក្រោយសាកផ្នួសអស់រយៈពេល២១ឆ្នាំ។ នេះបើតាមលិខិតទូលថ្វាយ សម្ដេចព្រះមហាសុមេធាធិបតី កិត្តិឧទ្ទេសបណ្ឌិត នន្ទ ង៉ែត សម្ដេចព្រះសង្ឃនាយក នៃព្រះរាជាណាចក្រកម្ពុជា៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
