រដ្ឋមន្រ្តីក្រសួងទេសចរណ៍ថ្មី លោក សុខ សូកេន បានដាក់ចេញសសរស្តម្ភយុទ្ធសាស្ត្រមួយចំនួន ដើម្បីឱ្យកម្ពុជាក្លាយជាគោលដៅទេសចរណ៍សកលឈានមុខ ប្រកបដោយភាពសម្បូរបែប ពោរពេញដោយកាលានុវត្តភាព និងភាពកក់ក្ដៅ ក្នុងការរួមចំណែកលើកកម្ពស់កិត្យានុភាព និងភាពធន់។ សសរស្តម្ភយុទ្ធសាស្ត្រទាំងនោះមាន «បង្កើន៥ -BUILD» ជាមួយនឹងសមាសធាតុគាំទ្រដោយការងារអាទិភាពចំនួន៣ «អភិវឌ្ឍ៣-3Ds»។
ក្នុងពិធីសំណេះសំណាលជាមួយថ្នាក់ដឹកនាំ និងមន្រ្តីរាជការក្រសួងទេសចរណ៍ នាថ្ងៃទី២៥សីហា លោក សុខ សូកេន បានរៀបរាប់ថា «បង្កើន៥-BUILD»ទាំងនោះ មានសសរស្តម្ភយុទ្ធសាស្ត្រទីមួយ៖ បង្កើនប្រសិទ្ធភាពនៃការគ្រប់គ្រងកិតិ្តនាមកម្ពុជា ដើម្បីធ្វើឱ្យទេសចរនៃទីផ្សារគោលដៅកាន់តែស្គាល់ កាន់តែយល់ឃើញជាវិជ្ជមាន និងកាន់តែទទួលស្គាល់កម្ពុជា ជាគោលដៅទេសចរណ៍ដ៏ឈានមុខ។ ទីពីរ៖ បង្កើនប្រសិទ្ធភាពនៃការផ្សព្វផ្សាយភាពទាក់ទាញរបស់កម្ពុជា ទៅកាន់ទីផ្សារសំខាន់ៗ ដើម្បីធ្វើឱ្យទេសចរនៃគោលដៅអាទិភាព និងពិភពលោក ចាប់អារម្មណ៍មកទស្សនាកម្ពុជា។
ទីបី៖ បង្កើតប្រសិទ្ធភាពនៃការគ្រប់គ្រង និងសម្របសម្រួលកិច្ចការផ្ទៃក្នុង ពាក់ព័ន្ធនឹងការធ្វើដំណើររបស់ទេសចរ រួមទាំងការអភិវឌ្ឍហេដ្ឋារចនាសម្ព័ន្ធរឹង-ទន់ សំដៅកាត់បន្ថយរាល់បញ្ហាដែលប៉ះពាល់ដល់ការធ្វើដំណើររបស់ទេសចរ ដោយត្រូវបំពេញតម្រូវការទេសចរ តាមរយៈការលើកកម្ពស់គុណភាព ក្នុងការធ្វើដំណើរដល់គោលដៅឱ្យស្របតាមតាមស្តង់ដារអន្តរជាតិ។
ទីបួន៖ បង្កើនប្រសិទ្ធភាពនៃការអភិវឌ្ឍផលិតផលទេសចរណ៍ប្រកបដោយនវានុវត្តន៍ ភាពច្នៃប្រឌិត និងភាពជាខ្មែរ ដោយផ្អែកលើបេតិកភណ្ឌវប្បធម៌ បេតិភណ្ឌធម្មជាតិ ឆ្នេរសមុទ្រ ប្រជាជនខ្មែរ និងភាពជាខ្មែរ។ ជាពិសេសត្រូវពង្រឹងគុណភាពឧស្សាហកម្មទេសចរណ៍ សេវាមួយ-ស្តង់ដារមួយ តាមរយៈការដាក់ចេញ និងការអនុវត្តស្តង់ដារបៃតង សម្រាប់ផលិតផល និងសេវាទេសចរណ៍ ទាំងនៅកម្រិតថ្នាក់ជាតិ និងថ្នាក់តំបន់អាស៊ាន សំដៅទៅលើការធ្វើពិពិធកម្មផលិតផលទេសចរណ៍ រួមទាំងការអភិវឌ្ឍប៉ូលទេសចរណ៍អាទិភាព និងការបង្កើនច្រករបៀងទេសចរណ៍ ដើម្បីឆ្លើយតបនឹងការកើនឡើងនូវតម្រូវការទីផ្សាររគោលដៅអាទិភាព និងពិភពលោក។
សម្រាប់សសរស្ដម្ភយុទ្ធសាស្ត្រទីប្រាំនោះ គឺការបង្កើនប្រសិទ្ធភាពនៃការអភិវឌ្ឍន៍ធនធាន និងគោលដៅទាក់ទាញទេសចរប្រកបដោយភាពប្រកួតប្រជែងខ្ពស់ ដោយបន្តអភិវឌ្ឍ ការធ្វើពិពិធកម្មធនធាន ក្នុងគោលដៅទាក់ទាញទេសចរ ដូចជាការបង្កើត និងអភិវឌ្ឍតំបន់ទេសចរណ៍ពិសិទ្ធ ស្របតាមគោលនយោបាយស្តីពីទេសចរណ៍ពិសិទ្ធ ការជំរុញភាពទាក់ទាញទេសចរ និងការវិនិយោគ។
ដើម្បីគាំទ្រ និងជំរុញការអនុវត្តសសរស្តម្ភយុទ្ធសាស្ត្រទាំង៥នេះ ប្រកបដោយប្រសិទ្ធភាព និងឈានសម្រេចឱ្យបាននូវគោលដៅអភិវឌ្ឍវិស័យទេសចរណ៍កម្ពុជា ប្រកបដោយភាពប្រកួតប្រជែង ចីរភាព និងបរិយាប័ន្ន លោក សុខ សូកេន ក៏បានដាក់ចេញការងារគាំទ្រអាទិភាពចំនួន៣ទៀត ដែលហៅថា «អភិវឌ្ឍ៣-3Ds»។ ក្នុងនោះមានទីមួយ៖ ការអភិវឌ្ឍរចនាសម្ព័ន្ធ និងពង្រឹងអភិបាលកិច្ចទេសចរណ៍ ដែលគិតគូរដល់ការរៀបចំក្រុមប្រឹក្សាជាតិទេសចរណ៍ រួមទាំងការពង្រឹងអង្គភាពគ្រប់គ្រងគោលដៅទេសចរណ៍ តាមរាជធានី-ខេត្ត ដោយបង្កើនកិច្ចសហការជាមួយដៃគូ រវាងរដ្ឋ-ឯកជន និងកិច្ចសហប្រតិបត្តិការជាមួយស្ថាប័នពាក់ព័ន្ធនានា។
ទីពីរ. ការអភិវឌ្ឍបដិវត្តកម្មឌីជីថលក្នុងវិស័យទេសចរណ៍ ដោយត្រូវមានការផែនការ និងធនធានច្បាស់លាស់ក្នុងការអនុវត្តស្របតាមដំណាក់កាលឌីជីថលរូបនីយកម្ម និងបដិវត្តន៍កម្មឌីជីថល។ រីឯទីបី៖ ការអភិវឌ្ឍធនធានមនុស្សដោយផ្តោតសំខាន់លើការបណ្តុះបណ្តាលសមត្ថភាព ជំនាញវិជ្ជាជីវៈ ឆន្ទៈ មនសិការ គុណធម៌ និងសីលធម៌ សម្រាប់បុគ្គលិក និយោជក និយោជក មន្ត្រីរាជការ ព្រមទាំងភាគីពាក់ព័ន្ធនានាក្នុងវិស័យទេសចរណ៍ ឱ្យស្របតាមតួនាទី និងការទទួលខុសត្រូវខ្ពស់ ដោយធានាបាននូវបុគ្គលិកម្នាក់មានជំនាញមួយ។ ជាពិសេសបណ្តុះបណ្តាលអ្នកជំនាញវិជ្ជាជីវៈទេសចរណ៍ ឱ្យស្របតាមស្តង់ដារអាស៊ាន ព្រមទាំងលើកកម្ពស់សុខុមាលភាព មន្ត្រីទេសចរណ៍ប្រកបដោយសមធម៌ និងបរិយាប័ន្ន។
រដ្ឋមន្ត្រីថ្មីនៃក្រសួងទេសចរណ៍ បន្តនិយាយយ៉ាងដូច្នេះ៖ «សរុបជារួម បង្កើន៥ និង អភិវឌ្ឍ៣ នឹងដើរតួនាទីជាគំនិតផ្តួចផ្តើមយុទ្ធសាស្ត្រថ្មី ក្នុងការជំរុញការអនុវត្តការងាររបស់មន្ត្រីក្រសួងទេសចរណ៍ គ្រប់លំដាប់ថ្នាក់ និងសម្រាប់កិច្ចសហប្រតិបត្តិការ ជាមួយដៃគូពាក់ព័ន្ធទាំងថ្នាក់ក្រោមជាតិ ថ្នាក់ជាតិ និងអន្តរជាតិ ដើម្បីបង្កើនប្រសិទ្ធភាព សុខដុមនីយកម្មកាងារសម្រាប់សម្រួលរវាងក្រសួង-ស្ថាប័នពាក់ព័ន្ធ តួអង្គទាំងអស់ ដែលមានតួនាទីចូលរួមអភិវឌ្ឍវិស័យទេសចរណ៍កម្ពុជា»។
លោក សុខ សូកេន បានបញ្ជាក់ថា ការដាក់ចេញនូវសសរស្តម្ភយុទ្ធសាស្ត្រ «បង្កើន៥ -BUILD» និង «អភិវឌ្ឍ៣-3Ds» គឺស្របតាមកម្មវិធីនយោបាយរបស់រាជរដ្ឋាភិបាល នីតិកាលទី៧ នៃរដ្ឋសភា សម្រាប់ការកសាង និងការការពារមាតុភូមិឆ្នាំ២០២៣-២០២៨, យុទ្ធសាស្រ្តបញ្ចកោណ-ដំណាក់កាលទី១ រួមទាំងគោលនយោបាយ និងផែនការយុទ្ធសាស្រ្តសំខាន់ៗពាក់ព័ន្ធ នឹងវិស័យទេសចរណ៍ ក្នុងគោលដៅអភិវឌ្ឍវិស័យទេសចរណ៍កម្ពុជា ប្រកបដោយគុណភាព ភាពរស់រវើក ភាពប្រកួតប្រជែង ចីរភាព និងបរិយាប័ន្ន ឆ្ពោះទៅកាន់អនាគតថ្មី ដោយឈរលើគោលការណ៍គ្រឹះ «ទេសចរណ៍ផ្សារភ្ជាប់ទឹកដី និងធម្មជាតិ»។
សូមជម្រាបថា រយៈពេល៧ខែមកនេះ កម្ពុជាទទួលទេសចរបរទេសបានជាង៣លាននាក់ កើនជាង៣០០ភាគរយ ខណៈទេសចរផ្ទៃក្នុងមាន ជាង១៣លាននាក់ កើនប្រមាណ ៨០ភាគរយ ធៀបនឹងរយៈពេលដូចគ្នា កាលឆ្នាំ២០២២។ បើតាមលោក ទិត ចន្ថា រដ្ឋលេខាធិការក្រសួងទេសចរណ៍ កម្ពុជាអាចទទួលបានភ្ញៀវទេសចរអន្តរជាតិ ប្រមាណ៥លាននាក់ នៅឆ្នាំ២០២៣។ «ចំនួននេះ គឺស្របតាមចក្ខុវិស័យនៃកំណើនទេសចរអន្តរជាតិទស្សនាកម្ពុជា ដែលយើងគ្រោងទទួលបាន៨លាននាក់ និងទេសចរផ្ទៃក្នុង ប្រមាណ១៦លាននាក់ ក្នុងឆ្នាំ២០២៨»។ នេះជាការលើកឡើងរបស់លោក ទិត ចន្ថា៕