«ពលរដ្ឋជាង១០០០នាក់ ដែលដាក់បណ្តឹងមកយើង ពេលនេះក្រុមការងារ​កំពុងពិនិត្យ​ និង ធ្វើការជាមួយម្ចាស់បុរីដែលរឹបអូសផ្ទះ ពីពលរដ្ឋទាំងនោះ»។ លោក ជូ វណ្ណៈ ថ្លែង យ៉ាងខ្លីបែបនេះ ​ប្រាប់សារព័ត៌មានថ្មីៗ (ThmeyThmey) នាព្រឹកថ្ងៃទី៨កញ្ញា ដោយពុំទាន់កំណត់រយៈពេលណាមួយ ដើម្បីសម្រេចនូវដំណោះស្រាយ សម្រាប់ភាគីម្ចាស់បុរី និងម្ចាស់ផ្ទះ ឡើយ។ 
 

 
កាលពីដើមខែមិថុនា ឆ្នាំ២០២៣ សម្តេច ហ៊ុន សែន  អំពាវនាវឱ្យ ម្ចាស់បុរីទាំងឡាយ បញ្ឈប់ការរឹបអូសផ្ទះសម្បែង ដែលពលរដ្ឋគ្មានលទ្ធភាពបង់រំលោះជាបន្ទាន់ ដោយ សម្តេច ណែនាំឱ្យមានការរៀបចំនីតិវិធីដោះស្រាយឡើងវិញ។  សម្តេច ទាមទារឱ្យម្ចាស់បុរី ពន្យារ រយៈពេលសង ឬកាត់បន្ថយចំនួនប្រាក់ដែលត្រូវបង់ប្រចាំខែ​ ឬ ត្រូវរៀបចំឥណទាន ឡើងវិញ តាមលក្ខខណ្ឌជាក់ស្តែងរបស់ពលរដ្ឋ ដោយធ្វើយ៉ាងណា គឺចៀសវាងការ រឹបអូសផ្ទះពីអតិថិជន។ សម្តេច ហ៊ុន សែន អះអាង​ថា៖    «ការ​រឹបអូស​ផ្ទះ​ពី​អ្នក​បង់​រំលោះ​នឹង​ធ្វើ​ឱ្យ​សេដ្ឋកិច្ច​កម្ពុជា​ប្រឈម គ្រោះថ្នាក់»៕