តាមរយៈដំណើរទស្សនកិច្ចនេះ ប្រមុខរដ្ឋាភិបាលកម្ពុជា និងមានជំនួបដោយឡែកជាមួយលោក ស៊ី ជិនភីង ប្រធានាធិបតីចិន និងលោក ចាវ ឡឺជឺ ប្រធានសភាតំណាងប្រជាជន។ ក្នុងជំនួបនេះ ភាគីទាំងពីរ នឹងពិភាក្សាគ្នាលើទស្សនៈវិស័យមួយចំនួន រួមមាន ការកសាងសហគមន៍វាសនារួមគ្នាកម្ពុជា-ចិន ក្នុងយុគសម័យថ្មី , ការជំរុញបន្ថែមនូវកិច្ចសហប្រតិបត្តិការត្បូងពេជ្រ, ទិសដៅយុទ្ធសាស្រ្តសម្រាប់ទំនាក់ទំនងកម្ពុជា-ចិន ព្រមទាំងកិច្ចការតំបន់ និងអន្តរជាតិ ដែលផ្ដល់ប្រយោជន៍រួម។
 

ជាមួយគ្នានោះ សម្ដេច ហ៊ុន ម៉ាណែត ក៏នឹងមានជំនួបជាមួយលោក លី ឈាង នាយករដ្ឋមន្រ្តីចិន ដែលនឹងពិភាក្សាគ្នា ពីកិច្ចសហប្រតិបត្តិការទ្វេភាគី និងពហុភាគីរវាងប្រទេសទាំងពីរ។ នាយករដ្ឋមន្ត្រីទាំងពីរ ក៏នឹងធ្វើជាអធិបតីភាព ក្នុងពិធីការចុះហត្ថលេខាលើឯកសារមួយចំនួនដែរ។
 

ស្របនឹងដំណើរទស្សនកិច្ចនេះ សម្តេច ហ៊ុន ម៉ាណែត ក៏នឹងចូលរួមពិព័រណ៍ចិន-អាស៊ាន លើកទី២០ នៅក្រុង Nanning និងធ្វើដំណើរទៅក្រុងប៉េកាំងដើម្បីចូលរួមកិច្ចប្រជុំគំនិតផ្តួចផ្តើមផ្លូវ និងខ្សែក្រវាត់ នាថ្ងៃទី១៦-១៧ កញ្ញា ។ ពិព័រណ៍ចិន-អាស៊ាន លើកទី២០ នៅក្រុង Nanning នឹងចាប់ផ្តើមឡើងនៅថ្ងៃទី១៦ ដល់ថ្ងៃទី១៩ ខែកញ្ញា។ 
 

ក្រសួងការបរទេសកម្ពុជា ចាត់ទុកដំណើរទស្សនកិច្ចរបស់សម្ដេច ហ៊ុន ម៉ាណែត ស្របនឹងការប្រារព្វខួបអនុស្សាវរីយ៍ ៦៥ឆ្នាំ នៃទំនាក់ទំនងការទូតរវាងប្រទេសទាំងពីរនេះ ជាការពង្រឹងភាពជាដៃគូយុទ្ធសាស្រ្តគ្រប់ជ្រុងជ្រោយទ្វេភាគីបន្ថែមទៀត។
 

«ដំណើរទស្សនកិច្ចនេះ នឹងពង្រីកក្របខណ្ឌកិច្ចសហប្រតិបត្តិការត្បូងពេជ្រ និងជំរុញកិច្ចសហការលើវិស័យជាច្រើន ក្នុងវេទិកាតំបន់ និងអន្តរជាតិ ដែលផ្ដល់ផលប្រយោជន៍ទៅវិញទៅមករវាងប្រទេស និងប្រជាជនទាំងពីរ»។ នេះបើតាមក្រសួងការបរទេសកម្ពុជា។ 
 

 

ក្នុងជំនួបនៅក្រុងហ្សាការតា ក្រោយកិច្ចប្រជុំអាស៊ាន ប្រមុខរដ្ឋាភិបាលកម្ពុជា បានប្រាប់សមភាគីចិនថា ចាប់តាំងពីបង្កើតទំនាក់ទំនងក្នុងរយៈពេល ៦៥ឆ្នាំមកនេះ ទំនាក់ទំនងចិន-កម្ពុជា បានផ្តល់ផលប្រយោជន៍ជាច្រើន ហើយសម្តេចក៏បានចាត់ទុកចិនជា មិត្តល្អ និងដៃគូដៃទុកចិត្តផង។ មិនតែប៉ុណ្ណោះ ប្រមុខរដ្ឋាភិបាលកម្ពុជា បានអះអាងថា រដ្ឋាភិបាលថ្មីនឹងបន្តគោរពគោលការណ៍ និងក្របខណ្ឌនៃទំនាក់ទំនងទ្វេភាគីផង។

 
 

ចំណែកសមភាគីចិនវិញ លោក លី ឈាង នាយករដ្ឋមន្រ្តីចិន បានអះអាងថា ទំនាក់ទំនងចិន-កម្ពុជា នៅតែបន្តទ្រាំទ្របាននឹងការផ្លាស់ប្តូរ ក្នុងបរិបទអន្តរជាតិ ហើយបន្តរឹងមាំ និងមិនអាចបំបែកបាន។ បើតាមមេដឹកនាំចិនរូបនេះ ទំនាក់ទំនងប្រទេសទាំងពីរ ជាឧទាហរណ៍ថ្មីនៃទំនាក់ទំនងអន្តរជាតិ៕