ជាតិ
ទឹកជន់លិចស្រុកវែលវែង ខេត្តពោធិ៍សាត់។ រូបពី រដ្ឋបាលខេត្ត ពោធិ៍សាត់
×![]()
ដោយ: ឡាយ សុភាវតី
ភ្នំពេញ៖ ជំនន់ទឹកភ្លៀង ដែលកើតឡើងនៅក្នុងភូមិសាស្ត្រស្រុកវាលវែង កំពុងគំរាមកំហែងដល់ក្រុងពោធិ៍សាត់។ លោក សុទ្ធ គឹមកុលមុន្នី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានឱ្យសារព័ត៌មានថ្មីៗដឹងថា ប្រសិនបើភ្លៀងនៅតែបន្តធ្លាក់នៅក្នុងយប់នេះ និងថ្ងៃស្អែកនោះ ក្រុងពោធិ៍សាត់ អាចរងជន់លិច។
ក្នុងរយៈពេលពីរថ្ងៃចុងក្រោយនេះ មានភ្លៀងធ្លាក់ជាបន្តបន្តាប់ ក្នុងខេត្តពោធិ៍សាត់ ពិសេសនៅក្នុងភូមិសាស្ត្រស្រុកវែលវែង ដែលបានបង្កជាជំនន់ទឹកភ្លៀង។ បច្ចុប្បន្ន ខេត្តនេះ ប្រឈមនឹងការគំរាមកំហែងពីទឹកជំនន់ ចូលដល់ក្នុងក្រុង។ លោក សុទ្ធ គឹមកុលមុន្នី លើកឡើងបែបនេះ ហើយបញ្ជាក់ថា៖ «បើសិនល្ងាចនេះ និងយប់ថ្ងៃទី២៨ មានភ្លៀងមិនឈប់ រហូតដល់ស្អែក អាចនឹងមានទឹកជន់លិចក្រុងពោធិ៍សាត់ និងស្រុកកណ្ដៀងជាដើម»។
ចំពោះការវាយតម្លៃ ពីស្ថានភាពជំនន់ទឹកភាពក្នុងខេត្តពោធិ៍សាត់នេះ លោក សុទ្ធ គឹមកុលមុន្នី ធ្វើឡើងតាមរយៈ លោក ខូយ រីដា អភិបាលខេត្តពោធិ៍សាត់ និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយប្រចាំខេត្តពោធិ៍សាត់។ យ៉ាងណា លោក សុទ្ធ គឹមកុលមុន្នី អះអាងថា អាជ្ញាធរតាមមូលដ្ឋាន អាចគ្រប់គ្រងស្ថានភាពទឹកលិចបាន ហើយក៏ស្នើឱ្យពលរដ្ឋចូលរួមជួយផ្ដល់ព័ត៌មានឱ្យបានឆាប់ ពាក់ព័ន្ធស្ថានភាពផងដែរ ដើម្បីរួមគ្នាចុះជួយអន្តរាគមន៍ដល់គ្រួសារដែលរងគ្រោះ។
ក្រៅពីខេត្តនេះ ក៏មានខេត្តកំពង់ធំ ខេត្តព្រះវិហារ ខេត្តត្បូងឃ្មុំ ខេត្តក្រចេះ ខេត្តព្រះសីហនុ និងខេត្ត កោះកុង ដែលរងគ្រោះដោយសារជំនន់ទឹកភ្ញៀវ។ ក្នុងខេត្តទាំងនេះ គឺខេត្តកំពង់ធំ រងគ្រោះធ្ងន់ធ្ងរជាងគេ។ នេះបើតាមរបាយការណ៍ គណៈកម្មាធិការជាតិគ្រប់គ្រងគ្រោះមហន្តរាយ៕
:
© រក្សាសិទ្ធិដោយ thmeythmey.com
