ជាតិ
អ្នកនេសាទចាប់បាន ត្រីប៉ាសាណាក«និមិត្តរូបតំបន់មេគង្គ»និងកន្ធាយក្បាលកង្កែប ទម្ងន់៣៤គីឡូក្រាម រូបភាព៖ ខណ្ឌរដ្ឋបាលជលផលខេត្តស្ទឹងត្រែង
× ភ្នំពេញ៖ ក្នុងថ្ងៃតែមួយ ប្រជានេសាទខេត្តស្ទឹងត្រែង ចាប់បានត្រីប៉ាសាណាក ដែលជានិមិត្តរូបតំបន់មេគង្គ និងកន្ធាយក្បាលកង្កែប ទម្ងន់៣៤គីឡូក្រាម នៅភូមិត្បូងខ្លា និងភូមិអូរច្រឡង់ ឃុំអូរម្រះ ស្រុកសៀមបូក ខេត្តស្ទឹងត្រែង។ ធនធានជលផលទាំងពីរនេះ ត្រូវបានចាត់ថ្នាក់ជាប្រភេទកម្រ និងកំពុងរងគ្រោះជិតផុតពូជ ខណៈអាជ្ញាធរ អំពាវនាវឱ្យអ្នកនេសាទចូលការពារទាំងអស់គ្នា។
លោកស្រី សមវិចិត្រ នាយខណ្ឌរដ្ឋបាលជលផលខេត្តស្ទឹងត្រែង បានបញ្ជាក់ថា ត្រីប៉ាសាណាក ទម្ងន់៥,៥គីឡូក្រាម និងកន្ធាយក្បាលកង្កែប ទម្ងន់៣៤គីឡូក្រាម ត្រូវបានប្រទះឃើញជាប់សន្ទូចរបស់ប្រជានេសាទ កាលពីថ្ងៃទី២ ខែតុលា ស្ថិតក្នុងភូមិត្បូងខ្លា ឃុំអូរម្រះ ស្រុកសៀមបូក ខេត្តស្ទឹងត្រែង។ ក្នុងថ្ងៃដដែល អ្នកនេសាទ បានប្រគល់ កន្ធាយក្បាលកង្កែប ទៅកាន់ក្រុមអ្នកជំនាញ ដើម្បីយកទៅថែរទាំ និងព្យាបាល ដោះលែងទៅក្នុងដែនទឹកនេសាទធម្មជាតិវិញ រីឯត្រីប៉ាសាណាកវិញ ត្រូវបានយកសំណាកមកថែររក្សានៅវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាបនៃរដ្ឋបាលជលផល។
កន្ធាយក្បាលកង្កែប ត្រូវបានចាត់ថ្នាក់ជាប្រភេទកម្រ និងកំពុងរងគ្រោះថ្នាក់បំផុត។ ចំណែក ត្រីប៉ាសាណាក ក៏ស្ថិតក្នុងក្រុមកម្រដែរ ប៉ុន្តែវាមិនចូលក្នុងអនុក្រឹត្យ«ការកំណត់ធនធានជលផលកំពុងរងគ្រោះថ្នាក់»នោះទេ។ ធនធានជលផលទឹកសាប ដែលចូលក្នុងអនុក្រឹត្យ«ការកំណត់ធនធានជលផលកំពុងរងគ្រោះថ្នាក់»មានចំនួន២៩ប្រភេទ។
លោក សមវិចិត្រ បានលើកឡើងថា ការអភិរក្សធនធានជលផលកម្រ និងកំពុងរងគ្រោះ គឺជាការងារអាទិភាពមួយដែល នាយខណ្ឌរដ្ឋបាលជលផលខេត្តស្ទឹងត្រែង កំពុងបំពេញទាំងយប់ទាំងថ្ងៃ។ ដូច្នេះ ដើម្បីបង្កើនប្រសិទ្ធភាពជាងនេះ លោក អំពាវនាវឱ្យប្រជានេសាទ និងពលរដ្ឋចូលរួមការពារ និងទប់ការលក់ដូរ ទាំងអស់គ្នា។
លោក បន្ថែមដូច្នេះថា៖« ប្រសិនបើ យើងការពារបាន វានឹងជំរុញឱ្យធនធានកម្រកើនឡើងវិញ។ ម្យ៉ាងវិញទៀត វាក៏ទុកឱ្យកូនចៅជំនន់ក្រោយបានស្គាល់ បានដឹងផងដែរ។ ប្រភេទត្រីដែលចាប់បាននេះ សុទ្ធតែជាធនធានកម្រ ដែលប្រទេសមួយចំនួនគ្មាន ដូច្នេះ វាមានតម្លៃជាសកល ដែលទាមទារឱ្យអ្នកពាក់ព័ន្ធចូលរួមការពារថែរក្សា»៕
Tag:
ជលផលខេត្តស្ទឹងត្រែង
កន្ធាយក្បាលកង្កែប
ត្រីប៉ាសាណាក
© រក្សាសិទ្ធិដោយ thmeythmey.com