សម្រាប់បេក្ខជនថ្នាក់វិទ្យាសាស្ត្រមានចំនួន ៤១ ៣៧៩នាក់ ក្នុងនោះបេក្ខនារី ២៤ ៧៨៩នាក់។ ចំណែកថ្នាក់វិទ្យាសាស្ត្រសង្គម មានបេក្ខជន ​៩៦ ០៣៣នាក់ ក្នុងនោះបេក្ខនារីមានចំនួន ៤៨ ៤៨៩នាក់។ ចំពោះមណ្ឌលប្រឡង ២២៧ មណ្ឌល ត្រូវជា ៥៥៤៣បន្ទប់។ ក្នុងនោះថ្នាក់វិទ្យាសាស្ត្រ មានចំនួន ៧២មណ្ឌល និងថ្នាក់វិទ្យាសាស្ត្រសង្គម មានចំនួន ១៥៥មណ្ឌល ។ 

 

ការប្រឡងមធ្យមសិក្សាទុតិយភូមិ(បាក់ឌុប) គឺមានចំនួន៧មុខវិជ្ជា។ សម្រាប់ថ្នាក់វិទ្យាសាស្រ្ត មានមុខវិជ្ជាជម្រើស ជីវវិទ្យា គីមីវិទ្យា ភាសាបរទេស អក្សរសាស្ត្រខ្មែរ រូបវិទ្យា គណិតវិទ្យា។ ចំណែក ថ្នាក់វិទ្យាសាស្រ្តសង្គម មានមុខវិជ្ជាជម្រើស ប្រវត្តិវិទ្យា ភូមិវិទ្យា ភាសាបរទេស គណិតវិទ្យា សីលធម៌-ពលរដ្ឋ និងអក្សរសាស្រ្តខ្មែរ។ 

 

បន្ទាប់ពីប្រឡងថ្ងៃទី៦វិច្ឆិកាហើយ នៅថ្ងៃទី១១ដល់១៥វិច្ឆិកា គឺជាដំណើរការនៃការធ្វើកំណែវិញ្ញាសា។ ចំណែក ថ្ងៃទី១៦ដល់ថ្ងៃទី២៦វិច្ឆិកា ជាដំណើរការស្រង់និងបូកពិន្ទុដោយកុំព្យូទ័រ រួមទាំងការផ្ទៀងផ្ទាត់ពិន្ទុផងដែរ។​ក្រសួងនឹងប្រកាសលទ្ធផលប្រឡង នៅថ្ងៃទី២៨ វិច្ឆិកា សម្រាប់រាជធានីភ្នំពេញ និងខេត្តកណ្តាល និងនៅថ្ងៃទី២៩វិច្ឆិកា សម្រាប់បណ្តាខេត្តផ្សេងទៀត៕

 

: