តាមសេចក្តីប្រកាសក្រសួងការបរទេសថៃ សម្តេច ហ៊ុន ម៉ាណែត នាយករដ្ឋមន្រ្តីកម្ពុជា នឹងបំពេញទស្សនកិច្ចនៅថៃ ក្នុងថ្ងៃទី៧ ខែកុម្ភៈ ដោយប្រធានបទប្រភពថាមពលនៅតំបន់ត្រួតស៊ីគ្នាក្នុងឈូងសមុទ្រថៃ នឹងក្លាយជាប្រធានបទសំខាន់។ មកទល់ពេលនេះ ភាគីថៃកំពុងរង់ចាំទស្សនកិច្ចរបស់សម្តេចនាយករដ្ឋមន្រ្តី ដើម្បីជជែកពីប្រធានបទប្រភពថាមពលឱ្យបានច្បាស់លាស់។ 

 

«យើងត្រូវតែរង់ចាំសម្រាប់ការបញ្ជាក់ឱ្យបានច្បាស់លាស់ បន្ទាប់ពីជំនួបលោកសេដ្ឋា និងនាយករដ្ឋមន្រ្តីកម្ពុជា នៅថ្ងៃទី៧ ខែកុម្ភៈជាមុនសិន បន្ទាប់មកក្រសួង និងទីភ្នាក់ងារពាក់ព័ន្ធ នឹងមានកិច្ចចរចាបន្ទាប់ពីនោះ»។ លោក Parnpree Bahiddha-Nukara រដ្ឋមន្រ្តីការបរទេសថៃ បានបញ្ជាក់បែបនេះ។ នេះបើតាមការចុះផ្សាយរបស់កាសែតបាងកកប៉ុស្តិ៍ នៅថ្ងៃទី១០ ខែមករា។ 

 

ស្របគ្នានេះ ទីប្រឹក្សានាយករដ្ឋមន្រ្តី និងជាអតីតរដ្ឋមន្រ្តីថាមពលថៃ លោក Pichai Naripthaphan បានអះអាងថា កន្លងមក ភាគីកម្ពុជា និងថៃ បានរៀបចំកិច្ចពិភាក្សាជាច្រើនលើកមកហើយ ជុំវិញតំបន់ត្រួតស៊ីគ្នាទំហំ ២៦០០០គីឡូម៉ែត្រការ៉េ នៅក្នុងឈូងសមុទ្រថៃនោះ ដោយផ្អែកលើការណែនាំសម្រាប់កិច្ចចរចានៅដំណាក់កាលបន្ទាប់ទៀត។ 

 

ត្រង់ចំណុចនេះ ទីប្រឹក្សានាយករដ្ឋមន្រ្តីថៃ បានបន្ថែមថា កិច្ចពិភាក្សានឹងផ្តោតលើកិច្ចសហប្រតិបត្តិការក្នុងការប្រើប្រាស់ធនធានធម្មជាតិ នៅតំបន់ត្រួតស៊ីគ្នាជាជាងលើកឡើងពីជម្លោះលើដែនទឹក។ បើតាមលោក Pichai កិច្ចចរចា គួរតែបញ្ចប់ឱ្យបានឆាប់រហ័ស ក្នុងរយៈពេលចន្លោះពី២ឆ្នាំ ទៅ៧ឆ្នាំ ដើម្បីអាចទាញយកធនធានធម្មជាតិនៅក្នុងតំបន់នោះ។ 

 

ទន្ទឹមនេះ ទីប្រឹក្សានាយករដ្ឋមន្រ្តីថៃ បានបន្ថែមថា កិច្ចចរចាគួរតែបញ្ចប់ មុនពេលអាណត្តិរដ្ឋាភិបាលបច្ចុប្បន្ន ត្រូវបានបញ្ចប់ ស្របពេលភាគីកម្ពុជា ចង់បញ្ចប់កិច្ចចរចា ដោយទទួលបានផលប្រយោជន៍ទៅវិញទៅមក។ 

 

កន្លងមក ភាគីកម្ពុជា និងថៃ ក៏ធ្លាប់ជជែកពីបញ្ហានេះដែរ ប៉ុន្តែកិច្ចពិភាក្សាទាំងនោះ មិនទទួលបានផ្លែផ្កាអ្វីឡើយ ដោយសារតែផ្តោតលើជម្លោះនៅព្រំដែនសមុទ្រ៕