សេដ្ឋកិច្ចអន្តរជាតិ
អន្តរជាតិ
រូបភាព ៖ VnExpress
×![]()
នាយករដ្ឋមន្រ្តីវៀតណាមបានចេញសេចក្តីសម្រេចមួយ បញ្ជាឱ្យក្រសួង និងស្ថាប័នពាក់ព័ន្ធ ត្រូវតែចាត់វិធានការពង្រឹងការទប់ស្កាត់ការរត់ពន្ធជ្រូកដោយខុសច្បាប់ ឆ្លងកាត់ព្រំដែនពីប្រទេសជិតខាង។ 
ការរត់ពន្ធ និងដឹកជញ្ជូនខុសច្បាប់នូវក្របី គោ ជ្រូក មាន់ ទា និងបង្កងឆ្លងព្រំដែនចូលវៀតណាមមានភាពស្មុគស្មាញ ជាពិសេសនៅខេត្តជាប់ព្រំដែនភាគខាងត្បូងជាមួយកម្ពុជា និងឡាវ។ ការណ៍នេះ នឹងបង្កើនហានិភ័យនៃការឆ្លងជំងឺផ្សេងៗ ដែលប៉ះពាល់ដល់ផលិតកម្មបសុសត្វក្នុងស្រុក និងសុខភាពប្រជាជន។ នេះបើតាមរបាយការណ៍ក្រសួងកសិកម្ម និងអភិវឌ្ឍន៍ជនបទវៀតណាម។
ឆ្លើយតបបញ្ហានេះ រដ្ឋាភិបាលវៀតណាមបានចេញសេចក្តីសម្រេចមួយនៅថ្ងៃទី ៣១ ខែមករា ឆ្នាំ២០២៤ ដោយនាយករដ្ឋមន្ត្រី ផាម មិញជិញ បានស្នើដល់ក្រសួង ស្ថាប័ន ជាពិសេសមូលដ្ឋានដែលពាក់ព័ន្ធត្រូវចាត់វិធានការទប់ស្កាត់ការរត់ពន្ធ និងការដឹកជញ្ជូនសត្វ និងផលិតផលជលផលខុសច្បាប់ឆ្លងព្រំដែនចូលវៀតណាម។
បើតាមសេចក្តីសម្រេចខាងលើ ខេត្តជាប់ព្រំដែនភាគនិរតីរបស់វៀតណាម ត្រូវតែបង្កើនការត្រួតពិនិត្យតាមច្រកព្រំដែន កំពង់ផែសមុទ្រ ទន្លេ ... និងដោះស្រាយយ៉ាងម៉ត់ចត់ បង្ខំឱ្យនាំចេញទៅវិញ ឬបំផ្លាញចោលក្នុងករណីរត់ពន្ធខុសច្បាប់ដែលត្រូវបានរកឃើញ។
លោក ផាម មិញជិញ បានព្រមានថា៖ «ប្រធានប្រធានគណៈកម្មាធិការប្រជាជនតាមខេត្តត្រូវទទួលខុសត្រូវចំពោះនាយករដ្ឋមន្ត្រី ប្រសិនបើការនាំចូលខុសច្បាប់នាំឱ្យមានជំងឺរាលដាល»។ នេះបើតាមការចុះផ្សាយរបស់សារព័ត៌មាន Vietnam Express។
ជាមួយគ្នានេះ ក្រសួងកសិកម្ម និងអភិវឌ្ឍន៍ជនបទ ត្រូវពិនិត្យ និងបង្កើតលក្ខខណ្ឌសម្រាប់ការនាំចូលសត្វ ពូជបសុសត្វ និងផលិតផលជលផលជាផ្លូវការ ដើម្បីធានាការផ្គត់ផ្គង់សម្រាប់ទីផ្សារក្នុងស្រុក ចៀសវាងការកេងចំណេញពីគោលនយោបាយ។
ទន្ទឹមនេះ ក្រសួងសន្តិសុខសាធារណៈត្រូវបានចាត់តាំងឱ្យបង្កើតផែនការពិសេសមួយដើម្បីប្រយុទ្ធប្រឆាំងនឹងឈ្មួញនិងអ្នកដឹកជញ្ជូនខុសច្បាប់ឆ្លងកាត់ព្រំដែន។ ចំណែក ក្រសួងឧស្សាហកម្ម និងពាណិជ្ជកម្ម ត្រូវគ្រប់គ្រងទីផ្សារ និងរកឱ្យឃើញភ្លាមៗដោះស្រាយការបំពានយ៉ាងតឹងរ៉ឹង។
ជុំវិញរឿងនេះ ប្រធានសមាគមអ្នកចិញ្ចឹមសត្វកម្ពុជា លោក ស្រ៊ុន ពៅ បានប្រាប់សារព័ត៌មានថ្មីៗនៅថ្ងៃទី១ ខែកុម្ភៈថា ជិតដល់ចូលឆ្នាំប្រពៃណីចិន-វៀតណាមម្តងៗ ប្រទេសក្បែរខាងមួយនេះ តែងតែខ្វះខាតសាច់។ ដូច្នេះឈ្មួញតែងតែចូលមកកម្ពុជាទិញជ្រូករស់ សម្រាប់បំពេញតម្រូវការក្នុងស្រុក។
លោកសង្កត់ធ្ងន់ថា ៖« មិនមែនយើងនាំជ្រូកខុសច្បាប់ទេ យើងគ្មានសិទ្ធនាំចូលទេ គឺឈ្មួញបងប្អូនខាងវៀតណាមអ្នកកម្មង់ ស្របពេលដែលបងប្អូនអ្នកចិញ្ចឹមជ្រូកខ្មែរកកស្ទះ ដូច្នេះយើងត្រូវតែលក់ តែមិនមែនលក់បានថ្លៃទេគឺលក់សម្រាលបន្ទុក»។
កន្លងមកសមាគមបសុសត្វខេត្តដុងណាយបានរាយការណ៍ថា ជារៀងរាល់យប់មានជ្រូកពី ៦០០០ ទៅ ៧០០០ ក្បាលដែលរត់ពន្ធពីកម្ពុជាទៅវៀតណាម។ ចំនួនជ្រូករត់ពន្ធមានចំនួនប្រហែល ៣០ភាគរយនៃទិន្នផលបសុសត្វក្នុងស្រុកដែលត្រូវបានលក់ជារៀងរាល់ថ្ងៃ។ ជាមួយនឹងតម្លៃលក់ត្រឹមតែ ៥ម៉ឺនដុងក្នុងមួយគីឡូក្រាមនៃជ្រូករស់ (២,០៤ដុល្លារ) កសិករក្នុងស្រុកត្រូវខាតបង់ដោយសារតែពួកគេត្រូវលក់ក្រោមតម្លៃផលិតកម្ម៕
Tag:
ជ្រូក
វៀតណាម
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
