គិតត្រឹមឆ្នាំ២០២៤ កម្ពុជា និងចិន មានទំនាក់ទំនងការទូតផ្លូវការរយៈពេល ៦៦ឆ្នាំហើយ ដោយរដ្ឋាភិបាលប្រទេសទាំងពីរមានទំនាក់ទំនងយ៉ាងស្អិតរមួត។ ជុំវិញទំនាក់ទំនងទ្វេភាគីនេះ លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃកម្ពុជា បានមើលឃើញថា ឈានដល់កម្រិតខ្ពស់បំផុត។ 

 

«ទំនាក់ទំនងរវាងកម្ពុជា-ចិននេះ បានមកដល់កម្រិតមួយខ្ពស់បំផុត ដែលមិនធ្លាប់មាននៅក្នុងប្រវត្តិសាស្រ្តនៃទំនាក់ទំនងប្រទេសទាំងពីរ»។ លោក គិន ភា បានបញ្ជាក់បែបនេះ នៅក្នុងកិច្ចសម្ភាសន៍ជាមួយសារព័ត៌មានថ្មីៗ។ ការយល់ឃើញរបស់ ប្រធានវិទ្យាស្ថានទំនាក់ទំនងអន្តរជាតិនៃកម្ពុជារូបនេះ គឺឈរលើមូលដ្ឋានប្រវត្តិសាស្រ្ត និងកិច្ចព្រមព្រៀងមិត្តភាពដែលប្រទេសទាំងពីរមានជាមួយគ្នា។ 

 

កន្លងមក កម្ពុជា និងចិន បានចុះកិច្ចព្រមព្រៀងដូចជា ភាពជាដៃគូយុទ្ធសាស្រ្តគ្រប់ជ្រុងជ្រោយ, កិច្ចសហប្រតិបត្តិការឆកោណត្បូងពេជ្រ និងកិច្ចព្រមព្រៀងកសាងសហគមន៍កម្ពុជា-ចិន ដែលមានជោគវាសនារួមគ្នាជាដើម។ 

 

នៅក្នុងឆ្នាំ២០២៤ ប្រទេសទាំងពីរ បានសម្ពោធឆ្នាំនៃការផ្លាស់ប្តូរប្រជាជន និងប្រជាជ​នថែមទៀត ដើម្បីទាក់ទាញភ្ញៀវទេសចរ និងអ្នកវិនិយោគមកកម្ពុជា។ ទាក់ទិននឹងឆ្នាំនៃការផ្លាស់ប្តូរប្រជាជន និងប្រជាជ​ន លោកគិន ភា បានបញ្ជាក់ថា នឹងធ្វើឱ្យប្រជាជនប្រទេសទាំងពីរកាន់តែខិតជិតគ្នា និងយល់ពីគ្នាទាំងទៅលើទំនៀមទំលាប់ ប្រពៃណី និងវប្បធម៌។ 

 

ទន្ទឹមនេះ ប្រធានវិទ្យាស្ថានទំនាក់ទំនងអន្តរជាតិនៃកម្ពុជា សង្ឃឹមថា ឆ្នាំនៃការផ្លាស់ប្តូរប្រជាជន និងប្រជាជ​ន នឹងជួយច្រើនសម្រាប់វិស័យទេសចរណ៍ ហើយទាក់ទាញភ្ញៀវទេសចរចិនមកកម្ពុជាជាច្រើនលាននាក់។ បើតាមលោកគិន ភា ចំនួនភ្ញៀសទេសចរកាន់តែច្រើនឡើង វានឹងជួយដល់ផ្នែកសេវាកម្មដូចជាម្ហូបអាហារ សណ្ឋាគារ ហើយថែមទាំងធ្វើឱ្យប្រជាជនកាន់តែមានការងារធ្វើ និងបង្កើនប្រាក់ចំណូលផងដែរ។ 

 

ក្នុងលិខិតអបអរការបើកឆ្នាំនៃការផ្លាស់ប្តូរប្រជាជន និងប្រជាជនរវាងចិន-កម្ពុជា ២០២៤ លោក លី ឈាំង នាយករដ្ឋមន្រ្តីចិន បានរម្លឹកពីទំនាក់ទំនងចិន មានតាំងពីសម័យបុរាណ។ មេដឹកនាំរូបនេះ បានលើកឡើងពី នាវិក Zheng He មកពីរាជវង្សចិន បានឈប់ចតនៅកម្ពុជា ក្នុងពេលបំពេញបេសកកម្មតាមផ្លូវសមុទ្រថែមទៀត៕