ក្រោយប្រមូលផ្តុំ និងហ្វឹកហាត់រយៈពេលប៉ុន្មានថ្ងៃ កីឡាកររបស់ក្រុមរហស្សនាមគោព្រៃ ចំនួន២៣រូប រួមទាំងគ្រូបង្វឹក ជំនួយការ និងមន្ត្រីបុគ្គលិក បានចាកចេញពីកម្ពុជាទៅកាន់អារ៉ាប៊ីសាអូឌីត ដើម្បីត្រៀមចូលរួមប្រកួត FIFA Series។ ជំនួបដំបូងរបស់ក្រុមកម្ពុជាដែលដឹកនាំដោយលោក Filix Dalmaz នឹងត្រូវប៉ះក្រុមមកពីទ្វីអាហ្វ្រិក ហ្គីណេអេក្វាទ័រ នៅថ្ងៃទី២២ ខែមីនា មុនពេលបន្តជួប ហ្គីយ៉ាន មកពីអាម៉េរិកខាងត្បូង នៅ៤ថ្ងៃបន្ទាប់។
 

ក្រុមជម្រើសជាតិកម្ពុជា ស្ថិតនៅពូល A ជាមួយ កាប់វែរ, ហ្គីណេអេក្វាទ័រ និងហ្គីយ៉ាន។ យ៉ាងណាក៏ដោយ បើទោះពូលនេះមាន៤ក្រុមក្តី ប៉ុន្តែកម្ពុជាគ្មានការប្រកួតជាមួយក្រុម កាប់វែរ ឡើយ។ កាប់វែរ ជាក្រុមខ្លាំងមកពីអាហ្វ្រិក ដោយបច្ចុប្បន្នពួកគេមានចំណាត់ថ្នាក់លេខ១៣ ក្នុងតំបន់ និងលេខ ៦៥ ពិភពលោក និងទើបធ្វើព្យុះភ្លៀងនៅក្នុងពានរង្វាន់ African Cup of Nations ឆ្នាំ ២០២៣ កន្លងទៅ។
  

ក្រៅពីពូល A ម្ចាស់ផ្ទះអារ៉ាប៊ីសាអូឌីត ក៏រៀបចំការប្រកួតសម្រាប់ពូល B ដោយរួមមាន ក្រុមប័រម៊ូដា (Concacaf), ព្រុយណេ (AFC), ហ្គីណេ (CAF) និង វ៉ានូទូ (OFC)។ ទាំងក្រុមក្នុងពូល A និង B តម្រូវឱ្យមានការប្រកួតតែពីរលើកដូចគ្នា។
 

សហព័ន្ធកីឡាបាល់ទាត់អន្តរជាតិ (FIFA) បានបង្កើតព្រឹត្តិការណ៍ ​FIFA Series ដោយបញ្ចូលក្នុងកាលវិភាគការប្រកួតអន្តរជាតិសម្រាប់ក្រុមបុរស នៅក្នុងខែមីនា ឆ្នាំ ២០២៤ នេះ ដែលជាគម្រោងសាកល្បងនៃគោលដៅយុទ្ធសាស្ត្រការប្រកួតសកល (Strategic Objectives for the Global Game: 2023-2027) ហើយត្រូវបានសម្រេចដោយក្រុមប្រឹក្សា FIFA កាលពីខែធ្នូ ឆ្នាំ ២០២២។ FIFA Series នឹងផ្តល់ឱកាសដល់ក្រុមបាល់ទាត់កម្រិតទាប និងមិនធ្លាប់ជួបគ្នាសោះ អាចប្រកួតគ្នាជាអន្តរទ្វីប។

សមាសភាពកីឡាករ ២៣រូប ដែលត្រូវចូលរួមប្រកួតក្នុង FIFA Series មានដូចជា៖
 

- ក្លិបវិសាខា ៣នាក់៖ ហ៊ុល គឹមហ៊ុយ, ស៊ិន សុផាណាត់ និង ស រតនា

- ក្លិបភ្នំពេញក្រោន ៥នាក់៖ អ៊ុំ វិចិត្រ, ផាច សុជាវីឡា, យ៉ើ ម៉ូស្លីម, យូឌៃ អូកាវ៉ា និង លឹម ពិសុទ្ធ

- ក្លិបព្រះខ័នរាជស្វាយរៀង ៧នាក់៖ វីរៈ ដារ៉ា, សឿយ វិសាល, សារ៉េត គ្រីយ៉ា, ធារី ចន្ថាប៊ីន, ថេឡរ នីកូឡាស់ ឌឿង, គួច ដានី និង មិន រតនៈ

- ក្លិបណាហ្គាវើលដ៍ ២នាក់៖ ជា ច័ន្ទដារ៉ា និង សុះ ស៊ូហាណា

- ក្លិបអាយ អេស អាយ ដង្កោសែនជ័យ ១នាក់៖ កែម វ៉ាន់ដា

- ក្លិបខេត្តព្រៃវែង ២នាក់៖ គង់ លីហួរ និង ផាន សុផេន

- ក្លិបទ័ព្ធ ១នាក់៖ ញាណ សុស៊ីដាន

- ក្លិបបឹងកេត ២នាក់៖ សៀង ចន្ធា និង ម៉ាត់ នូរុណ៕