ខេត្តទាំង១៤ ដែលអាជ្ញាធរ បានជួយសង្គ្រោះស្រូវប្រាំងនេះ រួមមាន បន្ទាយមានជ័យ, តាកែវ, កំពត, ត្បូងឃ្មុំ, កំពង់ឆ្នាំង, កំពង់ធំ, ក្រចេះ, កំពង់ចាម, កណ្តាល, ស្វាយរៀង ខេត្តកំពង់ស្ពឺ, ពោធិ៍សាត់, ព្រៃវែង និងប៉ៃលិន។ នេះជាការបញ្ជាក់របស់ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម នៅក្នុងកិច្ចប្រជុំ «បូកសរុបលទ្ធផលការងារអន្តរាគមន៍សង្គ្រោះស្រូវប្រាំងជូនប្រជាកសិករឆ្នាំ២០២៤» នៅថ្ងៃទី៤ ខែមេសា។ 
 

រដ្ឋមន្ត្រីធនធានរូបនេះ បានណែនាំឱ្យមន្រ្តីយកចិត្តទុកដាក់ថែទាំស្ថានីយបូមទឹក និងម៉ាស៊ីនបូមទឹកគ្រប់ប្រភេទឱ្យបានត្រឹមត្រូវ ដើម្បីត្រៀមជួយអន្តរាគមន៍ដល់កសិករទាន់ពេលវេលា។

ក្រៅពីនោះ ក៏ត្រូវត្រូវបង្កើនការផ្សព្វផ្សាយដល់សាធារណជន ឱ្យចូលរួមប្រើប្រាស់ទឹកដោយសន្សំសំចៃ ក្នុងកម្រិតខ្ពស់បំផុត ជាពិសេសនៅតំបន់ជនបទ ឬដាច់ស្រយាល ដែលនៅឆ្ងាយពីប្រភពទឹក។
 

យោងតាមការព្យាកររបស់ក្រសួងធនធានទឹក ចាប់ពីខែកុម្ភៈ ដល់ដើមខែឧសភា ឆ្នាំ២០២៤ កម្ដៅនឹងកើនឡើងជាលំដាប់។ ក្នុងនោះ ចន្លោះពីខែមេសា ដល់ដើមខែឧសភា កម្ដៅអាចកើនឡើងខ្លាំង ជាមួយនឹងសីតុណ្ហភាព៣៨អង្សា ហើយថ្ងៃខ្លះ អាចឡើងដល់៤១អង្សា។ ក្នុងពេលកម្ដៅកើនឡើងនោះ បរិមាណទឹកភ្លៀងកក់ខែ ក៏ធ្លាក់ក្នុងចំនួនតិចតួចជាងឆ្នាំ២០២៣ដែរ ហើយបាតុភូតផ្គររន្ទះ និងខ្យល់កន្ត្រាក់កើតមានច្រើន៕