កីឡាជាតិ
ជាតិ
គោព្រៃកម្ពុជា ទទួលម៉ុងហ្គោលី នៅស្តាតអូឡាំពិកដែលទើបដំឡើងកៅអីថ្មីសន្លាង
× ទីបំផុត ពហុកីឡដ្ឋានជាតិអូឡាំពិកដែលទើបដំឡើងកៅអីមានបង្អែកថ្មីរួចរាល់ ស្របតាមគោលការណ៍ FIFA នឹងត្រូវទទួលដឹកនាំការប្រកួតលើកដំបូង ក្នុងជំនួបមិត្តភាពអន្តរជាតិ រវាងក្រុមកីឡាបាល់ទាត់ជម្រើសជាតិកម្ពុជា ទល់នឹងក្រុមម៉ុងហ្គោលី។
នៅលើផេកហ្វេសប៊ុកផ្លូវការរបស់ខ្លួននៅព្រឹកថ្ងៃទី៥ ខែមេសា សហព័ន្ធកីឡាបាល់ទាត់កម្ពុជា (FFC) បានប្រកាសរៀបចំការប្រកួតមិត្តភាពអន្តរជាតិ រវាងក្រុមគោព្រៃ និង ម៉ុងហ្គោលី ដែលនឹងធ្វើឡើងនៅថ្ងៃទី៧ ខែមិថុនា ឆ្នាំ២០២៤។
ការប្រកួតនេះ FFC នឹងប្រើប្រាស់កីឡដ្ឋានអូឡាំពិកដែលបានដំឡើងកៅអីមានបង្អែករួចរាល់ ស្របតាមស្តង់ដារសហព័ន្ធកីឡាបាល់ទាត់អន្តរជាតិ (FIFA) និង អាស៊ី (AFC) និងជាការប្រកួតអន្តរជាតិលើកដំបូងរបស់កម្ពុជា សម្រាប់ឆ្នាំ ២០២៤នេះ។
បន្ទាប់ពីដំឡើងកៅអីថ្មី ២៥០០០កៅអីរួចរាល់ ជាមួយរចនាបថខ្មែរក្បាច់ផ្កាចន្ទន៍ ដោយចំណាយទឹកប្រាក់ជិតកន្លះលានដុល្លារ ទីលានប្រកួតកីឡាបាល់ទាត់ក្នុងស្តាតអូឡាំពិក អាចផ្ទុកទស្សនិកជនផ្លូវការសរុបចំនួន ៣ម៉ឺននាក់។
ក្រុមជម្រើសជាតិកម្ពុជា ដែលមានលោក Felix Dalmax ជាគ្រូបង្វឹក ស្ថិតនៅចំណាត់ថ្នាក់ទី១៧៩ ក្នុងតារាង FIFA Ranking ពិភពលោក ស្របពេលម៉ុងហ្គោលី នៅលេខរៀងទី១៩១។
ទាំងកម្ពុជា និងម៉ុងហ្គោលី សុទ្ធតែទទួលលទ្ធផលមិនល្អដូចគ្នា ក្រោយរងបរាជ័យទាំងពីរប្រកួតរៀងខ្លួននៅការប្រកួតមិត្តភាព FIFA Series កាលពីខែមីនា។ នៅ FIFA Series កម្ពុជា ចាញ់ហ្គីយ៉ាន់ ៤-១ និងចាញ់ ហ្គីណេអេក្វាទ័រ ២-០ ស្របពេលម៉ុងហ្គោលី ចាញ់ តង់សានី ១-០ និង អាស៊ែបៃហ្សង់ ១-០៕
© រក្សាសិទ្ធិដោយ thmeythmey.com