ជាតិ
ពីនេះ ពីនោះ
ប្រធានស្ថាប័នខ្លះបរាជ័យក្នុងការទប់ស្កាត់មន្ត្រីមិនអោយឈប់ពេលចូលឆ្នាំចិន!
×![]()
ដោយ: លីម តុលា
ភ្នំពេញ៖ ដោយសារតែនិន្នាការនៃការចូលរួមអបអរសាទរពិធីបុណ្យប្រពៃណីចូលឆ្នាំចិន និងវៀតណាមកាន់តែមានវិសាលភាពធំឡើងៗ គេសង្កេតឃើញប្រធានស្ថាប័នរដ្ឋមួយចំនួនបរាជ័យក្នុងការទប់ស្កាត់មិនអោយមន្ត្រីរបស់ខ្លួនឈប់សម្រាកនាពេលបុណ្យចូលឆ្នាំចិន និងវៀតណាមនេះ។ នេះ គឺជាទម្លាប់ដែលអាចក្លាយទៅជាប្រពៃណី ហើយគេពិបាកនឹងកែឡើងវិញនាពេលអនាគត។
ពលរដ្ឋខ្មែរកាត់ចិន ចិនកាត់ខ្មែរ ខ្មែរកាត់វៀតណាម វៀតណាមកាត់ខ្មែរ ឬខ្មែរសុទ្ធបាននាំគ្នាប្រារព្ធពិធីបុណ្យប្រពៃណីចូលឆ្នាំចិន និងវៀតណាម យ៉ាងគគ្រឹកគគ្រេង។ ស្ថាប័នរដ្ឋបើកទ្វារតែខ្វះមន្ត្រីធ្វើការ សាលារៀនរដ្ឋ និងឯកជនបិទទ្វារ ផ្សារធំៗនៅទីក្រុងភ្នំពេញបិទទ្វារ ក្រុមហ៊ុនឯកជនបិទទ្វារ។ល។
ប្រសិនបើនិយាយពីសាលារៀនដែលនៅបន្តបើកទ្វារវិញ មានមែនវត្តមានគ្រូ តែគ្មានសិស្ស និងនិស្សិត។ «គ្រូខ្លះខ្សិបប្រាប់កូនសិស្សថា កុំមកច្រើនពេកនាំតែពិបាកបង្រៀន។ បើមកចំនួនតិច មិនចាំបាច់បង្រៀនទេ»។
នៅតាមស្ថាប័នរដ្ឋ មន្ត្រីខ្លះ មកមួយព្រឹក ឈប់ពេលល្ងាច។ មកពេលល្ងាច ឈប់ពេលព្រឹក ឬមិនមកតែម្តង បើទោះបីជាមានបម្រាបហាមមិនអោយឈប់ក៏ដោយក្តី។ ប្រសិនបើមានមន្ត្រីខ្លះមកធ្វើការក៏ដោយ ក៏ពួកគេ គ្មានអារម្មណ៍ធ្វើការដែរ។ ពួកគេគ្រាន់តែមកបង្ហាញអោយឃើញមុខតែប៉ុណ្ណោះ។
នៅក្នុងស្ថាប័នរដ្ឋខ្លះ មន្ត្រីថ្នាក់លើហាមមន្ត្រីថ្នាក់ក្រោមកុំអោយឈប់នៅថ្ងៃបុណ្យចូលឆ្នាំចិន តែខ្លួនឯងឈប់សម្រាកទៅវិញ។ នេះគឺជាបទបញ្ជាច្របូកច្របល់ និងគ្មានគោលការណ៍អ្វីពិតប្រាកដឡើយ។
ការឈប់សម្រាករបស់មន្ត្រីរាជការនៅក្នុងពិធីបុណ្យចូលឆ្នាំចិន និងវៀតណាមនេះ ធ្វើអោយកម្ពុជាខាតបង់ប្រយោជន៍ពីរយ៉ាងធំ។ ទី១ រូបភាពមិនល្អដែលមន្ត្រីខ្មែរឈប់ធ្វើការនៅក្នុងបុណ្យចូលឆ្នាំសាសន៍ដទៃ និងទី២ រដ្ឋាភិបាលបាត់បង់ប្រសិទ្ធិភាពការងារ។ បាត់បង់ប្រសិទ្ធិភាពការងារ មានន័យថា រដ្ឋាភិបាលខាតបង់ប្រាក់កាស៕
© រក្សាសិទ្ធិដោយ thmeythmey.com
