ពីនេះ ពីនោះ
×![]()
ដោយ: លីម តុលា
ក្នុងរយៈពេលចុងក្រោយនេះ មន្ត្រីរាជរដ្ឋាភិបាល អង្គការសង្គមស៊ីវិល និងប្រជាពលរដ្ឋជជែកគ្នាពីរឿងបញ្ហាខ្សាច់ច្រើន។ ស្ថាប័នណាជាអ្នកទទួលខុសត្រូវពិតប្រាកដ? ក្រសួងធនធនទឹក ឬក្រសួងឧស្សាហកម្មរ៉ែ និងថាមពល? តែចុងក្រោយនេះ គេបានលឺច្បាស់ពីមាត់លោកនាយករដ្ឋមន្ត្រី ហ៊ុន សែន ហើយថា គឺក្រសួងឧស្សាហកម្មរ៉ែ និងថាមពលជាអ្នកទទួលខុស និងត្រូវ។ ដូច្នេះ ចាប់ពីពេលនេះតទៅ នៅពេលដែលមានបញ្ហាបាក់ច្រាំងទន្លេ ឬមានបញ្ហាផ្សេងៗ ហើយមានការតវ៉ាពីប្រជាពលរដ្ឋ គេពិតជាដឹងច្បាស់ថា ក្រសួងឧស្សាហកម្មជាអ្នកចេញមុខដោះស្រាយ។
តាមពិត បញ្ហាធ្វើអាជីវកម្មធនធានខ្សាច់ដែលអាចនាំអោយបាក់ច្រាំងទន្លេ ហើយទាញទម្លាក់ផ្ទះពលរដ្ឋចូលក្នុងទឹកបានកើតឡើងជាច្រើនឆ្នាំមកហើយ។ តែការដោះស្រាយទើបត្រូវបានគេចាត់វិធានការនាពេលនេះ។
ជាលក្ខណៈសេដ្ឋកិច្ច គ្មានប្រទេសណាមួយហាមមិនអោយរដ្ឋាភិបាលធ្វើអាជីវកម្មលើធនធានរបស់ខ្លួនដើម្បីអភិវឌ្ឍប្រទេសនោះទេ។ ប៉ុន្តែ អ្វីដែលជារឿងសំខាន់នៅកម្ពុជា គឺថា អ្នកពាក់ព័ន្ធជជែកគ្នាច្រើនពីរឿងបាក់ច្រាំង ពីរឿងក្រសួងនេះកាន់ ក្រសួងនោះអត់កាន់ ខ្សាច់បូមកន្លែងនេះបាន កន្លែងនោះមិនបាន ក្រុមហ៊ុននេះមានអាជ្ញាប័ណ្ណ ក្រុមហ៊ុននោះអត់អាជ្ញាប័ណ្ណ អ្នកនេះលក់អាជ្ញាប័ណ្ណអោយអ្នកនេះ អត់អ្នកនោះ។ គេលឺតែរឿងខាងលើនេះ ប៉ុន្តែ គេមិនដែលលឺក្រសួងពាក់ព័ន្ធប្រកាសពីប្រាក់ចំណូលបានពីការធ្វើអាជីវកម្មខ្សាច់ជាសាធាណៈឡើយ?
តើចំណូលរដ្ឋពីអាជីវកម្មខ្សាច់មានចំនួនប៉ុន្មានពិតប្រាកដ? តើប្រាក់ចំណូលហ្នឹងមានតម្លាភាពឬទេ?
តើប្រាក់ចំណូលពីខ្សាច់ត្រូវយកទៅចំណាយដើម្បីអ្វី? ហេតុអ្វីគេមិននាំគ្នាជជែកគ្នាពីរឿងប្រាក់ចំណូលពីអាជីវកម្មខ្សាច់សម្រាប់ថវិការដ្ឋ? មិនយល់…?
សូមបញ្ជាក់ថា អាជ្ញាធរអប្សរា បន្ទាប់ពីមានរឿងចម្រូងចម្រាសពាក្យសម្តីជាមួយតំណាងរាស្ត្របក្សប្រឆាំងពីរឿងប្រាក់ចំណូលពីរមណីយដ្ឋានអង្គររួចមក របាយការណ៍ប្រាក់ចំណូលពីការចូលទស្សនាអង្គរវត្តត្រូវបានអាជ្ញាធរអប្សរាលាតត្រដាងជាសាធារណៈជារៀងរាល់ខែ៕
© រក្សាសិទ្ធិដោយ thmeythmey.com
